Lako Yani 5 - Ai Vola Tabu (Vakadewa Makawa Vakavoutaki 2021)（FRV21）

Ko Mosese kei Eroni e na Mata i Fero

1A sa oti erau qai lako ko Mosese kei Eroni, ka kaya vei Fero, “Sa vosa vakaoqo ko Jiova na Kalou nei Isireli, ‘Mo laivi ira na noqu tamata me ra la'ki vakacaboisoro vei au mai na vanua lala.’ ”

2Ia sa kaya ko Fero, “Ko cei ko Jiova, me'u vakarorogo ki na domona, me'u laivi ira kina na Isireli me ra lako? Au sa sega ni kilai Jiova, au na sega talega ni laivi ira na Isireli me ra lako.”

3A rau sa kaya, “A nodra Kalou na Iperiu sa vakatakilai koya kivei keirau; me keimami lako mada ki na vanua dravuisiga me bogi tolu, ka vakacaboisoro vei Jiova na neimami Kalou, de qai yaviti keimami e na mate dauveiveitauvi se nai seleiwau.”

4Ia sa kaya vei rau na tui Ijipita, “Koi kemudrau, ko Mosese kei Eroni, a cava drau sa via kauti ira tani kina na tamata mai na nodra cakacaka? Drau lesu tale ki na nomudou i lesilesi!”

5Sa kaya talega ko Fero, “Raica, era sa qai lewe vuqa cake mai vei ira na kai vanua oqo, ka drau sa via vakacegui ira mai na nodra i tavi!”

6Ia e na siga ko ya sa vakaroti ira ko Fero era sa lewa na nodra cakacaka na tamata, kei na nodra turaga, ka kaya,

7“Dou kakua ni solia tale na co vei ira na tamata me ra bulia kina na vatu-buli, me vaka eliu; me ra lako ga ko ira ka kumuna mai na co.

8Ia nai wiliwili ni vatu-buli era sa dau cakava eliu, dou lesia tikoga vei ira; dou kakua ni vakalailaitaka, ni ra sa vucesa; o koya era sa tagi kina, ka kaya, ‘Me keimami lako me vakacaboisoro vua na neimami Kalou.’

9Me vakabibitaki vei ira na tamata na nodra cakacaka; era na qai cakacaka vakaukauwa kina ka sega ni daugoleva na vosa lasu.”

10A ra sa lako yani ko ira era lewa na nodra cakacaka na tamata kei na nodra turaga, ka ra sa vosa vei ira na tamata, ka kaya, “Sa vosa vakaoqo ko Fero, ‘Au sa na sega ni solia vei kemudou na co.

11Dou lako yani ka dou kumuna ga vakai kemudou na co e na vanua dou sa kunea kina; ia ena sega ni vakalailaitaki sobu na nomudou cakacaka.’ ”

12A ra sa qai dui veilakoyaki kina na tamata e na vanua taucoko ko Ijipita, me ra kumuna vata na vu-ni-sila, mei sosomi ni co.

13A ra sa vakusakusataka ko ira era lavaka na nodra cakacaka, ka ra kaya, “Dou vakaotia na nomudou cakacaka, ka me rawati vinaka na nomudou i tavi e na veisiga me vaka ga ni se dausoli tiko vei kemudou na co.”

14Ka ra sa vakanakuitataki ko ira na nodra ovisa na Isireli, ko ira era sa lesia na tamata nei Fero me ra dauraica na cakacaka, ka ra sa tarogi vakaoqo, “A cava dou sa sega ni vakaotia kina na nomudou i tavi vatu buli e na noa, edaidai talega, me vaka eliu?”

15Era sa qai lako mai ka tagi vei Fero ko ira na ovisa vei ira na Isireli, ka ra kaya, “A cava ko ni sa kitaka kina vakaoqo vei keimami na nomuni tamata?

16Sa sega na co sa soli vei keimami na nomuni tamata, ia era sa kaya ga vei keimami, ‘Dou cakava na vatu-buli!’ Ni raica mada nai vakarau ni neimami vakanakuitataki na nomuni tamata! Ia sa cala ga ko ira na kai nomuni.”

17A sa kaya ga ko koya, “Dou sa vucesa, dou sa vucesa; o koya dou sa kaya kina, ‘Me keimami lako ka vakacaboisoro vei Jiova.’

18Dou lako ga kina oqo, ka la'ki cakacaka; ni na sega ni soli vei kemudou na co, ia mo dou na rawata tikoga mai na nomudou i wiliwili ni vatu-buli.”

19Era sa qai raica na ovisa vei ira na Isireli ni ra na leqa vakaloloma ni sa kainaki, “Dou kakua sara ni vakalailaitaka sobu na nomudou i wiliwili ni vatu-buli e na veisiga.”

20A ra sa veisotaraki kei Mosese kei Eroni erau sa tu e na gaunisala, ni ra sa lesu mai vei Fero.

21A ra sa kaya vei rau, “Me vakanamata vei kemudrau ko Jiova, ka vakatulewa! Drau sa vakaboicataki keimami vei Fero kei ira talega na nona vakailesilesi, ka sa solia ki na ligadra nai seleiwau me ra vakamatei keimami kina.”

Sa Yalataka na Veisereki ko Jiova

22A sa lesu vei Jiova ko Mosese, ka sa kaya, “Kemuni na Turaga, a cava ko ni sa vakararawataki ira kina na tamata oqo? A cava ko ni a talai au kina?

23Mai na gauna ka'u a lako kina vei Fero me vosa e na yacamuni, sa caka ca vei ira na tamata oqo ko koya, ka ko ni sa sega ni bau cakava e dua na ka mo ni vakabulai ira kina na nomuni tamata.”