2 Tui 9 - Ai Vola Tabu (Vakadewa Makawa Vakavoutaki 2021)（FRV21）

Sa Buli me Tui Isireli ko Jeu

1A sa kaciva e dua vei ira na luvedra na parofita ko Ilaisa, ka kaya vua, “Mo vauca na tolomu, ka kauta na tavaya waiwai oqo e ligamu, ka lako ki Remoci-kiliati.

2Ia ni ko sa yaco kina, mo qarai Jeu mai kea, o koya na luve i Josefati na luve i Nimesai. Mo curu yani, ka kaya me tucake ko koya e na kedratou maliwa na wekana, ka mo qai kauti koya ki na loma ni loqi.

3Mo qai taura na tavaya waiwai, ka livia ki na uluna, ka kaya, ‘Sa kaya vakaoqo ko Jiova: Au sa lumuti iko mo tui Isireli.’ Mo qai dolava na katuba, ka dro, ka kua tale ni wawa.”

4A sa lako yani ki Remoci-kiliati na cauravou, io na parofita gone.

5Ia ni sa yaco yani ko koya, raica, eratou sa bose tiko ko iratou na kavetani ni mataivalu. A sa kaya ko koya, “E dua tiko na noqu i tukutuku vei iko na kavetani ni mataivalu.” A sa taroga ko Jeu, “Kivei cei beka vei keitou?” A sa kaya ko koya, “Vei iko, kavetani.”

61Tui 19.16A sa tucake ko koya, ka la'ki curu ki vale. A sa livia ko koya na waiwai ki na uluna, ka sa kaya vua, “Sa kaya vakaoqo ko Jiova na nodra Kalou na Isireli: Au sa lumuti iko mo nodra tui na tamata i Jiova, io, mo nodra tui na Isireli.

7Ia ko na mokuta na vuvale i Eapi na nomu turaga, ka me'u cudruvaka vei Jesipeli na kedra dra na noqu tamata na parofita, kei na kedra dra na dauveiqaravi kecega i Jiova.

8Ni na rusa kecega na lewe-ni-vuvale i Eapi, ka'u na muduka vei Eapi na tagane kecega, io, ko koya sa bobula se sereki, e Isireli.

9Ia ka'u na cakava na vale i Eapi me tautauvata kei na vale i Jeropoama na luve i Nipati, ka tautauvata kei na vale i Pasa na luve i Eaija.

101Tui 21.23Ia na koli ena kania na yago i Jesipeli, e na tiki ni vanua mai Jesireli, ka na sega e dua me buluta.” Sa qai dolava na katuba ko koya, ka dro.

11A sa curu yani ko Jeu vei ira na tamata ni nona turaga, ka sa tarogi koya e dua, “Sa vinaka tiko beka na ka taucoko? A cava e lako mai kina vei iko na lialia ko ya?” A sa kaya vei ira ko koya, “Dou sa kila vinaka na mataqali tamata vaka ko ya, kei na ka era dau vakatukuna.”

12A ra sa kaya, “Lasulasu! Mo tukuna mada mai vei keitou!” A sa kaya ko koya, “Sa vosa ga vakaoqo vei au ko koya, ‘Sa kaya vakaoqo ko Jiova: Au sa lumuti iko mo tui Isireli.’ ”

13Era sa qai kusarawa, ka dui taura yadua na nona i sulu, ka tevuka me tiko kina ko koya e cake e nai cabecabe, ka ra sa uvu davui, ka kaya, “Sa tui ko Jeu.”

Sa Vakamatei ko Jorami

14A sa bukiveretaki Jorami ko Jeu, na luve i Josefati na luve i Nimesai. (Ia sa vakatawai Remoci-kiliati tiko ko Jorami, o koya kei ira kecega na Isireli, e na vuku i Eseeli na tui Siria,

15ia sa lesu ko Jorami na tui me la'ki vakabulabula e Jesireli mai na mavoa era vakamavoataki koya kina ko ira na kai Siria, ni sa veivala ko koya kei Eseeli na tui Siria.) A sa kaya kina ko Jeu, “Kevaka sa lomamudou oqo, me kakua ni dro e dua mai na koro me la'ki tukuna nai tukutuku mai Jesireli.”

16A sa qai vodo e na qiqi vakaturaga ko Jeu, ka lako ki Jesireli, ni sa koto mai kina ko Jorami. A sa lako sobu mai me mai sikovi Jorami ko Easaia na tui Juta.

17A sa tucake tu nai vakatawa e na dela ni vale-cecere mai Jesireli, ka sa raica nai vavakoso i Jeu ni sa lako tiko mai, ka sa kaya, “Au sa raica e dua nai vavakoso.” A sa kaya ko Jorami, “Me talai mada e dua na tamata sa dauvodo ose, me tavaki ira, ka me taroga, ‘Sai lakolako vinaka beka?’ ”

18A sa lako kina ko koya sa vodo ose me tavaki koya, ka sa kaya, “Sa taroga vakaoqo na tui, ‘Sai lakolako vinaka beka?’ ” A sa kaya ko Jeu, “A cava me nomu kina na vinaka? Mo vuki ga ka muri au mai e dakuqu.” A sa tukuna nai vakatawa, ka vaka, “Sa yaco vei ira ko koya ka talai, ia sa sega ga ni lesu tale mai.”

