Same 96 - Ai Vola Tabu (Vakadewa Makawa Vakavoutaki 2021)（FRV21）

Me da Seretaka na Kalou na Tui Qaqa(1 Veigauna 16.23-33)

1Dou seretaka vei Jiova na sere vou;

dou sere vei Jiova na vuravura kecega.

2Dou sere vei Jiova, dou vakavinavinaka ki na yacana;

dou tukuna voli e na veisiga kece ni sa dauia na veivakabulai ko koya.

3Dou tukuna na nona lagilagi ki na veimatanitu,

na nona cakacaka mana vei ira na veimataqali kecega.

4Ni sa levu ko Jiova, ka sa dodonu me vakavinavinakataki vakalevu;

me rerevaki vakalevu talega ka vakalailai na kalou kecega.

5Ni ra sa matakau walega na nodra kalou na veimatanitu,

ia ko Jiova ga sa bulia na lomalagi.

6A vakarokoroko kei na ka vakaturaga sa tiko e matana;

a kaukauwa kei na lagilagi sa tiko e nona vale tabu.

7 Same 29.1,2 Dou ia vei Jiova, koi kemudou na veimataqali tamata,

dou ia vei Jiova na vakarokoroko kei na kaukauwa.

8Dou ia vei Jiova na vakarokoroko sa kilikili kei na yacana;

dou kauta mai nai madrali ka curu ki na nona lomanibai.

9Dou lotu vei Jiova e na nona vale tabu sa savasava;

dou rere e matana, na vuravura kecega.

10Dou kaya ki na veimatanitu, “Ko Jiova na tui!

Io, sa vakataudeitaki ko vuravura; ena sega vakadua ni yavalati rawa;

ena lewai ira vakadodonu na lewe ni veivanua ko koya.”

11Me reki ko lomalagi, ka ladelade ko vuravura;

me vadugu na wasawasa kei na ka kecega sa sinai kina.

12Me reki na veiwere, kei na ka kecega sa tiko kina.

Ena qai marau na kau kecega mai na veikau

13e na mata i Jiova; ni sa lako mai ko koya,

ni sa lako mai me lewai vuravura.

Ena lewai vuravura e na yalododonu,

kei na veimatanitu e na nona lomadina.