Same 57 - Ai Vola Tabu (Vakadewa Makawa Vakavoutaki 2021)（FRV21）

Na Masu Vua na Kalou e na Gauna ni Rarawa Vua nai liuliu ni sere: Kakua ni Vakarusa. A Mikitami i Tevita, ni sa drotaki Saula mai na qara vatu.

1Mo ni yalololoma mai vei au, na Kalou, mo ni yalololoma vei au,

ni sa vakararavi vei kemuni na yaloqu;

io, e ruku ni tabamuni ka'u na vakarurugi au kina,

ka me oti mada na ka e veivakararawataki oqo.

2Au na tagi vei koya na Kalou Cecere Sara,

vei koya na Kalou sa cakacaka tiko e na vukuqu.

3Ena talaki mai lomalagi ko koya ka vakabulai au,

mai na nona vosavakacaca ko koya sa via tilomi au. Sela

Ena tala na nona loloma kei na nona dina na Kalou.

4Sa tiko na yaloqu e na kedra maliwa na laione,

au sa koto vata kei ira sa waqa tu na lomadra;

io, kei ira na tamata sa moto ga ka gasau ga na batidra,

ka sai seleiwau gata na yamedra.

5Mo ni cecere, na Kalou, ka me lolovira ko lomalagi.

Me cecere cake na nomuni ukuuku ki vuravura taucoko.

6Era sa birika na lawa me tao kina na yavaqu;

sa roko-lako na yaloqu.

Era sa kelia nai keli e mataqu,

ka ra sa lutu kina ko ira. Sela

7Sa dei na yaloqu, na Kalou,

sa dei na yaloqu.

Au na sere ka vakavinavinaka.

8Mo yadra mai, na noqu i ukuuku!

Drau yadra mai, na soliteri kei na api!

Au na yadra mai ni sa mataka caca tu.

9Au na vakavinavinaka, vei kemuni na Turaga, e na veimataqali;

au na sere vei kemuni e na kedra maliwa na veimatanitu.

10Ni sa yacova na lomalagi na kena levu ni nomuni loloma;

ka sa yacova na o na nomuni dina.

11Mo ni cecere, na Kalou, ka me lolovira ko lomalagi.

Me cecere cake na nomuni ukuuku ki vuravura taucoko.