Dauveilewai 21 - Ai Vola Tabu (Vakadewa Makawa Vakavoutaki 2021)（FRV21）

Vakabulai ko Ira na Penijamini me ra Kua ni Kawaboko

1Ia sa bubului oti mai Misipa ko ira na Isireli, ka kaya, “Ena sega e dua vei keda me solia na luvena yalewa vei ira na Penijamini me watidra.”

2A ra sa lako mai na tamata ki na vale ni Kalou, ka tiko kina e na mata ni Kalou, ka yakavi mai, a ra sa tagi vakadomoilevu sara,

3ka ra kaya, “I Jiova na Kalou ni Isireli, sa yaco mei cavai na ka oqo e Isireli, me yali e na siga oqo e dua na nodra yavusa na Isireli?”

4Ia sa sou e na mataka ko ira na tamata, ka cakava mai kea e dua nai cabocabo-ni-soro, ka vakacabora eso nai soro kama ka so nai soro ni veivinakati.

5A ra sa kaya na Isireli, “O cei e na yavusa kecega ni Isireli sa sega ni lako cake kei ira nai soqosoqo kivei Jiova?” Ni sa dua na nodra bubului bibi e na vuku i koya sa sega ni lako cake kivei Jiova ki Misipa, ka vaka, “Ena mate vakaidina ko koya.”

6A sa veivutuni ko ira na Isireli e na vukudra na Penijamini na wekadra, ka kaya, “Sa muduki edaidai e dua na yavusa mai Isireli.

7A cava me da kitaka me ra vakawati kina ko ira sa vo, ni da sa bubului oti vei Jiova, ni da na sega ni soli ira na noda goneyalewa me watidra?”

8A ra sa kaya, “O cei vei ira na veiyavusa ni Isireli sa sega ni lako cake vei Jiova ki Misipa?” Ka raica, sa sega e dua sa lako mai Jepesi-kiliati ki nai tikotiko ni sa ia na soqoni vata.

9Ia ni ra sa wili na tamata, sa sega vei ira na kai Jepesi-kiliati sa tiko kina.

10Ia ko ira nai soqosoqo, era sa tala e le tinikarua na udolu na tamata mai vei ira na tamata qaqa, ka vakarota vei ira, ka kaya, “Dou la'ki yaviti ira na kai Jepesi-kiliati e nai seleiwau, ko ira vata kei na yalewa kei na gone.

11Ia na ka oqo mo dou cakava: dou na vakamatea sara na tagane kecega, kei na yalewa kecega sa veiyacovi kei na tagane.”

12A ra sa kunea vei ira na kai Jepesi-kiliati e le va na drau na goneyalewa tabu-tagane, ko ira era se sega ni veiyacovi kei na tagane, ka ra sa kauti ira ki nai tikotiko mai Sailo, mai na vanua ko Kenani.

13Ia sa talatala ko ira nai soqosoqo taucoko vei ira na Penijamini era tiko mai na uluvatu ko Rimoni, ka kacivaka vei ira na sautu.

14A sa lesu tale mai ko ira na Penijamini e na gauna ko ya. A ra sa solia vei ira na yalewa era a vakabula mai vei ira na yalewa ni Jepesi-kiliati, ia sa sega ga ni rauti ira.

15A ra sa veivutuni ko ira na tamata e na vukudra na Penijamini, ni sa musuka sobu na veiyavusa ni Isireli ko Jiova.

16Sa qai kaya ko ira na nodra qase nai soqosoqo, “A cava me da cakava e na vukudra sa vo, me ra vakawati, ka ni sa yali na yalewa vei ira na Penijamini?”

17A ra sa kaya, “Nai votavota i Penijamini me sa nodra tiko era sa dro bula, me kakua ni kawaboko e dua na yavusa mai vei ira na Isireli.

18Ia koi keda, eda sa sega ni solia rawa me watidra na noda goneyalewa.” Ni ra sa bubului oti ko ira na Isireli, ka kaya, “Me ca ko koya sa solia e dua me watina na Penijamini.”

19Era sa qai kaya, “Raica sa dua na soqoni levu vei Jiova mai Sailo e na veiyabaki, mai na yasa i Peceli ki na tokalau, e na batina ki na tokalau ni salatu sa lako cake mai Peceli ki Sikemi, ka vaka ki na ceva ki Lipona.”

20A ra sa vakaroti ira na Penijamini, ka kaya, “Dou la'ki vuni ka wawa koto e loma ni veiloga-ni-vaini;

21ka raica mada se ra sa lako mai ki nai bili na goneyalewa ni Sailo me ra ia na meke, ia dou qai lako mai na veiloga-ni-vaini, ka taura yadua na watina mai vei ira na goneyalewa ni Sailo, ka lako yani ki na nodra vanua na Penijamini.

22Ia ni ra na lako mai na tamadra, se na ganedra, me beitaki kemudou kina vei keimami, keimami na qai kaya vei ira, ‘Dou yalololoma ga vei ira, e na vukuimami, ni keimami a sega ni taura bula e nai valu na yalewa, me watidra yadua, ka ni dou sa sega ni solia na luvemudou vei ira, mo dou cala kina.’ ”

23A ra sa kitaka vakakina ko ira na Penijamini, ka ra kauta me watidra me rauti ira, mai vei ira era sa meke, o ira era a drotaka. A ra sa lesu tale ki na nodra i votavota, ka tara na koro eso, ka tiko kina.

24A ra sa lako tani mai kea ko ira na Isireli e na gauna ko ya, na tamata yadua ki na nona yavusa, kei na nona vuvale, a ra sa lako tani mai kea na tamata yadua ki na nona i votavota.

25 Dvei 17.6 E na gauna ko ya sa sega na tui vei ira na Isireli. Era sa dui kitaka na tamata yadua na ka sa vinakata ko koya.