Same 56 - Ai Vola Tabu (Vakadewa Makawa Vakavoutaki 2021)（FRV21）

Ravi Vua na Kalou ena Gauna ni Veivakacacani Vua nai liuliu ni sere: me vaka nai lagalaga ni sere, Na Ruve ena Veioki Yawa Sara. A nei Tevita. A Mikitami, ni ra sa tauri koya na kai Filisitia mai Kaca.

1Mo ni lomani au mai, na Kalou; ni ra sa sagai au vakaca na tamata;

o koya sai valu mai vei au, sa vakararawataki au e na veisiga;

2era sa via tilomi au e na veisiga na noqu meca,

ni ra sa lewe vuqa era veivala kei au.

Oi kemuni sa Cecere Sara,

3a siga ka'u sa rere kina,

ka'u na vakararavi vei kemuni.

4E na vuku ni Kalou ka'u na reki e na nona vosa,

au sa vakararavi tiko vua na Kalou;

au na sega ni rerevaka na ka era cakava rawa vei au na tamata.

5E na veisiga kecega era kauta vakatani na noqu vosa;

a ka kecega era sa nanuma sa ka ga me'u ca kina.

6Era sa soqoni vata, era vunitaki ira,

era vakaraica na noqu i lakolako.

Ni ra lawakitaka tiko na yaloqu,

7me ra dro bula li e na vuku ni nodra caka cala;

e na nomuni cudru, na Kalou, mo ni biuti ira sobu na tamata.

8O ni sa wilika na noqu veiseyaki;

ka vakatawana na wai-ni-mataqu ki na nomuni tavaya.

Sa sega beka ni volai oti e na nomuni vola?

9Ni'u sa tagi vei kemuni

era na qai dro tani na noqu meca.

Ka'u sa kila oqo, ni sa totaki au na Kalou.

10E na vuku ni Kalou ka'u na reki e na nona vosa,

e na vuku i Jiova ka'u na reki e na nona vosa,

11au sa vakararavi ga vua na Kalou;

au na sega ni rerevaka na ka era na cakava rawa vei au na tamata.

12Sa vauci au na noqu bubului vei kemuni na noqu Kalou;

me'u vakavinavinaka vei kemuni.

13Ko ni sa vakabula oti na yaloqu mai na mate,

kei na yavaqu talega, me kakua ni tarabe,

me'u lako voli kina e na mata ni Kalou

e na rarama ni bula.