Vunau ni Soro 9 - Ai Vola Tabu (Vakadewa Makawa Vakavoutaki 2021)（FRV21）

Sa Vakacaboisoro ko Eroni

1Ia e na kenai kawalu ni siga, sa kacivi Eroni kei iratou na luvena, kei ira na nodra qase na Isireli, ko Mosese;

2a sa kaya vei Eroni, “Mo kauta e dua na luve ni bulumakau tagane mei soro ni valavala ca, ka dua na sipi tagane mei soro kama, sa sega na kena ca, ka vakacabora e na mata i Jiova.

3Ia mo vosa vei ira na Isireli, ka kaya, ‘Mo ni kauta e dua na me mei soro ni valavala ca, ka dua na luve ni bulumakau, kei na lami, sa yabaki yadua ka sega na kena ca, mei soro kama;

4kei na bulumakau kei na sipi tagane mei madrali ni veivinakati, me cabori e na mata i Jiova, kei nai madrali laukana sa veiwaki vata kei na waiwai, ni na rairai vei kemuni e na siga oqo ko Jiova.’ ”

5A ra sa kauta mai na ka e vakarota ko Mosese ki na mata ni vale ni veitavaki; a ra sa toro voleka nai soqosoqo taucoko, ka tu e na mata i Jiova.

6A sa kaya ko Mosese, “Oqo na ka sa vakarota ko Jiova mo ni cakava, ena qai rairai vei kemuni na serau i Jiova.”

7Ipe 7.27A sa kaya vei Eroni ko Mosese, “Mo toro ki nai cabocabo-ni-soro, ka vakacabora na nomu i soro ni valavala ca, kei na nomu i soro kama, ka sorovaki iko kei ira na tamata; ka vakacabora na nodra i madrali na tamata, ka sorovaki ira, me vaka sa vakarota ko Jiova.”

8A sa la'ki torova nai cabocabo-ni-soro ko Eroni, ka vakamatea na luve ni bulumakau mei soro ni valavala ca, e na vukuna ga.

9A ra sa kauta vua na dra ko iratou na luve i Eroni; a sa tonia ko koya na nona i qaqalo e na dra, ka boroya kina na tutuna sa balavu cake e nai cabocabo-ni-soro; a sa sova yani na dra ki na vu ni cabocabo-ni-soro.

10Ia na uro, kei na ivi, kei nai latikoso sa toka e cake ka toka e ra na yate, mai nai soro ni valavala ca, sa vakama ko koya e na dela ni cabocabo-ni-soro, me vaka sa vakarota vei Mosese ko Jiova.

11Ia na lewena kei na kulina sa vakama ko koya e na bukawaqa e nai bili ni tikotiko.

12A sa vakamatea ko koya nai soro kama; a ratou sa solia vua na dra ko iratou na luve i Eroni, a sa volita ko koya nai cabocabo-ni-soro, ka kureitaka kina na dra.

13A ratou sa solia vua nai soro kama, na tikina yadua, kei na uluna; a sa vakama ko koya e na dela ni cabocabo-ni-soro.

14A sa vuya ko koya na gacagaca kei na yavana, a sa vakama e dela ni soro kama e na dela ni cabocabo-ni-soro.

15A sa qai kauta ko koya na nodra i madrali na tamata, ka taura na me, ko ya na nodra i soro ni valavala ca na tamata, ka vakamatea, a sa vakacabora mei soro ni valavala ca, me vaka na kena eliu.

16A sa kauta nai soro kama, ka cabora me vaka na kenai valavala.

17A sa kauta nai madrali laukana, a sa yakuta vakadua, a sa vakama e dela ni cabocabo-ni-soro, mei kuri ni soro kama vakamataka.

18 Vsoro 3.1-11 A sa vakamatea na bulumakau kei na sipi tagane mei madrali ni veivinakati sa cabori, e na vukudra na tamata. Ia ko iratou na luve i Eroni eratou sa solia vua na dra, ka sa volita ko koya nai cabocabo-ni-soro, ka kureitaka kina na dra.

19Ia na uro ni bulumakau kei na sipi tagane, na buina uro, kei na uro sa ubia na gacagaca, kei na ivi, kei nai latikoso ni yate—

20eratou sa virikotora na uro ki na serena, ka sa vakama ko koya na uro e na dela ni cabocabo-ni-soro,

21ia na seredrau kei na sagadrau i matau sa yalovaka ko Eroni, mei soro yalovaki e na mata i Jiova, me vaka sa vakarota ko Mosese.

22 Tiko 6.22-26 A sa qai dodoka yani na ligana ko Eroni vaka kivei ira na tamata, ka vosavakalougatataki ira, ka sa lako sobu ni sa cabora oti nai soro ni valavala ca, kei nai soro kama, kei nai madrali ni veivinakati.

23A rau sa curu ki na vale ni veitavaki ko Mosese kei Eroni, ka curu tale ki tautuba, ka vosavakalougatataki ira na tamata; a sa rairai vei ira na tamata kecega nai serau i Jiova.

24A sa lako mai na bukawaqa mai na mata i Jiova, a sa kania nai soro kama kei na uro e na dela ni cabocabo-ni-soro; ia ni ra sa raica ko ira na tamata kecega, era sa kaila ka cuva vakatoboicu.