1 Veigauna 19 - Ai Vola Tabu (Vakadewa Makawa Vakavoutaki 2021)（FRV21）

Sa Vakadrukai ko Ira na Kai Amoni kei Siria(2 Samuela 10.1-19)

1Sa oti oqo, sa qai ciba ko Neasi na nodra tui na luve i Amoni, ka sa mai tui na luvena tagane, me kenai sosomi.

2A sa kaya ko Tevita, “Au na lomani Anuni na luve i Neasi, ni sa lomani au ko tamana.” A sa vakatadu mata ko Tevita me vakacegui koya e na vuku i tamana. A sa lako ko iratou na tamata nei Tevita ki na nodra vanua na luve i Amoni, kivei Anuni, me vakacegui koya.

3Ia era sa kaya vei Anuni ko ira na nodra turaga na luve i Amoni, “O sa nanuma beka ni sa dokai tamamu ko Tevita, ni sa talai iratou na veivakacegui kivei iko? Sa ra sega li ni lako mai kivei iko ko iratou na nona tamata me ratou vakararai, ka yamata ka vukica na vanua?”

4A sa tauri iratou kina na tamata nei Tevita ko Anuni, ka tasia, ka seledrutia na nodratou i sulu ka me tautauvata kei na rubudratou, ka talai iratou yani.

5Sa qai lako eso ka tukuna vei Tevita na ka sa caka vei iratou na tamata. A sa talaki ko koya me tavaki iratou; ni ra sa madua vakalevu ko iratou na tamata. Ka sa kaya na tui, “Dou tiko mada mai Jeriko, me tei tubu na kumimudou, mo dou qai lako tale mai.”

6Ia ni ra sa kunea ko ira na luve i Amoni ni ra sa velavela vei Tevita, era sa vakauta ko Anuni kei ira na luve i Amoni e dua na udolu na taledi siliva, me ra volia kina na qiqi-ni-valu eso, ka so na tamata sa dauvodo ose, mai Mesopotemia, kei Siria-meeka, kei Sopa.

7A ra sa volia e tolu na oba ka rua na udolu (32,000) na qiqi-ni-valu, kei na tui Meeka kei ira na nona tamata; a ra sa lako mai ka tiko vakaivalu ki Metipa. A ra sa soqoni vata ko ira na luve i Amoni mai na nodra veikoro, ka lako mai ki nai valu.

8Ia ni sa rogoca ko Tevita, sa talai Joape yani, kei ira kece na mataivalu qaqa.

9A ra sa curu mai ki tautuba ko ira na luve i Amoni, a sa tuvai valu ka donuya na matamata-ni-koro; ia ko iratou na tui eratou sa lako mai, eratou sa tiko vakai ratou e na were.

10Ia ni sa raica ko Joape ni sa tuvai nai valu e matana, e dakuna talega, sa digitaka ko koya eso na tamata bula mai vei ira kecega na Isireli, a sa tuvai ira me ra donui ira na kai Siria.

11Ia na kena vo ni tamata sa solia kivei Apisai na tacina, a ra sa tuvai ira me ra donui ira na luve i Amoni.

12A sa kaya ko koya, “Kevaka sa gumatua vei au ko ira na kai Siria, mo qai mai vukei au; ia kevaka sa gumatua vei iko ko ira na luve i Amoni, au na qai vukei iko.

13Mo kaukauwa, ia me da gumatua e na vukudra na noda tamata, kei na veikoro ni noda Kalou, ka me qai kitaka ko Jiova na ka sa vinaka vua.”

14Sa qai toro voleka yani ko Joape, kei ira na tamata era tiko vata kaya, kivei ira na kai Siria me ra vala, ka ra sa dro e matana.

15Ia ni ra sa raica ko ira na luve i Amoni, ni sa dro ko ira na kai Siria, era sa dro talega ko ira e na mata i Apisai na tacina, a ra sa curu ki loma ni koro. Sa qai lako ki Jerusalemi ko Joape.

16Ia ni ra sa raica ko ira na kai Siria ni ra sa guca vei ira na Isireli, era sa vakatadu mata, a sa kauti ira mai na kai Siria era sa tiko mai tai kadua ni Uciwai, ka sa liutaki ira ko Sofaki na kavetani ni valu i Etareseri.

17A sa tukuni kivei Tevita; ka sa soqoni ira vata kecega na Isireli ko koya, a sa qalo kosova na Joritani, ka sa yaco vei ira, a sa tuva nai valu me donui ira. Ia ni sa tuvai ira oti na nona mataivalu ko Tevita me ra donui ira na kai Siria, era sa vala kaya.

18Ka sa dro ko ira na kai Siria e matadra na Isireli, a sa mokuta ko Tevita vei ira na kai Siria e le vitu na udolu na tamata era sa vala e na qiqi-ni-valu, ka le va na oba (40,000) na tamata sa daulako e na yavadra, sa vakamatei Sofaki talega na kavetani ni valu.

19Ia ni ra sa raica ko ira na tamata i Etareseri ni ra sa guca vei ira na Isireli, era sa qai soro kivei Tevita, ka ra tauri me nona tamata; ka sa bese ko ira na kai Siria ni totaki ira tale na luve i Amoni.