Vosa Vakaibalebale 21 - Ai Vola Tabu (Vakadewa Makawa Vakavoutaki 2021)（FRV21）

1Na lomana na tui sa tiko e na liga i Jiova me vaka na soniwai;

sa vakauta ko koya ki na vanua kece sa yalona kina.

2A sala kece ni tamata sa rairai dodonu ga vua,

ia sa vakadikeva ko Jiova na yalo ni tamata.

3Na caka dodonu kei na lewa dodonu

sa vinaka vei Jiova ka ca nai soro.

4A mata viavia turaga kei na yaloviavialevu—

na nona cina na tamata ca—sai valavala ca.

5A nanuma ni lomana na daucakacaka ena tini ga ki na sautu,

ia na nodra nanuma na tamata kecega sa lomariri ena tini ga ki na dravudravua.

6Na rawata nai yau e na yame lasu

sa ka e sega ni yaga ka veicoriti vei ira era qara na mate.

7A nodra i valavala kaukauwa na tamata ca ena vakarusai ira,

baleta ni ra bese ni cakava na ka e dodonu.

8Sa ka veve ka vakatani na sala ni tamata e cala,

ia ko koya e yalosavasava sa dodonu na nona cakacaka.

9Sa vinaka na tiko e na tutu ni dela ni vale,

ka ca na tiko kei na yalewa dauveileti e na loma ni vale.

10A yalo ni tamata ca sa gu ki na ca,

ka sa sega ni vinakati koya na kai nona.

11Ni sa cudruvi na dauveivakalialiai, sa vuku kina na yalowai;

ia ni sa vakavulici na yalomatua, sa kila-ka kina.

12A tamata yalododonu sa daunanuma na vale ni tamata ca,

ka sa vukica me rusa na tamata ca e na vuku ni nodra ca.

13O koya sa sogota na qara ni daligana ni sa tagi na dravudravua,

ena tagi talega ko koya ka na sega ni rogoci.

14Nai solisoli vuni sa vakamalumalumutaka na cudru;

kei na veivaqumi e ciqomi lo sai vakamalumu ni cudru kaukauwa.

15Sa ka ni reki vua na yalododonu me caka dodonu,

ia na rusa ga ena yacovi ira na daucaka ca.

16A tamata ka lako sese tani mai na sala ni vuku

ena tiko ga e na nodra i soqosoqo na mate.

17O koya ka dauvinakata na marau ena tamata dravudravua;

ko koya sa dauvinakata na waini kei na waiwai ena sega ni vutuniyau.

18Ena kenai voli kei koya na yalododonu na tamata ca,

kei na tamata be ena kenai voli talega kei koya na yalodina.

19Sa vinaka na tiko mai na vanua dravuisiga

ka ca na tiko kaya na yalewa dauveileti ka daucudru.

20Ai yau talei kei na waiwai sa toka e na nona vale na vuku,

ia na tamata lialia sa tiloma sara.

21O koya sa muria nai valavala dodonu kei na loloma,

sa na kunea na bula, kei nai valavala dodonu, kei na vakarokoroko.

22Na tamata vuku sa kaba na nodra koro na qaqa,

ka sa biuta sobu na kena kaukauwa e vakararavi kina.

23O koya sa qarauna na gusuna kei na yamena

sa qarauna na yalona mai na ka rarawa.

24A tamata dauveivakalialiai yalolevu ko “Viavialevu” na yacana,

sa dau cakacaka vakadokadoka.

25A nona gagadre na vucesa sa mate kina ko koya,

ni sa bese ni cakacaka na ligana.

26Sa daukocokoco ko koya e na siga taucoko ka bogi,

ia na tamata yalododonu sa dausoli-ka ka sega ni cegu.

27A nodra i soro na tamata ca sa ka vakasisila;

ka ca vakalevu ni kauta vata mai nai naki ca.

28A dautukutuku lasu ena rusa,

ia na tamata sa vakarorogo tiko ena sega ni mudu na nona i tukutuku.

29A tamata ca sa vaqaqataka na matana,

ia na yalododonu, sa vakarautaka ko koya na nona sala.

30Sa sega na vuku, se na yalomatua,

se na bose me gumatua vei Jiova.

31Na ose sa vakarautaki ki na siga ni valu,

ia sa vu mai vei Jiova na qaqa.