2 Tui 24 - Ai Vola Tabu (Vakadewa Makawa Vakavoutaki 2021)（FRV21）

Sa Vakamalumalumutaki ko Ira na Juta

1 Jere 25.1-38; Tani 1.1,2 E na nona gauna sa lako cake ko Nepukanesa na tui Papiloni, a sa qali vua ko Jioiakimi ka yabaki tolu. Sa qai vuki ko koya, ka talaidredre vua.

2A sa vakauqeta ko Jiova na veimataivalu ni kai Kalitia, kei na veimataivalu ni kai Siria, kei na veimataivalu na kai Moapi, kei na veimataivalu ni luve i Amoni, a sa talai ira me ra vala kei ira na Juta me vakarusai ira, me vaka na vosa i Jiova, ka vosataka ko koya e na gusudra na nona tamata na parofita.

3Sa dina ga sa vosa i Jiova sa yaco kina oqo vei ira na Juta, me ra kau tani kina mai na matana, e na vuku ni valavala ca i Manasa, me vaka na ka kecega sa kitaka ko koya,

4ka e na vuku talega ni dra tawa cala sa vakadavea ko koya. Ni sa vakasinaiti Jerusalemi e na dra tawa cala, ia na ka oqo sa sega ni via buluta ko Jiova.

5Ia na kena vo ni cakacaka i Jioiakimi, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

6A sa moce vata kei ira na nona qase ko Jioiakimi; a sa lewa ko Jioiakini na luvena, me kenai sosomi.

7A sa sega tale ni lako mai ko koya na tui Ijipita mai na nona vanua; ni sa kauta tani ko tui Papiloni na vanua kecega sa nei tui Ijipita, mai na uciwai ni Ijipita, ka yaco ki na uciwai ko Uferetisi.

Sa Tui Juta ko Jioiakini(2 Veigauna 36.9-10)

8Sa tinikawalu na yabaki i Jioiakini ni sa tekivu me lewa, a sa lewa tiko mai Jerusalemi ka vula tolu. Ia na yaca i tinana ko Niusita, na luve i Elinecani na kai Jerusalemi.

9A sa daucaka ca ko koya e na mata i Jiova, me vaka na ka kecega ka kitaka ko tamana.

Tauri Vakavesu ko Jerusalemi

10E na gauna ko ya era sa lako cake ki Jerusalemi na tamata nei Nepukanesa na tui Papiloni, a sa buku na druadrua ni koro.

11A sa lako mai me kaba na koro ko Nepukanesa na tui Papiloni, a sa buku na druadrua ni koro ko ira na nona tamata.

12Jere 22.24-30; 24.1-10; 29.1,2A sa curu yani vei tui Papiloni ko Jioiakini na tui Juta, o koya kei tinana, kei ira na nona tamata, kei ira na nona tamata turaga, kei ira na nona vakailesilesi ni vale-ni-tui. A sa tauri koya ko tui Papiloni e na kenai kawalu ni yabaki ni nona lewa.

13A sa kauta tani mai kea nai yau kecega mai na vale i Jiova, kei nai yau mai na vale-ni-tui, ka tamusuka nai yaya koula kecega ka cakava ko Solomoni na tui Isireli e na vale i Jiova, me vaka ka kaya ko Jiova.

14A sa kauti ira yani na kai Jerusalemi kecega, kei ira na turaga kecega, kei ira kecega na tamata i valu qaqa, io na bobula e le tini na udolu, kei ira kecega na matai, kei ira na matai ni kaukamea. Sa sega ni vo e dua, ko ira ga na lewe-ni-vanua era sa dravudravua.

15Isi 17.12A sa kauti Jioiakini ki Papiloni; a sa kauti ira vakabobula, na tinana na tui, kei iratou na watina na tui, kei ira na nona vakailesilesi, kei ira ka uasivi e na vanua, mai Jerusalemi ki Papiloni.

16Ia ko ira kecega na tamata i valu qaqa, e le vitu na udolu, kei ira na matai, kei ira na matai ni kaukamea, e le dua na udolu, o ira kecega era kaukauwa me yaga e nai valu, io sa kauti ira vakabobula ki Papiloni ko koya na tui Papiloni.

17Jere 37.1; Isi 17.13A sa lesia ko koya na tui Papiloni na taci tamana, ko Matanaia, me tui me kenai sosomi; a sa vukica na yacana me vakayacani ga ko Setekaia.

Sa Tui Juta ko Setekaia(2 Veigauna 36.11-12; Jeremaia 52.1-3a)

18 Jere 27.1-22; 28.1-17 Sa ruasagavulu ka dua na yabaki i Setekaia ni sa tekivu me lewa, a sa lewa tiko mai Jerusalemi ka yabaki tinikadua. Ia na yaca i tinana ko Emutali, na luve i Jeremaia na kai Lipina.

19A sa daucaka ca ko koya e na mata i Jiova, me vaka na ka kecega ka kitaka ko Jioiakimi.

20Isi 17.15Ia sa yaco kina vei Jerusalemi kei Juta na cudru i Jiova, ka sa biuti ira tani kina e matana. A sa bese ko Setekaia ni qarava tiko na tui Papiloni.