Esera 7 - Ai Vola Tabu (Vakadewa Makawa Vakavoutaki 2021)（FRV21）

Na Lako ki Jerusalemi kei na Cakacaka i Esera

1Sa oti na veika oqo, e na gauna sa lewa kina ko Atakisekise na tui Perisia, ko Esera na luve i Siraia ka tagane, na luve i Asaraia ka tagane, na luve i Ilikaia ka tagane,

2na luve i Salumi ka tagane, na luve i Setoki ka tagane, na luve i Eiitupi ka tagane,

3na luve i Amaraia ka tagane, na luve i Asaraia ka tagane, na luve i Miraioci ka tagane,

4na luve i Seraia ka tagane, na luve i Usai ka tagane, na luve i Puki ka tagane,

5na luve i Episua ka tagane, na luve i Finiasi ka tagane, na luve i Iliesa ka tagane, na luve i Eroni na bete levu ka tagane—

6ka sa lako cake ko Esera oqo mai Papiloni. A sa vunivola uasivi ko koya e na vunau i Mosese, ka solia ko Jiova na nodra Kalou na Isireli; a sa solia vua ko koya na tui na ka kecega ka kerea ko koya, me vaka sa koto vua na liga i Jiova na nona Kalou.

7A sa lako cake ki Jerusalemi eso vei ira na Isireli, ka so na bete kei na Livai, kei na dausere, kei nai vakatawa-ni-katuba, kei na Necinimi e nai kavitu ni yabaki ni lewa i Atakisekise na tui.

8A sa yaco ki Jerusalemi e nai kalima ni vula, e nai kavitu ni yabaki ni tui.

9Ni sa cavu tu ko koya me lako cake mai Papiloni e nai matai ni siga e nai matai ni vula, a sa yaco ki Jerusalemi e nai matai ni siga e nai kalima ni vula, ka ni sa tiko vua na liga vinaka ni nona Kalou.

10Ni sa vakarautaka oti na lomana ko Esera me vakasaqaqara e na vunau i Jiova, ka me cakava talega, ka me vakavulica e Isireli nai lesilesi kei na lewa.

Nai Vola i Atakisekise kivei Esera

11A sa vakaoqo nai vola sa solia ko Atakisekise, na tui kivei Esera na bete, na vunivola, io na vunivola e na vosa ni vunau i Jiova, kei na nona i vakaro vei ira na Isireli:

12“Koi au ko Atakisekise, na nodra tui na tui, kivei Esera na bete, na vunivola vuku e na vunau ni Kalou ni lomalagi, me nomu na vakacegu vakaidina, ia me vaka sa dau volai.

13Au sa vakarota, e na vukudra kecega na Isireli, kei ira na nodra bete, kei ira na Livai, e na noqu matanitu, me ra lako vata kei iko ki Jerusalemi ko ira kece era vinakata e lomadra vakataki ira.

14Ni sa talai iko na tui, kei na nona lewe ni bose eratou le vitu, me taroga e na vuku i Juta kei Jerusalemi, me vaka na vunau ni nomu Kalou sa tu e ligamu;

15ka me kauta na siliva kei na koula, eratou sa vinakata me ratou vakacabora ko koya na tui kei iratou na nona lewe ni bose vua na nodra Kalou na Isireli, sa tiko mai Jerusalemi na nona vale,

16kei na siliva kei na koula kecega ko sa kunea rawa e na veiyasana kece vaka-Papiloni, kei na ka era vinakata me ra vakacabora ko ira na tamata, kei ira na bete, ni sa lomadra me vakacabora e na vuku ni vale ni nodra Kalou mai Jerusalemi.

17Mo volia mada ga e nai lavo oqo, na bulumakau eso, na sipi tagane eso, na lami eso, kei na kedrai madrali laukana, kei na kedrai madrali gunuvi, ka vakacabora e dela ni cabocabo-ni-soro e na vale ni nomudou Kalou mai Jerusalemi.

18Ia na ka kecega sa vinaka vei iko kei ira na wekamu, me caka e na siliva kei na koula sa vo, mo kitaka ga, me vaka na loma ni nomudou Kalou.

19Ai yaya talega sa soli vei iko me ia kina na cakacaka e na vale ni nomu Kalou, mo solia e na mata ni Kalou ni Jerusalemi.

20Kei nai kuri ni ka sa yaga ki na vale ni nomu Kalou, sa yaga mo solia, mo solia ga mai na nona valeniyau na tui.

21“Ia koi au ko Atakisekise na tui, au sa vakaroti ira kecega na dauniyau mai tai kadua ni uciwai, me caka vakariri na ka kecega sa na kerea vei kemudou ko Esera na bete, na vunivola ni vunau ni Kalou ni lomalagi,

22ke sa yacova e dua na drau na taledi siliva, ka dua na drau nai vakarau witi, ka vitu na drau ka limasagavulu na qaloni waini, ka vitu na drau ka limasagavulu na qaloni waiwai, kei na masima sa sega ni volai na kena levu.

23A ka kecega sa vakarota ko koya na Kalou ni lomalagi, me caka vakavinaka e na vuku ni nona vale na Kalou ni lomalagi, ia ka cava me yaco kina na cudru ki na nona matanitu na tui, vei iratou talega na luvena?

24Keitou sa tukuna talega vei kemudou, e na vukudra na bete kei ira na Livai, na dausere, nai vakatawa-ni-katuba, na Necinimi, kei na tamata era qarava na vale ni Kalou oqo, sa sega ni tara me taroga vei ira nai vakacavacava, se na kamunaga, se na ka e daucaka vua na tui.

25“Ia o iko, Esera, me vaka na vuku ni nomu Kalou, sa tu vei iko, mo lesia eso me turaga-ni-lewa lalai ka so me turaga-ni-lewa lelevu, me ra lewai ira kecega na tamata mai tai kadua ni uciwai, o ira kece era kila na vunau ni nomu Kalou; ka vakavulici ira era sega ni kila.

26Ia ko ira kece sa bese ni muria na vunau ni nomu Kalou, kei na vunau ni tui, me cudruvi vakasauri ko koya, se me mate, se me vakasevi tani, se me kovei na nona i yau, se me biu ki na valeniveivesu.”

Sa Vakacaucautaka na Kalou ko Esera

27Me vakavinavinakataki ko Jiova na Kalou ni noda qase, o koya sa vakauqeta na lomana na tui, me vakaiukuukutaka na vale i Jiova mai Jerusalemi,

28ka sa vakayacori au me'u lomani e matadra na tui, kei ira na nona lewe ni bose, kei ira kecega na nona tamata turaga qaqa na tui. Ia ka'u a vakaukauwataki ni sa tiko vei au na liga i Jiova na noqu Kalou, ka'u a qai vakasoqona vata na tamata era sa liu mai vei ira na Isireli me ra lako cake vata kei au.