Taniela 2 - Ai Vola Tabu (Vakadewa Makawa Vakavoutaki 2021)（FRV21）

Sa Tadra ko Nepukanesa

1Ia e nai karua ni yabaki ni lewa i Nepukanesa sa tadrataka e dua na tadra ko Nepukanesa, a sa kidroa kina na yalona, ia sa sega ni moce rawa.

2Sa qai kaya na tui me ra kacivi mai na daucaka mana, kei ira era dauvakarai mata ni lomalagi, kei ira era daucakaisausau, kei na kai Kalitia, me ra vakatakila vua na tui na nona tadra. Ka ra sa qai mai tu e na mata ni tui.

3Sa qai kaya vei ira ko koya na tui, “Au a tadra e dua na tadra, a sa kidroa kina na yaloqu me'u kila mada na tadra.”

4Era sa qai kaya vua na tui ko ira na kai Kalitia e na vosa vaka-Arameka, “Mo ni bula, na tui, ka sega ni mudu! Mo ni tukuna mai na tadra kivei keitou na nomuni tamata, keitou na qai vakatakila na kenai balebale.”

5Sa qai kaya na tui vei ira na kai Kalitia, “Na ka oqori sa takali vei au: ia kevaka dou na sega ni vakatakila vei au na tadra, kei na kenai balebale, dou na tavai bulabula vakalalai ia na nomudou veivale ena caka mei benubenu.

6Ia kevaka dou na vakatakila na tadra, kei na kenai balebale, dou na rawata mai vei au eso nai solisoli, kei nai yau, ka dou na dokai vakalevu. O koya oqo, dou vakatakila kina vei au na tadra, kei na kenai balebale.”

7Era sa qai vosa tale e nai karua ni gauna, ka kaya, “Mo ni tukuna mai na tadra vei keitou na nomuni tamata, koi kemuni na tui, ia keitou na vakatakila na kenai balebale.”

8Sa qai kaya na tui, “E dina, au sa kila ni dou sa via vakaberabera ga, ni dou sa raica sa takali vei au na ka oqori:

9ia kevaka dou sa sega ni vakatakila vei au na tadra, sa dua bauga na kena lewa vei kemudou. Ni dou sa vakarautaka na vosa lasu ka ca mo dou tukuna vei au, me yacova ni veisau na gauna. O koya oqo, mo dou tukuna kina vei au na tadra, ka'u na qai kila ni dou sa na rawa ni vakatakila vei au na kenai balebale.”

10Era sa kaya tale vei koya na tui ko ira na kai Kalitia, “Sa sega na tamata e vuravura taucoko me na vakatakila rawa na ka oqo vei kemuni na tui, ka sa sega e dua na tui, se na turaga, se dua e lewa, me na taroga na ka vakaoqo vua e dua na daucaka mana, se na dauvakarai mata ni lomalagi, se na kai Kalitia.

11Ia na ka ko ni sa taroga na tui sa dredre, a sa sega e dua e vakatakila rawa vei kemuni na tui, o ira ga na kalou, era sega ni tiko vata kei na tamata.

12E na vuku ni ka oqo sa cudru kina na tui ka ninini vakalevu, ka vakarota me ra vakamatei ko ira kece na tamata vuku e Papiloni.

13A sa tukuni yani na lewa me ra vakamatei na tamata vuku; ka ra la'ki qarai Taniela kei iratou na nona i tokani me ra vakamatei.

Sa Vukei Taniela na Kalou

14Ia ko Taniela sa qai vosa vakavuku vei Erioki na kavetani ni valu ni tui, o koya sa lako yani me vakamatei ira na tamata vuku e Papiloni;

15ka kaya vei Erioki na kavetani ni valu ni tui, “A cava sa vakariri kina na vosa mai vua na tui?” Sa qai vakatakila ko Erioki na ka oqori vei Taniela.

16Ia sa qai curu vua na tui ko Taniela, ka masuti koya me vakaberabera mada vakalailai, ena qai vakatakila vua na tui nai balebale ni tadra.

