Same 111 - Ai Vola Tabu (Vakadewa Makawa Vakavoutaki 2021)（FRV21）

Me Vakavinavinakataki na Cakacaka Talei ni Kalou

1Dou ia vei Jiova na vakavinavinaka!

Au na vakavinavinaka vei Jiova e na yaloqu taucoko,

e na kedra maliwa na yalododonu, kei nai soqosoqo lotu.

2A cakacaka i Jiova sa ka levu,

era qara me ra kila ko ira kecega era dau vinakata.

3A ka vakaturaga ka vakaiukuuku na nona cakacaka,

ka sa sega ni mudu na nona yalododonu.

4Sa cakava me nanumi na nona cakacaka mana;

sa daulomasoli ko Jiova ka yaloveivosoti.

5Sa solia na kedra vei ira era sa rerevaki koya;

ena nanuma tikoga na nona veiyalayalati.

6Sa vakatakila oti na kaukauwa ni nona cakacaka vei ira na nona tamata,

ni sa solia vei ira me nodra i votavota na veimatanitu.

7Sa dina ka dodonu na cakacaka ni ligana;

sa vakadinadinataki na nona i vakaro kecega.

8Sa vakataudeitaki me sega ni mudu,

ka sa caka e na yalodina kei na yalododonu.

9Sa vakayacora na bula ko koya vei ira na nona tamata;

sa lesia na nona veiyalayalati me sega ni mudu.

Sa ka savasava ka cecere na yacana.

10 Jope 28.28; Vbale 1.7; 9.10 Na rerevaki Jiova sai tekitekivu ni vuku;

era sa yalomatua kecega ko ira era sa vakayacora na nona vunau.

Io sa sega ni mudu na nona vakavinavinakataki.