Vakatakila 7 - Ai Vola Tabu (Vakadewa Makawa Vakavoutaki 2021)（FRV21）

Na 144,000 na Isireli

1 Jere 49.36; Tani 7.2; Saka 6.5 Ia ni sa oti na veika oqo ka'u a raica na agilosi e le va eratou sa tu e na tutu i vuravura e va, ka taura na cagi e va kei vuravura, me kakua ni liwa ki vuravura na cagi, se ki na wasawasa, se ki na dua na kau.

2Ia ka'u a raica e duatani tale na agilosi sa lako mai na tokalau, a sa tu vua na vatu ni drega nei koya na Kalou bula; a sa kaci e na domo levu ko koya vei iratou na agilosi e le va, o iratou sa soli kina me ratou vakacacani vuravura kei na wasawasa,

3Isi 9.4,6ka kaya, “Tei kakua mada ni vakacacani vuravura, se na wasawasa, se na kau, ka malua me keitou vola mada na yadredra na tamata ni noda Kalou.”

4Au a rogoca na kedrai wiliwili era sa volai, sa le dua na drau ka vasagavulu-ka-va talega na udolu, sa volai vei ira kecega na nodra veiyavusa na luve i Isireli:

5Vei ira na yavusa i Juta sa volai e le tinikarua na udolu,

vei ira na yavusa i Rupeni sa volai e le tinikarua na udolu,

vei ira na yavusa i Kata sa volai e le tinikarua na udolu,

6vei ira na yavusa i Aseri sa volai e le tinikarua na udolu,

vei ira na yavusa i Navitalai sa volai e le tinikarua na udolu,

vei ira na yavusa i Manasa sa volai e le tinikarua na udolu,

7vei ira na yavusa i Simione sa volai e le tinikarua na udolu,

vei ira na yavusa i Livai sa volai e le tinikarua na udolu,

vei ira na yavusa i Isakari sa volai e le tinikarua na udolu,

8vei ira na yavusa i Sevuloni sa volai e le tinikarua na udolu,

vei ira na yavusa i Josefa sa volai e le tinikarua na udolu,

vei ira na yavusa i Penijamini sa volai e le tinikarua na udolu.

Nai Soqosoqo Levu Mai na Veivanua

9Sa oti oqo ka'u sa vakaraica, ka raica, sa dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga, kei na mata ni Lami, era vakaisulu e nai sulu vulavula, ka taura na taba ni niu-sawa e na ligadra;

10a ra sa kaci e na domo levu, ka kaya,

“A vu ni bula na noda Kalou, o koya sa tiko e nai tikotiko-vakaturaga, vua na Lami talega.”

11O ira kecega na agilosi era sa wavu tu ka vakavolivolita nai tikotiko-vakaturaga, kei ira na qase kei na ka bula e le va, ka cuva vakatoboicu e na mata ni tikotiko-vakaturaga, ka vakarokoroko vua na Kalou,

12ka kaya,

“Emeni! Na vakamolimoli, kei nai ukuuku, kei na vuku,

kei na vakavinavinaka, kei na vakarokoroko,

kei na kaukauwa, kei na qaqa,

me nona ga na noda Kalou ka sega ni mudu! Emeni.”

13Sa qai vosa e dua na qase, ka tarogi au, “O cei beka ko ira oqo sa vakaisulu e nai sulu vulavula? Ka ra lako beka mai vei?”

14Tani 12.1; Maciu 24.21; Mari 13.19Au sa qai kaya vua, “Oi kemuni saka, ko ni sa kila.” A sa kaya vei au ko koya, “O ira oqo era sa lako mai na veivakararawataki levu, ia era sa sava nodra i sulu, ka vakavulavulataka e na dra ni Lami.

15“O koya era sa tiko kina e na mata ni tikotiko ni Kalou,

a ra sa qaravi koya e na siga kei na bogi e nona valenilotu,

ia ena tiko vata kei ira ko koya sa tiko e nai tikotiko-vakaturaga.

16 Aisea 49.10 Era na sega tale ni viakana, se viagunu tale;

ena sega ni kati ira na siga,

se dua tale na katakata;

17 Same 23.1; Isi 34.23; Same 23.2; Aisea 49.10; 25.8 ni na vakani ira na Lami sa tiko e na loma ni tikotiko-vakaturaga,

ka na tuberi ira ki nai vurevure ni wai bula,

ia ena tavoya kecega na Kalou na wai ni mata mai na matadra.”