2 Veigauna 31 - Ai Vola Tabu (Vakadewa Makawa Vakavoutaki 2021)（FRV21）

Sa Vakarusai na Vanua ni Qaravi Kalou Tani

1Ia ni sa oti na ka kecega oqo, sa lako yani ko ira kecega na Isireli sa tiko mai kea ki na veikoro e Juta, ka vorolaka na veimatakau, ka taya sobu na veikalou-yalewa ni veikau, ka talaraka sobu na veitikina cecere, kei nai cabocabo-ni-soro, e na nodra veiyasana kecega na Juta kei Penijamini, mai Ifereimi talega kei Manasa, a ra sa ia tiko ka vakaotia kece sara. Sa qai lesu tale ko ira kece na Isireli, na tamata yadua ki na nona i votavota, ki na nona koro.

Na Veisolisoli Eso me Veivuke ki na Sokalou

2A sa lesia ko Esekaia na nodra veivuke na matabete kei ira na Livai, me vaka na nodra dauveivuke, na tamata yadua ki na nona i tavi, ko ira na bete kei ira na Livai me ra vakacabora nai soro kama, kei nai soro ni veivinakati; me ra qarava tiko, ka me vakavinavinaka, me ia talega na sere e na matamata-ni-koro e na veivale i Jiova.

3Tiko 28.1—29.39Nai tavi talega ni tui mai na nona ka mei soro kama, io, nai soro kama e na mataka kei na yakavi, kei nai soro kama ni veisiga ni vakacecegu, kei na veivula vou, kei na veisolevu sa lokuci, me vaka sa volai e na vunau i Jiova.

4 Tiko 18.12,13,21 Sa vakarota talega ko koya vei ira na tamata era sa tiko e Jerusalemi, me ra solia na kedrai votavota na bete kei na Livai, me ra gumatua tikoga e na vunau i Jiova.

5Ia ni sa rogovaki nai vakaro, era sa kauta vakalevu mai ko ira na Isireli nai sevu ni sila, na waini, kei na waiwai, kei na oni, ka so mai na vua ni were kecega. A ra sa kauta vakalevu mai nai katini ni ka kecega.

6Ia ko ira na Isireli kei Juta, era sa tiko e na veikoro i Juta, era sa kauta talega mai nai katini ni bulumakau kei na sipi, kei nai katini ni veika e tabu sa vakatabui me nei Jiova na nodra Kalou, ka ra binia vata e nai binibini eso.

7A ra sa vakatekivu e nai katolu ni vula me ra cakava nai binibini, ka tinia e nai kavitu ni vula.

8Ia ni sa lako mai ko Esekaia, kei ira na turaga, ka raica nai binibini, era sa vosavakalougatataki Jiova, kei ira na nona tamata na Isireli.

9Sa qai tarogi ira na bete kei ira na Livai ko Esekaia, e na vuku ni binibini.

10A sa vosa vua ko Asaraia na bete levu ni vale i Setoki, ka kaya, “Mai na siga sa vakatekivu kina me kau madrali mai ki na vale i Jiova, keimami sa kana ka mamau, ka sa vo tu vakalevu, ni sa vakalougatataki ira na nona tamata ko Jiova; ia sa vo tu na ka levu oqo.”

Na Nodra Vakarautaki na Bete kei na Livai

11Sa qai vakarota ko Esekaia me vakarautaki na lololo e na vale i Jiova; a ra sa vakarautaka,

12ka kauta mai e na yalodina nai madrali, kei nai katini ni ka, kei na ka sa vakatabui me nei Jiova. Ka sa lewa na ka oqo ko Kononaia na Livai, a sa kenai karua ko Semeai na tacina;

13ka sa lesi ko Jieli, kei Asasaia, kei Neaca, kei Asaeli, kei Jirimoci, kei Josapati, kei Ilieli, kei Isimakaia, kei Meaci, kei Penaia me ratou dauveivuke, ka me vakarorogo ko iratou oqo kivei Kononaia kei Semeai na tacina, me vaka na nodrau vosa ko Esekaia na tui kei Asaraia, o koya sa lewa e na vale ni Kalou.

14Ka sai tavi i Kore, na luve i Imina na Livai, nai vakatawa-ni-katuba vaka ki na tokalau, me lewa nai solisoli sa tauci me vakacabori vua na Kalou, me vota nai madrali i Jiova, kei na veika sa tabu sara.

15Sa dauvukei koya ko Iteni, kei Miniamini, kei Jesua, kei Semaia, ko Amaraia, kei Sekanaia, e na nodra veikoro na bete, e na cakacaka sa lesi, me solia vei ira na wekadra era veivuke kina, vei ira sa lelevu kei ira sa lalai,

16ka sa kenai kuri na nodra yavusa era tagane, sa tolu na nodra yabaki kei ira sa qase cake, io kivei ira yadua sa curu mai ki na vale i Jiova, na nona i votavota e na veisiga ki na nodra cakacaka e na nodra i tavi ni ra veivuke tiko.

17A sa lesi na nodra i tavi na bete me vaka na vale ni nodra qase; kei ira na Livai era sa yabaki ruasagavulu kei ira sa qase cake, me vaka na nodra i tavi e na nodra wasewase.

18Sa vakacurumi vata kei ira na bete na nodra lalai kecega, na watidra, kei na luvedra tagane, kei na luvedra yalewa, vei ira nai soqosoqo taucoko; ni ra sa dau yalodina me ra vakasavasavataki ira e na vuku ni veiqaravi.

19Vei ira talega na luve i Eroni, ko ira na bete era tiko e na veiwere na vanua veico ni nodra veikoro, e na koro yadua, sa cavuti na yacadra ko ira na tamata yadua me ra solia nai votavota kivei ira na tagane kecega vei ira na bete, vei ira kece talega na Livai era sa wili e na nodra yavusa.

20A sa cakava vakaoqo ko Esekaia e na nodra yasana kecega na Juta, ka sa cakava na ka vinaka kei na ka dodonu kei na ka dina e na mata i Jiova na nona Kalou.

21Ia na cakacaka kecega ka vakatekivuna ko koya e na vale ni Kalou, kei na vunau, kei nai vakaro, me qarava kina na nona Kalou, sa cakava ko koya e na yalona taucoko, ka sa yaco tiko.