Filipai 2 - Ai Vola Tabu (Vakadewa Makawa Vakavoutaki 2021)（FRV21）

Na Yalo Malumalumu i Karisito kei na Nona Cecere

1Ia kevaka sa tu na veivakacegui e na vuku i Karisito, se tu na veivakalecataki ni loloma, se tu na veilomani ni Yalo Tabu, se tu na yalololoma kei na yalovinaka,

2mo dou vakayacora sara na noqu marau, mo dou lomavata kina, mo dou tautauvata e na loloma, mo dou lomavata, mo dou yalovata.

3Me kakua ni caka e dua na ka e na veileti se na veidokadokai walega; mo dou yalomalumalumu ka dui vakasama ni sa uasivi cake vua ko koya kadua.

4Mo dou kakua ni nanuma na veika ga me baleti kemudou yadua, ia mo dou dui nanuma talega na veika me baleti ira na tamata tani.

5Me tiko e na lomamudou na yalo oqo ka tiko talega vei Karisito Jisu,

6o koya, ni sai tovo vata kei na Kalou,

sa sega ga ni vakayaco lomana

ni sa vakatauvatani kei na Kalou;

7ia sa vakadravudravuataki koya,

ka kauta vua nai tovo ni tamata dauveiqaravi,

ka sa buli me tautauvata kei na tamata;

8ka sa kune ni sai tovo vata kei na tamata,

sa vakayalomalumalumutaki koya,

ka sa talairawarawa me mate—

io me mate e na kauveilatai.

9O koya oqo sa vakalevulevui koya cake kina na Kalou,

ka sa solia vua e dua na yaca

sa uasivi cake mai na yaca kecega,

10 Aisea 45.23 me tekiduru kina e na yaca i Jisu

na duru vakaaduaga mai lomalagi, kei vuravura, kei na ruku i vuravura,

11me vakatusa talega na yame kecega

ni sa Turaga ko Jisu Karisito,

me vakarokorokotaki kina na Kalou na Tamada.

Cila Serau me Vaka na Cina e Vuravura

12O koya oqo, vei kemudou ka'u sa dau lomana, me vaka na nomudou talairawarawa e na veigauna sa oti, ka dou sa sega ni ia walega ni'u sa tiko vei kemudou, ia dou sa uasivi cake kina ni'u sa takali, mo dou qai cakacakataka kina na nomudou sa vakabulai e na rere kei na sautaninini;

13ni sai koya na Kalou sa cakacaka tiko e na lomamudou, ka sa vakavuna mo dou vinakata ka kitaka nai naki vinaka ni lomana.

14Me kakua sara na daudidi kei na veileti e na nomudou cakacaka kecega,

15Vrua 32.5mo dou kakua kina ni vunauci rawa, ka tawa cala mo dou luve ni Kalou ka sega ni beitaki me ca e na kedra maliwa nai tabatamata takelo ka lomavakatani, mo dou sa cila e na kedra maliwa me vaka na veicina e vuravura,

16ni dou sa taura tiko na vosa ni bula, me'u reki kina e na siga i Karisito ni'u sa sega ni cici walega se'u daucakacaka walega.

17Ia kevaka ka'u sa sovaraki yani e na nomudou vakabauta ni'u sa cabori mei madrali, au sa reki kina, ka marau vata kei kemudou kecega—

18e na vuku ni ka oqo mo dou reki talega koi kemudou, ka marau vata kei au.

Ko Timoci kei Epafirotaito

19Ia ka'u sa vakanuinui vua na Turaga ko Jisu ni sa voleka na noqu talai Timoci vei kemudou, me'u vakacegui talega, ni'u sa kila na nomudou tiko.

20Ni sa sega e dua sa tiko vei au sa yalovata kaya, me daunanuma na veika me baleti kemudou e na lomana dina.

21Ni ra sa vakasaqara na veika me baleti ira ga ko ira kecega, ka segai na veika me baleti Jisu Karisito.

22Ia dou sa kilai koya ni sa vakatovolei, ni sa vaka na gone vei tamana, sa daucakacaka vata kei au e nai tukutuku-vinaka.

23O koya ka'u sa nakita kina me malua vakalailai ka'u na qai talai koya yani, me'u kila mada se sa na vakaevei koi au.

24Ia ka'u sa vakararavi vua na Turaga ni'u sa voleka talega koi au me'u lako yani.

25Ia ka'u sa vakasama ni sa dodonu me'u talai Epafirotaito mada vei kemudou—na taciqu kei na noqu i caba e na cakacaka, kei na noqu i tokani e nai valu oqo, kei na nomudou i talatala, kei koya sa vukei au e na noqu dravudravua.

26Ni sa gu yani vei kemudou kecega, a sa rarawa na yalona, ni dou a rogoca sa tauvi-mate ko koya.

27E dina ga sa tauvi-mate ka sa voleka ni ciba. Ia ka sa yalovinaka vei koya na Kalou, a sa sega walega vei koya, vei au talega, de vakaikuritaki na noqu rarawa e na dua tale na ka rarawa.

28O koya oqo ka'u sa gumatua cake kina me'u talai koya, mo dou reki kina, ni dou sa raica tale, ka me lailai sobu kina na noqu rarawa.

29O koya mo dou qai vakacegui koya e na Turaga, e na reki levu sara, ka mo dou dokai ira era sa vakakina,

30ni sa voleka ni mate ko koya e na vuku ni cakacaka i Karisito, a sa sega ni taleitaka na nona bula, me vakaikuritaka na nomudou cakacaka vei au sa vo tu.