2 Korinica 2 - Ai Vola Tabu (Vakadewa Makawa Vakavoutaki 2021)（FRV21）

Na Levu ni Loloma i Paula Vei Ira mai Korinica

1Ia ka'u sa lewa vakaoqo e na lomaqu, me'u kakua ni lako tale vei kemudou e na veivakararawataki.

2Io, kevaka ka'u sa vakararawataka na lomamudou, o cei sa vakamarautaki au, o koya duaduaga ka'u sa vakararawataka?

3Ia ka'u a vola vakakina vei kemudou, de vakararawataki na lomaqu, ni'u lako yani, e na vukudra sa dodonu me'u reki kina; ka'u sa vakararavi ga vei kemudou kecega ni sa nomudou kecega na noqu reki.

4Ni sa rarawa vakalevu ka yaluma na lomaqu ni'u a vola vei kemudou, a sa vakawai vakalevu na mataqu; sa segai mo dou rarawa kina, ia mo dou kila ga ni sa levu sara na noqu loloma vei kemudou.

Me Vosoti na Tamata Caka Cala

5Ia kevaka e dua sa ia na veivakararawataki, sa sega ni vakararawataki au walega ko koya, ia e na dua na tikina—me kakua ni vakabibitaki sara vakalevu—ia kivei kemudou kece talega.

6Sa rauti koya sa vakakina na kenai sau oqo, sa yaco vua mai vei ira na lewe vuqa;

7ka sa kilikili cake kina mo dou vosoti koya ka vakaceguya, de luvuci koya sa vakaoqo na nona rarawa levu sara.

8O koya oqo ka'u sa masuti kemudou kina, mo dou vakadinadinataka na nomudou loloma vei koya.

9Ni sa ka talega oqo ka'u a vola yani kina, me'u kilai kemudou kina, se dou sa talairawarawa e na ka kecega, se segai.

10Ia kevaka dou sa vosota e dua e na dua na ka, au sa vosoti koya vaka talega kina koi au. Na veika ka'u sa vosota, kevaka au sa veivosoti e na dua na ka, sa ia ga e na vukumudou e na mata i Karisito,

11me kakua kina ni rawai keda ko Setani, ni da sa sega ni lecava na nona daulawaki.

Na Nuiqawaqawa ni Yalo i Paula mai Tiroa

12 Caka 20.1 Ia ni'u a lako ki Tiroa e na vuku ni tukutuku-vinaka kei Karisito, a sa dolava vei au na katuba na Turaga,

13sa sega ni cegu na yaloqu, ni'u sa sega ni kunei Taito na wekaqu. Au sa qai tatau vei ira ka lako yani ki Masitonia.

Na Qaqa ena Vuku i Karisito

14Me ia na vakavinavinaka vua na Kalou, o koya sa tuberi keitou tikoga e na reki e na yaca i Karisito, ka sa vakatakila vata kei keitou e na yasana kecega nai boi talei ni veikilai kei koya.

15Ni sai Karisito keitou sa boi vinaka kina e na mata ni Kalou, vei ira era sa vakabulai tiko, vei ira talega era sa vakarusai tiko;

16vei ira oqo sa boiboi veivakamatei me ra mate kina, ia vei ira oqori sa boiboi veivakabulai me ra bula kina. Ia ko cei sa rawata na veika oqo?

17Ni keitou sa sega ni dauvakatanitaka na vosa ni Kalou me vakataki ira na lewe vuqa, ia keitou sa vakataki ira era sa dina sara, me vaka sa mai vua na Kalou, e na mata ni Kalou, keitou sa vosa e na yaca i Karisito.