Isikeli 17 - Ai Vola Tabu (Vakadewa Makawa Vakavoutaki 2021)（FRV21）

Na Ikeli e Rua kei na Vuni Vaini

1A sa yaco vei au na vosa i Jiova, ka vaka:

2Ko iko na luve ni tamata, mo cavuta yani e dua na vosa vakaibalebale, ka tukuna e dua na vosa vakatautauvata ki na vale i Isireli.

3Mo kaya: Sa vosa vakaoqo na Turaga ko Jiova:

E dua na ikeli levu, ka vakatabana lelevu, ka vakatabana balavu,

ka rui ka levu na lawena sa veivolavolai,

sa lako mai ki Lepanoni.

Sa kauta tani na vuso ni dua na taba ni sitari,

4sa cova ko koya na ulu ni tabana lalai;

ka kauta ki na dua na vanua dauveivoli,

ka sa tea ko koya e na dua na koro ni tamata dauveivoli.

5Sa kauta talega eso na sore ni kau ni vanua,

ka tea e na dua na were bulabula;

sa kauta ko koya ki na bati ni wai levu,

ka tea me vaka na vuni wilou.

6A sa tubu, ka yaco me dua na vaini

e dautete yani, ka tubu lekaleka;

sa golevi koya na kena tubucoke,

ia na wakana, sa tu e rukuna.

Ka sa yaco me vaini;

ka vakatabana mai,

ka tubu na tabana lalai.

7Ka sa qai dua tale na ikeli levu,

ka vakatabana lelevu, ka levu na lawena.

Ka raica, na vaini oqo sa vaqara yani

na wakana vua,

ia na tabana sa sala yani vua,

me vakasuasuataka ko koya e na tova ni nona i teitei;

8sa tei e na qele vinaka

e na bati ni wai levu,

me tubu na tabana,

ka vuataka na vuana,

me sa vaini vinaka.

9Mo kaya, Sa vosa vakaoqo na Turaga ko Jiova:

Ena tubu vinaka tiko li?

Ena sega beka ni cavuta na wakana ko koya,

ka cebeta na vuana, me malai?

Ena malai ga na drauna kece e qai tubu,

ia ka sega e na vuku ni kaukauwa levu

se na kedra lewe levu na tamata e rawa kina na kenai cavuivuvu.

10Ia raica, ni sa tei, ena tubu vinaka tiko li?

Ni sa qai liwavi koya na cagi mai na tokalau,

ena sega beka ni malai sara yani,

ka malai ga e na tova ka tubu kina?

11Ia sa yaco vei au na vosa i Jiova, ka vaka,

122Tui 24.15-20; 2Vei 36.10-13“Mo kaya mada ki na matatamata dautalaidredre, Dou sa kila se segai, nai balebale ni ka oqo? Mo tukuna vei ira, Raica, sa lako mai ki Jerusalemi ko tui Papiloni, ka sa tauri koya na kena tui, kei ira na kena turaga, ka kauti ira vata kaya ki Papiloni.

13Ka sa kauta e dua vei ira na kawa ni tui, ka ia na veiyalayalati kaya, ka sa vakabubuluitaki koya (ni sa kauti ira tani talega na qaqa ni vanua),

14me sa matanitu malumalumu mai, me kakua ni vueti cake, ia me sa vakabau ga na nona veiyalayalati me sa dei kina.

15Ia sa vuki tani vua ko koya ni sa talai ira na nona mata ki Ijipita, me ra solia vua na ose ka lewe vuqa talega na tamata. Sa na vakayacori li ko koya? Sa na bula beka ko koya sa cakava na ka vakaoqo? Se me vakacacataka li na veiyalayalati, ka bula ga?

16“Me vaka ni'u sa bula, sa kaya na Turaga ko Jiova, e na yasana dina ga ni tui ka buli koya me tui, ka sa beca na nona bubului, ka sa vakacacana na nona veiyalayalati—ena mate ga ko koya e Papiloni.

17Ena sega talega ni veivuke vua ko Fero, kei na nona mataivalu kaukauwa kei na nona i vavakoso levu, ni ra viri suva, ka tara na vale ni valu, me muduka laivi kina na tamata e lewe vuqa.

18Ni sa beca ko koya na bubului e na nona vakacacataka na veiyalayalati, io, ni sa solia oti na ligana, ka cakava na ka kece oqo, ena sega ni bula ko koya.

19O koya oqo sa kaya kina na Turaga ko Jiova: Me vaka na dina ni noqu bula, ni sa beca ko koya na noqu bubului ko ya, ka sa vakacacataka na noqu veiyalayalati ko ya, ka'u na sauma dina ga vua.

20Ia ka'u na tevuka vua na noqu lawa, ena coriti talega e na noqu i cori, ia ka'u na kauti koya ki Papiloni, ka ia na veilewai kaya mai kea e na vuku ni nona lasu sa lasu kina vei au.

21Ia ko ira kecega era dro vata kaya kei ira kecega na nona mataivalu era na mate e nai seleiwau, ia ko ira sa vo era na dui vakasevi ki na mata ni cagi kecega; ia dou na kila ni sai au ko Jiova ka'u sa cavuta.”

22Sa kaya vakaoqo na Turaga ko Jiova:

“Koi au ka'u na kauta na vuso ni sitari cecere, ka tea;

ka'u na cova mai na ulu ni tabana lalai e dua sa malumalumu,

ia ka'u na tea e na dua na ulunivanua cecere ka rewa-i-cake.

23Ia ka'u na tea e na ulunivanua cecere nei Isireli,

ka na tubu cake na tabana, ka vuataka na vuana,

me sa vu ni sitari vinaka sara.

Ena tiko talega e rukuna na yavusa manumanu vuka kecega;

ka ra na tiko ga e na rurugu ni tabana.

24Ka ra na kila kecega na kau ni vanua

ni sai au ko Jiova.

Ka'u sa vakabalea na vunikau cecere,

ka vakalevulevuya na vunikau lekaleka;

ka vakamalaitaka na kau bulabula,

ka vakabulabulataka na kau malai.

Koi au ko Jiova ka'u sa vosa vakaoqo;

ka'u sa cakava talega.”