2 Tui 13 - Ai Vola Tabu (Vakadewa Makawa Vakavoutaki 2021)（FRV21）

Sa Tui Isireli ko Jioaasi

1E na kenai karuasagavulu ka tolu ni yabaki i Joasa na tui Juta, na luve i Easaia, sa buli me tui vei ira na Isireli mai Samaria ko Jioaasi na luve i Jeu, ka sa lewa yabaki tinikavitu.

2A sa daucaka ca ko koya e na mata i Jiova, ka muria nai valavala ca i Jeropoama na luve i Nipati, ko koya ka vakaivalavalacataki ira na Isireli; sa sega ni biuta tani ko koya.

3A sa waqa na cudru i Jiova vei ira na Isireli, a sa soli ira ki na liga i Eseeli na tui Siria, kei na liga i Peni-etati na luve i Eseeli, e na veigauna kecega.

4A sa vakamamasu vei Jiova ko Jioaasi, a sa rogoci koya ko Jiova, ni sa raica sa vakasaurarataki ko ira na Isireli, ni sa vakasaurarataki ira na tui Siria.

5(A sa solia ko Jiova vei ira na Isireli e dua nai vakabula, a ra sa vakabulai kina mai na ligadra na kai Siria; a ra sa tiko mai na nodra veivale laca ko ira na Isireli, me vaka eliu.

6Ia ka ra sa sega ni biuta nai valavala ca ni vale i Jeropoama, ko koya ka vakaivalavalacataki ira na Isireli, ia era sa muria tiko ga; a sa tu talega mai Samaria na kalouyalewa ni veikau.)

7A sa sega ni laiva na tamata vei Jioaasi, e le limasagavulu ga na tamata sa dauvodo ose, ka tini na qiqi-ni-valu, ka le tini na udolu na tamata sa lako e yavadra; ni sa vakarusai ira na tui Siria, ka cakava me ra vaka na kuvu-ni-qele ni ra sa dausamulaki.

8Ia na vo ni cakacaka i Jioaasi, kei na ka kecega sa cakava ko koya, kei na nona kaukauwa, sa sega li ni volai e nai Vola ni Veika sa Caka e na Nodra Gauna na Tui Isireli?

9A sa moce vata kei ira na nona qase ko Jioaasi, a ra sa buluti koya mai Samaria; a sa tui ko Joasa na luvena, me kenai sosomi.

Sa Tui Isireli ko Jioasi

10E na kenai katolusagavulu ka vitu ni yabaki i Joasa na tui Juta, sa tekivu me lewa vei ira na Isireli mai Samaria ko Jioasi na luve i Jioaasi, ka sa lewa yabaki tinikaono.

11A sa daucaka ca ko koya e na mata i Jiova. Sa sega sara ni biuta tani nai valavala ca i Jeropoama na luve i Nipati, ko koya ka vakaivalavalacataki ira na Isireli, ia sa muria tikoga ko koya.

12Ia na kena vo ni cakacaka i Joasa, kei na ka kecega sa cakava ko koya, kei na nona qaqa sa vala kina kei Amasaia na tui Juta, sa sega li ni volai e nai Vola ni Veika sa Caka e na Nodra Gauna na Tui Isireli?

13A sa moce vata kei ira na nona qase ko Joasa; a sa tiko e nona i tikotiko vakaturaga ko Jeropoama; a sa bulu vata ko Joasa kei ira na tui Isireli mai Samaria.

Na Mate nei Ilaisa

14 2Tui 2.12 Ni sa tauvi mate tiko ko Ilaisa e na mate ka qai ciba kina, a sa lako sobu vua ko Joasa na tui Isireli, ka sa tagi e matana, ka sa kaya, “I tamaqu, i tamaqu! Na nodra qiqi-ni-valu na Isireli kei na nodra tamata dauvodo ose!”

15A sa kaya vua ko Ilaisa, “Mo taura e dua na dakai-titi kei na gasau.” A sa taura ko koya na dakai-titi kei na gasau.

16A sa kaya vua na tui Isireli ko koya, “Mo vakadretaka e na ligamuni na dakai-titi”; ka sa vakadretaka kina e na ligana. A sa vakatauca na ligana ko Ilaisa ki na liga ni tui.

17A sa qai kaya ko koya, “Mo dolava nai sogo cicila vaka ki na tokalau”; a sa dolava ko koya. A sa kaya ko Ilaisa, “Mo vana yani”, ka sa vana ko koya. A sa kaya ko koya, “Na gasau ni qaqa i Jiova, na gasau ni qaqa vei ira na kai Siria! Ni ko na mokuti ira na kai Siria mai Efeki ka vakaoti ira sara.”

18A sa kaya ko koya, “Mo taura na gasau”, ka sa taura ko koya. Ka sa kaya ko koya vua na tui Isireli, “Mo mokuta na qele e na gasau oqori.” A sa mokuta vakatolu, ka qai cegu.

19A qai cudru vua ko koya na tamata ni Kalou, ka kaya, “E dodonu mo a mokuta vakalima se vakaono; ni ko na qai mokuti ira kina na kai Siria ka vakaotia sara, ia oqo ko na mokuti ira na kai Siria me vakatolu ga.”

20A sa ciba ko Ilaisa, ka ra sa buluti koya. Era sa daulako voli mai ki na vanua na nodra i lawalawa batikadi na Moapi, ni sa qai tekivu na yabaki.

21Ni a bulu tiko e dua na tamata, era qai raica e dua nai lawalawa batikadi ka ra mani viritaka kina na yagona ki nai bulubulu i Ilaisa; ia ni sa tara na sui i Ilaisa na yago ni tamata, sa bula tale ko koya, ka tucake e na yavana.

Na Veivaluvaluti nei Isireli kei Siria

22A sa vakasaurarataki ira na Isireli ko Eseeli na tui Siria, e na gauna kecega i Jioaasi.

23Ia sa lomani ira ko Jiova, ka sa yalololoma vei ira, ka sa nanumi ira e na vuku ni nona veiyalayalati kei Eparaama, kei Aisake, kei Jekope, ka sega ni via vakarusai ira, ka se bera ni biuti ira tani e matana.

24Ni sa mate ko Eseeli na tui Siria, a sa tui ko Peni-etati na luvena, me kenai sosomi.

25Ia ko Jioasi na luve i Jioaasi sa taura tale mai vei Peni-etati na luve i Eseeli na veikoro ka kovea ko koya mai vei Jioaasi na tamana e nai valu. A sa vakadrukai koya vakatolu ko Joasa ka rawata tale na veikoro nei Isireli.