2 Samuela 16 - Ai Vola Tabu (Vakadewa Makawa Vakavoutaki 2021)（FRV21）

Ko Tevita kei Sipa

1 2Samu 9.9,10 Ia ni sa lako sivita vakalailai na ulunivanua ko Tevita, raica, sa mai tavaki koya ko Sipa na tamata i Mefiposeci, kei na le vica na asa sa vakaivodovodo, ka sa kauta voli mai e rua na drau nai buli madrai, kei na dua na drau nai soso vua-ni-vaini, kei na dua na drau na vuanikau e daulaukana e na vula i katakata, kei na dua na tavaya waini.

2A sa kaya vei Sipa na tui, “A cava ko sa kauta mai kina na ka oqo?” A sa kaya ko Sipa, “O ira na asa me ra vodo kina na nona lewe-ni-vuvale na tui, na madrai kei na vuanikau e daulaukana e na vula i katakata me ra kania na cauravou, kei na waini me ra gunuva ko ira sa malumalumu mai na vanua lala.”

32Samu 19.25-27A sa kaya na tui, “Evei na luvena na nomu turaga?” A sa kaya vua na tui ko Sipa, “Raica, sa tiko ga mai Jerusalemi ko koya, ni sa kaya, ‘Ena vakasuka mai vei au edaidai na matanitu i tamaqu ko ira na vale i Isireli.’ ”

4A sa kaya vei Sipa na tui, “Raica, sa nomu na ka kecega ka nei Mefiposeci.” A sa kaya ko Sipa, “Au sa vakarokoroko; me'u kune loloma e matamuni, noqu turaga na tui.”

Sa Rukaki Tevita ko Semeai

5Ia ni sa yaco ki Peurimi ko Tevita na tui, raica, sa lako mai kina e dua na tamata ni vuvale mai na vuvale i Saula, na yacana ko Semeai, na luve i Kira; sa curu yani ka ruru lako ga.

6A sa vakaviriki Tevita e na vatu, kei ira kecega na tamata i Tevita na tui; a ra sa tiko kecega na tamata kei ira kece na tamata qaqa e na ligana i matau kei na ligana i mawi.

7A sa vakarukaka tiko ko Semeai ka kaya, “Mo lako tani! Mo lako tani! O iko na tamata dauveivakamatei! A tamata ni vu-ni-ca o iko!

8Sa sauma vei iko ko Jiova na dra kecega ni vuvale i Saula, o koya ko sa kenai sosomi, ka sa solia ko Jiova na matanitu ki na liga i Apisalome na luvemu. Ka raica, ko sa vauci e na nomu ca, ni ko sa tamata dauveivakamatei ko iko.”

9A sa qai kaya vua na tui ko Apisai na luve i Seruwaia, “A cava me rukaka kina na noqu turaga na tui na koli mate oqo? Me'u lako mada, ka taya cavuka na uluna.”

10Ia sa kaya na tui, “A cava vei kedatou, oi kemudrau na luve i Seruwaia? Kevaka sa ruru tiko vakaoqo ko koya baleta ni sa kaya vua ko Jiova, ‘Mo rukaki Tevita,’ ko cei me na qai kaya, ‘A cava ko sa cakava kina na ka oqo?’ ”

11Sa kaya talega ko Tevita vei Apisai kei ira kecega na nona tamata, “Raica, na luvequ sara mada ga sa qarai au me'u mate; ena qai vakaevei sara na kena levu cake vei koya na Penijamini oqo! Dou laivi koya ga, me ruru tiko, ni sa kaya vua ko Jiova.

12De dua ena qai raica beka na noqu rarawa ko Jiova, ka caka vinaka vei au ko Jiova, e na vuku ni nona ruru edaidai oqo.”

13A sa mani lako tikoga kina e na sala ko Tevita kei ira na nona tamata, ka sa la vakamumuri voli ko Semeai mai na yasa ni ulunivanua ka dua, ka sa ruru lako ga, ka vakavirika e na vatu, ka kaburaka na kuvu-ni-qele.

14Ia na tui, kei ira kecega na tamata era lako vata kaya, era sa qai yaco yani ki na Joritani ka oca vakalevu. Ka sa vakacegu mai kea ko koya.

Nai Vakasala nei Eitofeli

15A sa lako ki Jerusalemi ko Apisalome, kei ira kecega na Isireli, a sa lako vata kaya ko Eitofeli.

16Ia ni sa lako mai vei Apisalome ko Usai na Ariki, a nona i tau ko Tevita, sa kaya vei Apisalome ko Usai, “Me bula balavu na tui, me bula balavu na tui!”

17A sa kaya vei Usai ko Apisalome, “Oqo li na nai vakaraitaki ni nomu yalodina vua na nomu i tau, oi? A cava ko a sega kina ni lako vata kina kei na nomu i tau?”

18Ka sa kaya vei Apisalome ko Usai, “E segai; o koya sa digitaka ko Jiova, kei ira na tamata oqo, kei ira kecega na Isireli, au na totaka koi au, ka'u na tiko talega vata kaya.

19Ia ko cei tale me'u qarava? Sa sega li ni koya na luvena? Me vaka ka'u a qaravi koya na tamamuni, ka'u na vaka talega kina vei kemuni.”

20A sa kaya vei Eitofeli ko Apisalome, “Mo solia mada na nomu i vakasala; se cava me da kitaka?”

21A sa kaya vei Apisalome ko Eitofeli, “Mo curu mada vei iratou na watina lalai na tamamuni, o iratou ka biuta tu mai ko koya me vakatawa na vale, ka ra na rogoca kecega na Isireli ni ko sa velavela vei tamamuni, ena qai vakaukauwataki na ligadra kecega era tiko vata kei kemuni.”

222Samu 12.11,12A sa biriki vei Apisalome e dua na valelaca e dela ni vale-ni-tui; a sa curu ko Apisalome vei iratou na watina lalai na tamana, e matadra kecega na Isireli.

23Ia e na dela ni gauna ko ya, nai vakasala e dausolia ko Eitofeli sa dau vaka ni sa dua sa taroga na vosa ni Kalou; ka sa daurokovi kina na veivakasala kecega i Eitofeli, mai vei rau ruarua ko Tevita kei Apisalome talega.