Aisea 62 - Ai Vola Tabu (Vakadewa Makawa Vakavoutaki 2021)（FRV21）

Na Vakadonui kei na Vakabulai i Saioni

1E na vuku i Saioni ka'u na sega ni tiko lo,

e na vuku talega i Jerusalemi ka'u na sega ni vakacegu,

ka me lako mada yani na nona veivakadonui me vaka na ka sa serau,

kei na nona veivakabulai me vaka na cina sa caudre tiko.

2Ia na veimatanitu era na raica na nomu veivakadonui;

kei ira kecega na tui, na nomu lagilagi;

ia ko na vakayacani e na yaca vou,

o koya ena cavuta na gusu i Jiova.

3Ia ko na yaco mei sala vakaiukuuku e na liga i Jiova,

kei nai sala vakatui e na liga ni nomu Kalou.

4Ko na sega ni vakatokai tale, Ko koya sa biu,

kei na nomu vanua ena sega ni vakatokai tale, Na vanua lala;

ia ko na vakatokai ga, Ko koya sa marautaki,

kei na nomu vanua, Ko koya sa Vakawati;

ni sa marautaki iko ko Jiova,

kei na nomu vanua ena vakawatitaki.

5Ni sa vaka e dua na cauravou sa rau veiwatini kei na gone yalewa,

ena veiwatini vakakina kei iko ko ira na luvemu;

ia me vaka sa marautaka na watina na tagane sa qai vakawati,

na marautaki iko vakakina na nomu Kalou.

6Ko iko Jerusalemi,

ka'u sa lesia nai vakatawa

e dela ni nomu bai,

ka ra na sega ni tiko lo e na siga se na bogi.

Koi kemudou sa dauvakananumi Jiova,

dou kakua ni vakacegu,

7kakua talega ni laivi koya me vakacegu,

ka me vakataudeitaki Jerusalemi mada,

ka qisia talega me vakacaucautaki e vuravura.

8Sa bubului ko Jiova

e na ligana i matau kei na ligana kaukauwa:

“Ka'u na sega sara ni solia tale na nomu sila

me kedra na nomu meca,

ia ko ira na kai tani era na sega sara ni gunuva na memu waini,

o koya ko sa oca kina;

9ia ko ira ga era sa kumuna era na kania

ka vakavinavinaka vei Jiova,

kei ira era sa binia era na gunuva

e na noqu lomanibai tabu.”

10Dou curu yani, dou curu yani e na veimatamata-ni-koro,

caramaka na nodra sala na tamata;

vakacerea, vakacerea na salatu,

biuta tani na vatu,

vakaduria na kuila vei ira na tamata.

11 Aisea 40.10; Vtaki 22.12 Raica, ko Jiova sa vakarogoya

ki nai yalayala kei vuravura,

ka vaka, Dou kaya vua na goneyalewa ni Saioni,

“Raica, sa lako mai na nomu i Vakabula;

raica, na kenai sau ena solia sa tiko ga vua,

kei na ka ni nona cakacaka sa tu e matana.”

12A ra na vakatokai ira, Na Matatamata Yalosavasava,

Ko Ira sa Vakabula ko Jiova;

ia ko na vakatokai, Ko Koya sa Vakasaqarai,

Na Koro sa Sega ni Biu.