19A sa tala e dua tale sa vodo ose, ka sa yaco vei ira, ka kaya, “Sa taroga vakaoqo na tui, ‘Sai lakolako vinaka beka?’ ” A sa kaya ko Jeu, “A cava me nomu kina na vinaka? Mo vuki ga ka muri au mai e dakuqu.”

20A sa tukutuku tale nai vakatawa, ka kaya, “Sa yaco vei ira ko koya, ka sega ga ni lesu tale mai. Ia na vakacicivaki ose mai oqo sa vaka ga na nona dauvakacicivaki ose ko Jeu na makubui Nimesai, ni sa lako vakatotolo sara.”

21A sa kaya ko Jorami, “Dou vakarau.” A ra sa vakarautaka na nona qiqi-ni valu. A rau sa dui lako yani e nona qiqi-ni-valu ko Jorami na tui Isireli, kei Easaia na tui Juta, me rau la'ki tavaki Jeu; a rau sa tavaki koya e na vanua nei Nepoci na kai Jesireli.

22Ia ni sa raici Jeu ko Jorami, sa kaya, “Sai lakolako vinaka beka, Jeu?” A sa kaya ko koya, “A cava mo vinaka kina, ni sa vuqa sara na dautagane i Jesipeli na tinamu, kei na nona i valavala vakatevoro?”

23A sa vuki yani ko Jorami, ka dro, ka kaya vei Easaia, “Sa dua na vere, Easaia!”

24A sa taura na nona dakaititi e ligana ko Jeu, ka vanai Jorami e na maliwa ni tabana, ka sa lauta na utona na gasau, ka basika sara yani, ka sa bale ko koya e loma ni nona qiqi-ni-valu.

25Sa qai kaya ko koya vei Pitika na nona turaga-ni-valu, “Mo laveti koya cake, ka viritaki koya ki na tiki ni vanua nei Nepoci na kai Jesireli; mo nanuma ni sa lewa ko Jiova me yaco vua na ka levu oqo, ni daru a vodo lako vata tiko ka muri Eapi na tamana, ni sa kaya kina vakaoqo ko Jiova:

261Tui 21.19‘Au a kunea vakaidina e na noa na dra i Nepoci, kei na kedratou dra na luvena; ia ka'u na sauma vei iko e na tiki ni vanua oqo, sa kaya ko Jiova.’ Ia oqo, mo laveta cake, ka mo biuti koya ki na tikina ko ya me vaka na vosa i Jiova.”

Na Vakamatei nei Easaia na Tui Juta(2 Veigauna 22.7-9)

27Ia ni sa raica oqo ko Easaia na tui Juta, sa dro ko koya e na sala ki Peci-ekani. A sa cicimuri koya ko Jeu, ka kaya, “Dou vanai koya talega.” A ra sa vanai koya e na qiqi-ni-valu e nai cabecabe ni sala ki Kuri, ko ya sa voleka ki Ipiliami. A sa dro ko koya ki Mekito, ka mate kina.

28A sa kauti koya ki Jerusalemi ko ira na nona tamata e na qiqi-ni-valu, ka buluti koya vata kei ira na nona qase e nona i bulubulu mai na koro i Tevita.

29Ia e na kenai katinikadua ni yabaki i Jorami na luve i Eapi, sa tekivu me lewa mai Juta ko Easaia.

Na Mate Vakadomobula i Jesepeli

30Ni sa lako yani ki Jesireli ko Jeu, a sa rogoca ko Jesipeli. A sa boroya ruarua na matana ko koya, ka vakaiukuukutaka na uluna, ka iro sobu mai na katubaleka e cake.

31Ia ni sa curu mai e na matamata-ni-koro ko Jeu, sa kaya ko Jesepeli, “Sa vinaka li, Simirai, ko iko ka sa vakamatea na nomu turaga?”

32A sa ta cake ko Jeu vaka ki na katubaleka e cake, ka sa kaya, “Ko cei sa totaki au? Ko cei?” A sa irovi koya mai e le rua se le tolu na mata.

33A sa kaya ko koya, “Dou viritaki koya sobu mai.” A ra sa qai viritaki koya sobu. Ka sa sika cake na nona dra ki na bai, ki na ose talega, ka ra sa butubuturaki koya.

34Sa qai curu ki loma ko koya, ka kana ka gunu, ka sa kaya, “Dou la'ki raica na yalewa oqo sa vu ni ca levu, ka buluta, ni sa luve ni tui ko koya.”

35Ia ni ra sa lako me la'ki buluta, era sa kunea walega eso na tikina: na nona qavokavoka, kei na yavana, kei na qeteqete ni ligana.

361Tui 21.23Ni ra sa lesu tale ka tukuna vua, a sa kaya ko koya, “Oqo na vosa i Jiova ka sa cavuta ko koya e na gusu i Ilaijia na kai Tisipa na nona tamata, ni sa kaya: ‘Ena kania na yago i Jesipeli ko ira na koli e na vanua ko Jesireli,

37ia na yago i Jesipeli ena vaka na de-ni-manumanu e na dela ni vanua ko Jesireli, me kakua ni dua me kaya rawa kina, Oqo ko Jesipeli.’ ”