Same 11 - Ai Vola Tabu (Vakadewa Makawa Vakavoutaki 2021)（FRV21）

Na Sere ni Vakararavi Vua na Kalou Vua nai liuliu ni sere. Me baleti Tevita.

1Au sa vakararavi vei Jiova; Dou sa kaya vakacava ki na yaloqu,

“Mo vuka me vaka na manumanu vuka ki na nomu ulunivanua;

2ka raica, era sa loqata na nodra dakai-titi na tamata lomaca,

era sa vakarautaka na gasau e na kena wa,

me ra vanai koya lo sa yalododonu.

3Ni kevaka sa talaraki sobu na yavu,

a cava ena kitaka rawa na tamata yalododonu?”

4Sa tiko ko Jiova e na nona vale tabu;

ai tikotiko vakaturaga nei Jiova sa tiko mai lomalagi.

Sa vakaraica tiko na matana, sa vakatovolei ira na tamata na dakudaku ni matana.

5Sa vakatovolea na tamata yalododonu ko Jiova,

ia na tamata lomaca kei koya sa vinakata nai valavala kaukauwa sa cati koya na yalona.

6Ena vakatauca nai cori vei ira na tamata i valavala ca ko koya;

na bukawaqa kei na sulifure, kei na cava rerevaki sa kedrai votavota e na medra bilo.

7Ni sa yalododonu ko Jiova;

sa vinakata ko koya nai valavala dodonu;

ko ira na yalododonu era na raica na matana.