Same 62 - Ai Vola Tabu (Vakadewa Makawa Vakavoutaki 2021)（FRV21）

Lomadei ena Veitaqomaki ni Kalou Vua nai liuliu ni sere: me baleti Jitucuni. A Same i Tevita.

1Sa wawa tikoga na yaloqu vua na Kalou;

vei koya ga ka'u na vakabulai kina.

2O koya ga na noqu uluvatu kei na noqu i vakabula,

na noqu vale cecere ko koya; ka'u na sega ni yavalati vakalevu.

3A cava na kena dede dou nanuma kina na ka ca mo dou vakayacora vua na tamata,

dou na moku koi kemudou kecega,

dou na vaka na bai vatu sa vakalakala tu, kei na bai kau sa yavala toka?

4Era bose ga me ra vakasivoi koya mai na nona ka vakaturaga.

Era marautaka na ka lasu;

era vakavinavinaka e na gusudra,

ia era sa ruru ga e lomadra. Sela

5Na yaloqu, mo wawa tikoga vua na Kalou,

ni sa vu mai vei koya ga na ka ka'u nuitaka tiko.

6O koya duaduaga na noqu uluvatu, kei na noqu i vakabula,

na noqu i drodro cecere ko koya; ka'u na sega ni yavalati.

7Sa vu mai vua na Kalou na noqu bula kei na noqu vakarokoroko;

na noqu uluvatu kaukauwa, kei na noqu i drodro na Kalou.

8Dou vakararavi vua e na veisiga kecega; oi kemudou na tamata;

dou sova yani na lomamudou e matana;

sa noda i drodro na Kalou. Sela

9E dina era sa vaka nai cegu na tamata lolovira,

ka ra sa ka lasulasu na tamata turaga;

kevaka era sa vakarautaki, era sa tautauvata ga;

ni ra ka mamada wale sara mai nai cegu.

10Dou kakua ni vakararavi e nai valavala vakasausa,

ka kakua ni viavialevu e na daubutako;

kevaka sa levu mai nai yau, dou kakua ni daunanuma kina.

11Sa vosa vakadua na Kalou;

io, ka'u sa rogoca vakarua oqo:

ni sa nona ga na Kalou na kaukauwa,

12 Jope 34.11; Jere 17.10; Maciu 16.27; Roma 2.6; Vtaki 2.23 ka sa nomuni talega, na Turaga, na yalololoma.

Ni kemuni sa solia vei ira na tamata yadua

me vaka na nodra i valavala.