Jope 19 - Ai Vola Tabu (Vakadewa Makawa Vakavoutaki 2021)（FRV21）

Sa Sauma ko Jope: Au Kila ni Bula Tiko na Noqu i Vakabula

1A sa vosa ko Jope, ka kaya:

2“A cava na kena dede mo dou vakararawataki au tiko kina

ka vorolaki au vakalalai e na vosa?

3Sa vakatini oqo na nomudou vosavakacacataki au;

dou sa sega li ni madualaka na nomudou vakacalai au?

4Ia kevaka e mani dina ni'u sa cala koi au,

sa tiko ga vei au na noqu cala.

5Kevaka e dina ni dou sa vakalevulevui kemudou kivei au

ka beitaka vei au na ka ka'u sa rogo ca kina,

6mo dou kila sara oqo ni sai koya na Kalou sa vakabalei au,

ka sa sogolati au e nona lawa.

7Raica, ka'u sa qolouvaka mai, ‘Nai valavala kaukauwa!’ ia ka'u sa sega ni rogoci;

au sa kaci vakadomoilevu, ia sa sega ni yaco na lewa matau.

8Sa sogolatia na noqu sala ko koya, me dredre kina ni'u lako,

ka sa vakabutobutotaka na noqu gaunisala.

9Sa luvata tani vei au na noqu i ukuuku,

ka sa kauta tani nai sala vakaturaga mai na uluqu.

10Sa basuraki au sobu e na veitikina, ka'u sa yali kina,

ka sa cavuivuvutaka na ka ka'u sa vakararavi kina me vaka na vunikau.

11Sa vakawaqa talega vei au na nona cudru

ka sa okati au me'u vaka e dua vei ira na nona meca.

12Sa lako vata mai ko ira na nona mataivalu,

ka ra caramaka na nodra sala me rawai au,

ka ra sa vakavolivolita vakaivalu na noqu i tikotiko.

13“Sa vakaveiyawakitaki ira na wekaqu vei au,

ka ra sa qai lomavakatani vei au ko ira nai kai noqu.

14Sa ra yali na wekaqu,

ka ra sa guilecavi au ko ira na noqu i tokani.

15Ko ira era tiko e noqu vale era sa guilecavi au;

na noqu vada dauveiqaravi sa okati au me'u vulagi;

au sa vaka na kai tani e matadra.

16Au a kaciva na noqu tamata, ia sa sega ni rogo mai;

sa dodonu me'u vakamasuta e na gusuqu me yalololoma.

17Sa ka tani vua na watiqu na noqu i cegu,

ka ra sa vakasisilataki au ko ira na noqu lewe ni matavuvale.

18Ko ira mada ga na lalai era sa beci au;

ni'u sa vakanamata cake, era sa vosacataki au.

19Sa cati au vakaukauwa ko ira kece nai tokani voleka,

kei ira ka'u sa lomana era sa vuki ka saqati au.

20A suiqu sa kabita na kuliqu kei na lewequ,

ka'u sa dro bula ga e na kuli ni batiqu.

21Dou lomani au mai, dou lomani au mai, koi kemudou na noqu i tokani,

ni sa tarai au na liga ni Kalou!

22A cava dou sa vakacacani au kina me vaka sa cakava na Kalou?

A cava dou sa sega ni yalo vakacegu kina e na vuku ni yagoqu?

23“Isa me bau volai mada na noqu vosa!

Isa me ra bau a toqai mada e na dua nai vola!

24Isa me ceuti e na peni kaukamea kei na uma

ki na vatu me tudei ka tawa mudu!

25Ni'u sa kila sa bula tiko na noqu i Vakabula,

ka na tucake tu ko koya e delai vuravura e na siga mai muri;

26ka gauna sa rusa oti kina na kuli ni yago oqo,

ka'u na qai kunea ga na Kalou e na yago oqo,

27ko koya ka'u na raica dina sara koi au,

ka kunea e na mataqu, ka sega ni dua tani tale.

Sa malumu ga e lomaqu na yaloqu!

28Kevaka mo dou kaya, ‘Me keitou qai vakacacani koya vakacava!’

kei na, ‘Sa kune ni tiko ga vua na vu ni ka kece’;

29dou rerevaka nai seleiwau,

ni sai sau ni cudru nai seleiwau,

ka mo dou kila kina ni sa tiko na veilewai.”