1Sa yabaki tolusagavulu ko Saula ni sa tekivu na nona lewa. Ia ni sa lewai ira oti na Isireli ka yabaki rua,
2sa qai digitaka ko Saula e le tolu na udolu na Isireli. A sa tiko vata kei Saula e le rua na udolu mai Mikimasi kei na vanua veiulunivanua ko Peceli, ka dua na udolu sa tiko vata kei Jonacani mai Kipea e Penijamini. Ia ko ira na tamata sa vo, sa vakatalai ira lesu ko koya, na tamata yadua ki na nona valelaca.
3A sa mokuta ko Jonacani na nodra i tikotiko vakaivalu na kai Filisitia, o koya ka tiko mai Kipa; a ra sa rogoca ko ira na kai Filisitia. A sa uvuca na davui e na vanua taucoko ko Saula, ka kaya, “Me ra rogoca mada na Iperiu!”
4A ra sa rogoca kecega na Isireli ni sa kainaki sa mokuta ko Saula na nodra i tikotiko vakaivalu na kai Filisitia, ka ni ra sa yaco me ka boi ca talega ko ira na Isireli vei ira na kai Filisitia. A ra sa vakasoqoni vata na tamata me ra muri Saula ki Kilikali.
5A ra sa vakasoqoni ira vata ko ira na kai Filisitia me ra vala kei ira na Isireli, sa tolusagavulu na udolu na qiqi-ni-valu, ka le ono na udolu na tamata sa vodo ose, ka sa vaka na mata ni nuku mai baravi na kedrai wiliwili na tamata. A ra sa lako cake ka la'ki tiko mai Mikimasi, vaka ki na tokalau kei Peci-aveni.
6Ia ni ra sa kila ko ira na Isireli era sa leqa (ni ra sa taqaya ko ira na tamata), era sa qai vunitaki ira ko ira na tamata e na qara lelevu eso, kei na veiqakilo, kei na veivatu lelevu, kei na bulubulu vatu, kei na veikeli.
7Ia ko ira eso na Iperiu, era sa lako ki tai kadua ni Joritani, ki na vanua nei Kata kei Kiliati. Ia ko Saula sa tiko ga mai Kilikali, a ra sa muri koya ka sautaninini ko ira kecega na tamata.
Na Vakacaboisoro Tawa Dodonu nei Saula8 1Samu 10.8 A sa wawa tiko ko koya me bogi vitu, na bogi ka lokuca ko Samuela. Ia sa sega ni lako mai ki Kilikali ko Samuela, ka ra sa tekivu me ra se tani mai vua ko ira na tamata.
9A sa kaya kina ko Saula, “Dou kauta mai vei au e dua nai soro kama kei nai soro ni veivinakati.” A sa vakacabora ko koya nai soro kama.
10Ia ni se qai vakacabora oti ga nai soro kama, sa qai yaco mai ko Samuela. Ka sa la'ki tavaki koya ko Saula me vakacegui koya.
11A sa kaya ko Samuela, “A cava ko sa cakava?” A sa kaya ko Saula, “Me vaka ga ni'u sa raica era sa se tani vei au ko ira na tamata, ka ni ko a sega talega ni lako mai e na gauna sa lokuci, ka ni ra sa soqoni vata vakakina ko ira na kai Filisitia mai Mikimasi,
12au a qai kaya, ‘Era na lako dina mai oqo ka valuti au e Kilikali ko ira na kai Filisitia, ia ka'u se sega ni kerea mada na veivuke i Jiova’; ia ka'u a vakasaurarataki au kina, ka vakacabora nai soro kama.”
13A sa kaya vei Saula ko Samuela, “Ko sa cakava e dua na ka lialia. Ko sa sega ni muria nai vunau i Jiova na nomu Kalou, ka sa vakarota vei iko ko koya. Ke sa vaka ko ya, ke sa vakataudeitaka ko Jiova me sega ni mudu na nomu lewai ira na Isireli.
14Caka 13.22Ia oqo, ena sega ga ni dei na nomu lewa. Sa raica oti ko Jiova e dua na tamata sa yalo vata kaya; ka sa lesi koya ko Jiova me nodra turaga na nona tamata, baleta ni ko sa sega ni muria na ka sa vakarota vei iko ko Jiova.”
15A sa cavu tu ko Samuela ka lako tani mai Kilikali. O ira na kena vo ni tamata era sa muri Saula ka curu ki na mataivalu; era sa lako cake mai Kilikali vaka ki Kipea nei Penijamini.
Vakavakarau ki nai ValuIa ko Saula sa wiliki ira na tamata era sa tiko kaya, era sa le ono beka na drau na tamata.
16A sa tiko mai Kipea nei Penijamini ko Saula, kei Jonacani na luvena, kei ira na tamata era sa tiko vata kei rau; ia era sa tiko mai Mikimasi na kai Filisitia.
17A ra sa lako yani na batikadi era wase vakatolu mai na nodra i tikotiko na kai Filisitia; e dua na mataivalu era sa lako ki na sala vaka ki Ofira, ki na vanua ko Suali;
18a sa lako e dua na mataivalu ki na sala ki Peci-oroni; a sa dua na mataivalu sa lako ki na sala ki nai yalayala sa donuya na buca mai Sepoimi vaka ki na vanua lala.
19A sa sega ni kune e dua na matai ni kaukamea e na nodra vanua taucoko na Isireli, ni ra sa kaya na kai Filisitia, “De ra qai bulia eso na nodra i seleiwau ko ira na Iperiu, se na nodra moto.”
20Ia era sa daulako sobu ga ko ira kece na Isireli vei ira na kai Filisitia me ra vagatara yadua na nona i siviyara, kei na nona vulaono, kei na nona i matau, se na nona isele ni tatamusuki co-vuata.
21A kenai sau e rua nai katolu ni dua na sikeli me baleta nai siviyara kei na vulaono, ka dua nai katolu ni dua na sikeli me baleta na vagatari ni matau kei na moto ni bulumakau.
22Ia e na siga sa ia kina nai valu, sa sega ni kune e dua nai seleiwau se dua na moto vua e dua vei ira na tamata era sa tiko vata kei Saula kei Jonacani; ia sa kune ga vei Saula kei Jonacani na luvena.
23Ia e dua nai tikotiko vakaivalu ni kai Filisitia sa la'ki yadrava voli na sala ka i curucuru ki Mikimasi.
Who We AreWhat We EelieveWhat We Do
2025 by iamachristian.org,Inc All rights reserved.
