1A sa kaya vei Pelaki ko Pelami, “Mo cakava mada eke vei au e vitu nai cabocabo-ni-soro, ka vakarautaka eke e vitu na bulumakau, ka vitu na sipi tagane.”
2A sa kitaka ko Pelaki me vaka na vosa i Pelami; a sa vakacabora ko Pelaki kei Pelami, e nai cabocabo-ni-soro yadua, e dua na bulumakau ka dua na sipi tagane.
3A sa kaya vei Pelaki ko Pelami, “Mo tu voleka mada ki na nomu i soro kama, ka'u na lako mada. De mai tavaki au ko Jiova, ia na ka sa vakatakila mai vei au, au na tukuna vei iko.” A sa lako yani ko koya ki na tikina cecere.
4A sa mai tavaki Pelami na Kalou; a sa kaya vua ko koya, “Au sa cakava oti e vitu nai cabocabo-ni-soro, ka vakacabora oti e nai cabocabo-ni-soro yadua e dua na bulumakau ka dua na sipi tagane.”
5A sa solia na vosa ki na gusu i Pelami ko Jiova, a sa kaya, “Mo lesu vei Pelaki, ka vosa vakaoqo.”
6A sa lesu vei koya, ka raica, sa tu voleka ki na nona i soro kama ko koya kei ira kecega na turaga ni Moapi.
7A sa qai lagata ko Pelami na nona i tukutuku, ka vaka:
“Sa kauti au mai Erami ko Pelaki na tui Moapi,
mai na veiulunivanua mai na tokalau:
‘Mo lako mai, mo vatonaki ira na Jekope e na vukuqu,
ia mo lako mai, mo lesavi ira na Isireli!’
8Au na vatonaki koya vakacava sa sega ni vatonaka na Kalou?
Se'u na lesavi koya vakacava sa sega ni lesava ko Jiova?
9Mai na dela ni uluvatu ka'u sa raici koya,
ka kunei koya mai na veivanua cecere;
raica, era sa tiko vakataki ira na tamata,
ka na sega ni wili vata kei ira na veimatanitu!
10O cei me wiliki ira rawa na Jekope sa vaka na kuvu-ni-soso,
se okata e dua na kena wase ni Isireli ni sa wase va?
Me'u mate mada me vaka sa mate na tamata yalododonu,
ka me vaka na nona i cavacava na noqu i cavacava!”
11Sa qai kaya vei Pelami ko Pelaki, “A cava ko sa kitaka vei au? Au a kauti iko mai mo vatonaki ira na noqu meca; ka raica, ko sa qai vosavakalougatataki ira tale.”
12A sa kaya ko koya, “Me'u kakua beka ni qarauna vinaka me'u cavuta ga na ka sa biuta e gusuqu ko Jiova?”
Nai Karua ni Tukutuku i Pelami13A sa kaya vua ko Pelaki, “Daru lako mada ki na dua tale na vanua, ko na raici ira mai kina. Ko na raici ira walega e dua na kenai wase lailai ka ko na sega ni raici ira kecega. Ia mo qai vatonaki ira mai kea.”
14A sa kauti koya ki na vanua ko Sofimi, ki na dela i Pisika, ka cakava e vitu nai cabocabo-ni-soro, ka vakacabora e nai cabocabo-ni-soro yadua e dua na bulumakau ka dua na sipi tagane.
15A sa kaya vei Pelaki ko koya, “Mo tu mada eke voleka ki na nomu i soro kama, ka'u na lako mada yani me'u veitavaki kei Jiova.”
16A sa mai tavaki Pelami ko Jiova, ka solia e dua na vosa vua, ka kaya, “Mo lesu vei Pelaki, ka vosa vakaoqo.”
17A sa lako mai kivei koya, ka raica, sa tu voleka ki na nona i soro kama, kei ira vata kaya na turaga ni Moapi. A sa kaya vua ko Pelaki, “A cava sa kaya ko Jiova?”
18A sa lagata na nona i tukutuku, ka kaya:
“I Pelaki, mo tu cake ka vakarorogo;
mo rogoci au, na luve i Sipori:
19Sa sega ni tamata na Kalou, me mai vosa lasu ko koya,
se na luve ni tamata, me dauveisautaka na lomana.
Sa vosa ni yalayala li ko koya, ka na sega ni cakava?
Se sa vosa li ko koya, ka na sega ni vakayacora?
20Raica, sa vakaroti vei au me'u vosavakalougatataka;
a sa vakalougatataka ko koya, ia ka'u sa sega ni veisautaka rawa.
21Sa sega ni raica ko koya na cala vei ira na Jekope;
ka sa sega ni raica ko koya na yalovakatani vei ira na Isireli.
Sa tiko ga kei ira ko Jiova na nodra Kalou,
ka sa kailavaki me tui e na kedra maliwa.
22Sa kauti ira tani mai Ijipita na Kalou,
ko koya sa kaukauwa me vaka na iunikoni.
23Sa sega sara ni sauvi rawa ko ira na Jekope,
ka sega ni vakayacori rawa na ca vei ira na Isireli;
ia sa kainaki ga oqo e na vukudra na Jekope kei na Isireli,
‘Raica na ka sa cakava na Kalou!’
24Raica, era na duri cake na tamata me vaka na laione yalewa,
ka wavu tu me vaka na laione tagane!
Ena sega ni davo sobu tale me yacova ni ra sa kania mada na kena
ka gunuva na dra ni kena sa vakamatei.”
25A sa qai kaya vei Pelami ko Pelaki, “Mo kakua sara ni qai vatonaki ira, ka mo kakua talega ni vosavakalougatataki ira.”
26Ia sa kaya vei Pelaki ko Pelami, “Au a sega beka li ni tukuna vei iko vakaoqo, ‘A ka kecega sa kaya ko Jiova, ko ya ga au na kitaka’?”
27A sa kaya vei Pelami ko Pelaki, “Daru lako mada, ka me'u na kauti iko ki na dua tale na yasa ni vanua. De sa na qai lomavinaka kina na Kalou mo vatonaki ira mai kea.”
28A sa kauti Pelami ko Pelaki ki na dela i Piori, ko koya sa donuya na vanua dravuisiga.
29A sa kaya vei Pelaki ko Pelami, “Mo cakava vei au eke e vitu nai cabocabo-ni-soro, ka vakarautaka vei au eke e vitu na bulumakau ka vitu na sipi tagane.”
30A sa kitaka ko Pelaki me vaka na vosa i Pelami, ka vakacabora e nai cabocabo-ni-soro yadua e dua na bulumakau ka dua na sipi tagane.
Who We AreWhat We EelieveWhat We Do
2025 by iamachristian.org,Inc All rights reserved.
