1Dou rogoca na ka oqo, na vale i Jekope,
na tamata sa vakatokai e na yaca i Isireli,
ka sa lako mai na mata-ni-wai nei Juta,
ka sa bubului e na yaca i Jiova,
ka sa daucavuta na Kalou ni Isireli,
ka segai e na yalodina se na yalododonu.
2Ni ra sa tukuni ira ni ra lewe ni koro tabu,
ka vakaraviti ira vua na Kalou ni Isireli;
ko Jiova-ni-lewevuqa na yacana.
3“Na veika makawa ka'u a tukuna e na gauna eliu sara;
ka sa lako yani mai na gusuqu ga na ka oqori, ka'u a vakatakila talega;
ka'u a cakava vakasauri, ka sa yaco ga.
4Ni'u a kila ni ko sa yalokaukauwa,
ni sa dali kaukamea na domomu,
ka parasa na yadremu,
5o koya ka'u a tukuna kina vei iko e na gauna eliu sara;
ni sa sega ni yaco, ka'u a vakatakila vei iko;
de ko kaya, ‘A noqu matakau ga sa vakayacora,
ia na noqu matakau ceuceu, kei na noqu matakau sa vakawaicalataki,
ko koya ga sa vakarota me yaco.’
6“Ko sa rogoca oti, ia mo raica mada na ka kece oqo;
ia dou na sega beka ni via tukuna talega?
Ka'u sa qai vakatakila vei iko na ka vou,
io na ka vuni, ko a sega ni kila.
7Sa qai caka edaidai, ka segai eliu;
e na gauna eliu ko a sega ni rogoca;
de ko kaya, ‘Raica, ka'u a kila ga.’
8Io, ko a sega ga ni rogoca, ko a sega ga ni kila,
sa sega talega ni rogo mai liu na daligamu.
Ni'u a kila ko na cakacaka vakailasu sara,
ka ni ko sa vakatokai na dautalaidredre mai na siga ko sucu kina.
9“E na vuku ni yacaqu ka'u na vakaberaberataka na noqu cudru,
kei na vuku ni noqu i rogorogo ka'u na tarovi au ga,
me'u kakua ni muduki iko laivi.
10Raica, ka'u a vakatovolei iko e na buka, ka sa sega ni vaka na siliva;
ka'u a digitaki iko e na kuro qele ni veivakararawataki.
11E na vukuqu, io, e na vukuqu ga, ka'u na cakava,
ni sa vinaka li me vakadukadukalitaki na yacaqu?
Ia na vakarokoroko sa dodonu me ia vei au,
ka'u na sega ni solia vua e dua tale.
12 Aisea 44.6; Vtaki 1.17; 22.13 “Rogoci au mada ko iko Jekope,
ko iko talega Isireli, ka'u a kaciva;
sai au oqo; sai au na kenai tekitekivu;
sai au na kenai cavacava talega.
13Na ligaqu ga ka tauyavutaki vuravura,
ia na ligaqu i matau ka tevuka na lomalagi;
ni'u sa kaciva,
ka sa tu vata mai.
14“Koi kemudou kece dou vakasoqoni vata ga, ka vakarorogo!
Ko cei vei ira era sa vakatakila mai na ka oqori?
Sa lomani koya ko Jiova;
ena cakava ga na nona i naki ki Papiloni,
ia na ligana ena tarai ira na kai Kalitia.
15Koi au, ka'u sa cavuta, ka'u sa kacivi koya;
ka'u sa kauti koya mai;
ena vakayacora na nona cakacaka ko koya.
16Dou toro voleka mai vei au, dou rogoca na ka oqo!
Sa sega ni ka'u vosa vuni mai nai vakatekivu,
ni gauna e tubu kina na ka oqori ka'u sa tiko mai kina.
Ia oqo sa qai talai au mai na Turaga ko Jiova, kei na Yalona.
17Sa kaya vakaoqo ko Jiova,
na nomu i Vakabula, ko Koya na Yalosavasava ni Isireli:
“Koi au ko Jiova na nomu Kalou
ka'u sa vakavulici iko mo vinaka kina,
ka'u sa tuberi iko e na sala mo lakova.
18De ko a vakarorogo ki na noqu i vunau!
Sa na qai vaka na uciwai na nomu vakacegu,
ka vaka na ua ni wasawasa na nomu cakacaka dodonu;
19na nomu kawa sa na vaka na nuku,
kei na luvemu era na vaka na mata ni nuku;
ena sa sega ni muduki se bokoci
na yacana mai na mataqu.”
20 Vtaki 18.4 Dou lako tani e Papiloni, dro tani mai vei ira na kai Kalitia,
e na domo ni marau dou tukuna yani na ka oqo,
dou vakarogoya, vakauta nai rogorogo ki nai yalayala kei vuravura;
dou kaya, “Sa vakabula ko Jiova na nona tamata ko Jekope!”
21Era sa sega ni viagunu ni sa kauti ira voli ko koya e loma ni vanua dravuisiga;
sa vakadavea ko koya na medra wai mai na vatu;
ka sa vida rua na vatu ko koya ka sa tovure mai kina na wai.
22 Aisea 57.21 Sa kaya ko Jiova, “Sa sega na vakacegu vei ira na tamata i valavala ca.”
Who We AreWhat We EelieveWhat We Do
2025 by iamachristian.org,Inc All rights reserved.
