Vakarua 19 - Ai Vola Tabu (Vakadewa Makawa Vakavoutaki 2021)（FRV21）

Ai Vakaro me Baleta na Veikoro me i Drodro(Tiko mai na Lekutu 35.9-34; Josua 20.1-9)

1 Josua 20.1-9 “Ni sa muduki ira tani ko Jiova na nomuni Kalou na veimatanitu, ko ira sa solia na nodra vanua vei kemuni ko Jiova na nomuni Kalou, ka ko ni sa kedrai sosomi, ka tiko e na nodra veikoro kei na nodra veivale,

2mo ni qai lesia vei kemuni e tolu na koro e na nomuni loma ni vanua sa solia vei kemuni ko Jiova na nomuni Kalou mo ni taukena.

3Mo ni caramaka na sala, ka wasea tolu na veiyasana ni nomuni vanua, sa solia vei kemuni ko Jiova na nomuni Kalou mo ni taukena, me dro kina ko koya yadua sa vakamatea e dua na tamata.

4“Ia oqo nai valavala e na vukuna sa vakamatea e dua ka sa dro kina, me bula. Kevaka e dua na tamata sa vakamatea na kai nona ni sa sega ni nakita ka sega ni cati koya eliu—

5me vaka ni rau lako na tamata kei na kai nona ki veikau me ta kau, a sa laveta na matau e na ligana me taya na kau, ka sa taucu na matau mai na kena dia, ka sa lauta na kai nona ka sa mate kina—me dro ko koya ki na dua na koro oqo, ka me bula kina,

6de vakasavi koya sa ia na veivakamatei ko koya sa nona i tavi me cudruvaka na mate, ni sa katakata tu na lomana, ka vauci koya, ka mokuta-mate ni sa rui balavu na sala, ka dina ga ni sa sega ni dodonu me mate ko koya ni sa sega ni cati koya eliu.

7O koya oqo ka'u sa vakaroti kemuni kina, ka vaka: Mo ni wasea tani e tolu na nomuni koro.

8Ka kevaka sa vakalevutaka na nomuni yalayala ni vanua ko Jiova na nomuni Kalou, me vaka ka bubului kina vei ira na nomuni qase, ka solia vei kemuni na vanua kecega ka yalataka ko koya me solia vei ira na nomuni qase—

9ka kevaka ko ni sa vakabauta ka cakava nai vakaro kecega oqo ka'u sa vakarota vei kemuni edaidai, mo ni lomani Jiova na nomuni Kalou, ka mo lako tikoga e na nona sala—ko ni na qai kuria tale e tolu na nomuni koro mei kuri ni koro tolutolu oqo,

10me kakua kina ni vakadavei na dra sa sega ni cala e na nomuni vanua sa solia vei kemuni ko Jiova na nomuni Kalou mo ni taukena, ka vakavuna mo ni cudruvi e na vuku ni dra.

11“Ia kevaka sa cata na kai nona e dua na tamata, ka namaki koya, ka mokuta-mate, ka sa qai dro ki na dua na koro oqo,

12me ra qai talaki na qase ni nona koro ka kauti koya mai kina, ka soli koya vua sa nona i tavi me cudruvaka na mate, me mate ko koya.

13Me kakua ni lomani koya na matamuni, ia mo ni biuta tani vei ira na Isireli nai sau ni dra sa sega ni cala, me yaco ga kina vei kemuni na ka vinaka.

Nai Yalayala ni Votavota ni Vanua

14 Vrua 27.17 “Mo ni kakua ni kisira nai yalayala ni vanua ni kai nomu, era sa vakatakilakilataka oti ko ira eliu, e na nomuni votavota ko ni na taukena e na vanua sa solia vei kemuni ko Jiova na nomuni Kalou mo ni taukena.

Vakaro e Vauci ira nai Vakadinadina

15 Tiko 35.30; Vrua 17.6; Maciu 18.16; Joni 8.17; 2Kori 13.1; 1Timo 5.19; Ipe 10.28 “Me kakua ni dua bauga na tamata mei vakadinadina ni beitaki e dua e na dua na ka sa sega ni dodonu, se dua nai valavala ca sai valavala ca kina ko koya. Me lewe rua se lewe tolu eratou kila, ena vakadinadinataki kina na cala ni tamata.

16Kevaka sa tu e dua na tamata ka tukutuku vakailasu, ni sa beitaka na tamata tani e na cala,

17me rau tu ruarua na tamata erau veibeitaki e na mata i Jiova, e na matadra na bete kei ira era sa turaga-ni-lewa e na gauna ko ya,

18ia me ra vakatarotaroga vakavinaka ko ira na turaga-ni-lewa. Ia kevaka sa tukutuku vakailasu na tamata, ka sa beitaka vakailasu na wekana,

19ko ni na qai kitaka vua me vaka na ka sa nakita ko koya me kitaka vua na wekana. Ko ni na vakaotia laivi kina na ca mai vei kemuni.

20Ia ko ira na tani, era na rogoca ka ra na rere, ka sega ni kitaka tale na ka ca vakaoqo e na kemuni maliwa.

21Lako 21.23-25; Vsoro 24.19,20; Maciu 5.38Ia mo ni kakua ni lomana e dua; mei sau ni mate na mate, mei sau ni mata na mata, mei sau ni bati na bati, mei sau ni liga na liga, mei sau ni yava na yava.