Lako Yani 37 - Ai Vola Tabu (Vakadewa Makawa Vakavoutaki 2021)（FRV21）

Na Kato ni Veiyalayalati(Lako Yani 25.10-22)

1A sa cakava na kato e na kau sitimi ko Pisalieli. E rua veimama na kiupiti na kena balavu, ka dua veimama na kiupiti na kena raraba, ka dua veimama na kiupiti na kena cecere.

2A sa botana ko koya e na koula dina e loma, e taudaku talega, a sa cakava kina e dua na batina koula me volita.

3A sa vakawaicalataka na koula ka cakava kina e va na kena mama, ki na tutuna vava; ia e rua na mama e na yasana e dua, ka rua na mama e na yasana kadua.

4A sa cakava eso nai vua e na kau sitimi, ka botana e na koula.

5A sa daramaka ko koya nai vua ki na mama e na yasa ni kato ruarua, me colati kina na kato.

6A sa cakava ko koya e dua nai cabocabo-ni-bulubulu e na koula dina. E rua veimama na kiupiti na kena balavu, ka dua veimama na kiupiti na kena raraba.

7A sa cakava ko koya e rua na jerupi koula sa lautuki, me tu e na kubu ruarua ni cabocabo-ni-bulubulu;

8e dua na jerupi e na kubu e dua, ka dua na jerupi e na kubu kadua. Ia na uma taucoko me caka kina nai cabocabo-ni-bulubulu kei na jerupi ruarua, e na muana ruarua.

9A rau sa vakatetaba ki cake na jerupi, ka ubia na cabocabo-ni-bulubulu e na tabadrau, a sa veiqaravi tu na matadrau; sa qarava talega na cabocabo-ni-bulubulu na matadrau na jerupi.

Na Tepeli ni Madrai e Cabori Vua na Kalou(Lako Yani 25.23-30)

10A sa cakava ko koya na tepeli e na kau sitimi. E rua na kiupiti na kena balavu, ka dua na kiupiti na kena raraba, ka dua veimama na kiupiti na kena cecere.

11A sa botana e na koula dina, a sa cakava kina e dua na batina koula e cake me volita.

12Sa cakava talega nai botani, e dua na raba ni liga na kena raraba me volita; a sa cakava e dua na batina koula ki nai botani me volita.

13A sa vakawaicalataka na koula me caka kina e va na kena mama, ka vakota na mama ki na tutuna vava sa tu e na yavana vava.

14Era sa donuya nai botani na mama, mei daradara ni vua, me colati kina na tepeli.

15A sa cakava ko koya nai vua e na kau sitimi, ka botana e na koula, me colati kina na tepeli.

16A sa cakava nai yaya sa tu e dela ni tepeli, a kena dari, kei na kenai taki, kei na kena sedre, kei na kena bilo, me livilivi kina, e na koula dina.

Na Vakarautaki ni Tutu ni Cina(Lako Yani 25.31-40)

17A sa cakava ko koya nai tutu-ni-cina e na koula dina sa lautuki. Na tolona, kei na tabana, na kena bilo lalai, na kenai ukuuku mokimokiti, kei na kena senikau, sa caka vakakina.

18Ka sa ono na tabana sa tete mai na yasana ruarua; e tolu na taba ni tutu-ni-cina sa tete mai na yasana e dua, ka tolu na taba ni tutu-ni-cina mai na yasana kadua;

19e tolu na bilo sa vaka na se ni amodi, e dua nai ukuuku mokimokiti, ka dua na senikau, e na tabana e dua; ka tolu na bilo sa vaka na se ni amodi, e dua nai ukuuku mokimokiti, ka dua na senikau, e na tabana kadua—sa vakakina e na tabana onoono sa tete mai nai tutu-ni-cina.

20Ia e nai tutu-ni-cina sa va na bilo sa vaka na se ni amodi, na kenai ukuuku mokimokiti, kei na kena senikau.

21Ia sa dua nai ukuuku mokimokiti e ruku ni tabana e rua, ka dua nai ukuuku mokimokiti e ruku ni tabana e rua, ka dua nai ukuuku mokimokiti e ruku ni tabana e rua, me rauta na tabana onoono sa tete mai kina.

22Sa tautauvata ga na kedrai ukuuku mokimokiti kei na tabadra. O koya taucoko sa dua bauga na uma koula dina sa lautuki.

23A sa cakava ko koya na kena cina e vitu, kei na kenai koti-ni-cina, kei na kena dari ni de-ni-cina, e na koula dina.

24Sa cakava e na dua na taledi koula dina, kei na kenai yaya kecega.

Nai Cabocabo ni Ka Boi Vinaka(Lako Yani 30.1-5)

25A sa cakava ko koya nai cabocabo ni ka boi vinaka me vakamai e na kau sitimi. E dua na kiupiti na kena balavu, ka dua na kiupiti na kena raraba; sa takiveilevu e na yasana vava, a sa rua na kiupiti na kena cecere; me dua ga na kena kau kei na tutuna sa balavu cake.

26A sa botana ko koya e na koula dina, a delana, kei na veiyasana sa volita, kei na tutuna sa balavu cake. A sa cakava kina e dua na batina koula me volita.

27A sa cakava kina na mama e rua e ruku ni batina, e na tutuna ruarua, e na yasana ruarua, ka me daramaki kina nai vua me colati kina.

28A sa cakava nai vua e na kau sitimi, ka botana e na koula.

Na Waiwai Tabu ni Veilumuti(Lako Yani 30.1-5)

29 Lako 30.22-38 A sa cakava ko koya na waiwai tabu mei lumu, kei na ka boi vinaka sara me vakamai e na kau boi vinaka, me vaka sa daucakaisaluaki na kena matai.