17Sa qai lako ko Taniela ki na nona vale, ka tukuna na ka oqo vei Enanaia, kei Misaeli, kei Asaraia, na nona i tokani,

18ka me ratou kere yalololoma talega vua na Kalou ni lomalagi e na vuku ni ka vuni oqo; me ratou kakua ni rusa vata ko Taniela kei ira na nona i tokani, kei ira kece na tamata vuku e Papiloni.

19Sa qai vakaraitaki na ka vuni oqo vei Taniela e na raivotu e na bogi. Ka sa vakavinavinaka vua na Kalou ni lomalagi ko Taniela.

20Sa kaya ko Taniela,

“Me vakavinavinakataki tiko ka sega ni mudu na yaca ni Kalou,

ni sa nona ga na vuku kei na kaukauwa.

21Sa vukica ko koya na yabaki kei na gauna,

sa vakasivoi ira na tui, ka sa lesi ira na tui;

sa solia na vuku vei ira na lomavuku,

kei na kila-ka vei ira na yalomatua.

22Sa vakaraitaka ko koya na ka titobu ka vuni tu;

sa kila ko koya na ka sa tiko e na butobuto,

ia na rarama sa tiko ga vua.

23Au sa vakavinavinaka vei kemuni, na Kalou ni noqu qase,

ka vakacaucautaki kemuni,

ni kemuni sa solia vei au na vuku kei na kaukauwa,

ka sa vakatakila vei au oqo na ka keitou a kerea vei kemuni,

ni kemuni sa vakatakila vei keitou na ka sa vakarota na tui.”

Sa Vakatakila ko Taniela nai Balebale ni Tadra

24Ia sa qai lako ko Taniela vei Erioki, o koya ka lesia na tui me vakamatei ira na tamata vuku e Papiloni, ka la'ki kaya vua, “Mo kakua ni vakamatei ira na tamata vuku e Papiloni; mo kauti au mada vua na tui, ia ka'u na vakatakila vua nai balebale ni tadra.”

25Ia sa qai kauti Taniela vakatotolo vua na tui ko Erioki, ka kaya vakaoqo vua, “Au sa kunea e dua na tamata vei ira na bobula ni Juta, o koya sa rawa ni vakatakila vua na tui nai balebale ni tadra.”

26Sa qai kaya na tui vei Taniela, na yacana talega ko Pelitisasari, “Ko sa rawata li mo vakatakila vei au na tadra ka'u a raica, kei na kenai balebale?”

27Sa kaya ko Taniela vei koya na tui, “Na ka vuni ko ni sa taroga na tui, era sa sega ni vakatakila rawa vei kemuni ko ira na tamata vuku, se ko ira na dauvakarai mata ni lomalagi, se ko ira na daucaka mana, se ko ira na dauparofisai vakailasu;

28ia sa dua na Kalou mai lomalagi sa vakaraitaka na ka vuni, ka sa vakatakila rawa vei kemuni na tui ko Nepukanesa na ka ena yaco e na gauna mai muri. A nomuni tadra kei na raivotu ko ni a raica e na nomuni mocemoce, sa vakaoqo:

29A nanuma ni lomamuni kemuni na tui, e na nomuni mocemoce sa baleta na veika ena yaco mai muri, ia ko koya sa vakaraitaka na ka vuni sa vakatakila vei kemuni na ka ena yaco mai.

30Ia sa sega ni vakaraitaki vei au na ka vuni oqo ni ka'u sa vuku cake vei ira kece na tamata bula, ia sa vu ga vua na Kalou me vakaraitaki vei kemuni na tui na kenai balebale ni tadra, ka mo ni kila rawa na tui na nanuma ni lomamuni.

31“Koi kemuni na tui, ko ni a vakararai, ka raica e dua na matakau levu. A matakau levu ko ya, ka uasivi cake na kena serau, sa wavu tu e matamuni; ia na kenai rairai sa ka rerevaki.

32Na uluna na matakau ko ya sa koula dina, na serena kei na ligana sa siliva, a ketena kei na sagana sa parasa,

33a temo ni yavana sa kaukamea, ia sa so na tiki ni yavana e kaukamea, ka so na tikina e tete.

34Kemuni a vakaraica tiko, ka sa kavida mai e dua na vatu ka sega ni ta e na ligana e dua, a sa lauta na yava ni matakau sa kaukamea ka tete, ka vurumemeataka.

35Sa qai vorolaki vata na kaukamea, na tete, na parasa, na siliva, kei na koula, ka sa yaco me tautauvata kei na qa ni sila e na rara ni samu sila e na vula i matua; ka sa dui cagina tani yani, me sega ni kune tale. Ia na vatu ka lauta na matakau, sa tubu me ulunivanua levu, ka roboti vuravura taucoko.

36“Oqo na tadra; ia na kenai balebale keitou na tukuna vua na tui.

37Sai kemuni, na tui, na nodra tui na tui—o koya ka sa solia vua ko koya na Kalou ni lomalagi na matanitu, kei na kaukauwa, kei na qaqa, kei na lagilagi,

38ka sa solia ki na ligamuni na tamata e na vanua kecega era tiko kina, kei na manumanu ni vanua, kei na manumanu vuka, ka sa lesi kemuni mo ni lewai ira kecega—sai kemuni ga na ulu koula oqo.

39Ena qai tubu mai me taravi kemuni e dua tale na matanitu e lailai sobu vei kemuni, ka dua tale na kenai katolu ni matanitu, o koya ka parasa, ka sa na lewai vuravura taucoko.

40Ia nai kava ni matanitu ena kaukauwa ga me vaka na kaukamea, ia na kaukamea sai koya sa vurumemeataka ka butuvoroka na ka kecega. Ka me vaka sa vorolaka na ka kece oqo na kaukamea, sai koya ena vurumemeataka vakakina ka vorolaka.

41Ia ko ni a raica na yavana kei nai qaqalo ni yavana, ni sa tete eso na tikina, ka kaukamea eso na tikina, sa macala kina ena veisei na matanitu ko ya; ia na kaukauwa ni kaukamea ena tu ga kina, ka ni kemuni sa raica na kaukamea ni sa buli vata kei na tete lolobo.

42Ia me vaka sa kaukamea e dua na tiki ni qaqalo ni yavana, ka tete e dua na tikina, sa na vakakina na matanitu ko ya, e dua na tikina ena kaukauwa, ka dua na tikina ena vuru rawarawa.

43Ia ni kemuni sa raica na kaukamea ni sa buli vata kei na tete lolobo, era na duavata vakakina kei na kawa ni tamata wale, ia era na sega ga ni veikabiti, me vaka na kaukamea ni sa sega ni veikabiti rawa kei na tete.

44Ia e na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni vakarusai rawa, ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.

45Ia ni kemuni a raica na vatu ni sa kavida mai na ulunivanua ka sega ni ta e na ligana e dua, ka sa vurumemeataka na kaukamea, na parasa, na tete, na siliva, kei na koula. Sa vakatakila kina vua na tui ko koya na Kalou levu na ka ena yaco mai muri. Ni sa ka dina na tadra, ka macala na kenai balebale.”

Sa Vakalevulevui ko Taniela kei Iratou na Nonai Tokani

46Sa qai cuva vakatoboicu ko Nepukanesa na tui, ka vakarokoroko vei Taniela, ka sa vakarota ko koya me ra vakacabora vua nai madrali kei na ka boi vinaka.

47A sa kaya vei Taniela na tui, “Sa dina ga sa uasivi na nomu Kalou vei ira kece na kalou, ka sa nodra Turaga na tui, ko koya talega ka vakaraitaka na ka vuni, ni ko sa vakaraitaka rawa na ka vuni oqo.”

48Ia sa qai vakalevulevui Taniela ko koya na tui, ka solia vua e vuqa na ka ni loloma levu, a sa lesi koya me lewa na yasana taucoko vaka-Papiloni, ka me liu talega vei ira na turaga ni tamata vuku kecega e Papiloni.

49Sa qai kerekere vua na tui ko Taniela, ka sa lesi ko Setareki, kei Mesake, kei Apeteniko, me ratou vakaitavi e na cakacaka vakamatanitu e na yasana vaka-Papiloni. Ia ko Taniela sa tiko ga e na matamata-ni-koro ni tui.