Aisea 51 - Ai Vola Tabu (Vakadewa Makawa Vakavoutaki 2021)（FRV21）

Na Vosa ni Veivakacegui vei Jerusalemi

1“Dou rogoci au, koi kemudou sa muria na yalododonu,

ka sa qaravi Jiova.

Dou vakaraica na vatu dou a ta mai kina,

kei na qara ni keli dou a keli mai kina.

2Dou vakaraici Eparaama na tamamudou,

kei Sera ka vakasucumi kemudou;

sa lewe dua ga ni'u a kacivi koya,

ka'u a vakalougatataki koya ka vakalewevuqataki koya.

3Ni na vakacegui Saioni ko Jiova;

ena vakaceguya na nona veiyasana lala;

ena cakava na nona vanua lala me tautauvata kei Iteni,

kei na nona vanua dravuisiga me tautauvata kei na were i Jiova;

ena kune mai kina na reki kei na marau,

na vakavinavinaka kei na domo ni sere.

4“Dou vakarorogo vei au, na noqu tamata;

ka vakatu daligamudou vei au, na noqu matanitu;

ni na lako yani mai vei au na vunau,

ia na noqu lewa ka'u na vakataudeitaka

me nodra rarama na veimataqali.

5Sa voleka na noqu lewa dodonu,

sa lako yani na veivakabulai ka'u sa cakava,

ia na ligaqu ena lewai ira na veimataqali;

era na waraki au na veiyanuyanu,

ka ra na vakararavi ki na ligaqu.

6Tacake mada ki lomalagi,

ka vakaraici vuravura e rukuna;

ni na seavu yani na lomalagi me vaka na kubou,

ka madra mai na vuravura me vaka nai sulu,

ka ra na mate vakakina na lewena.

Ia na bula sa mai vei au ena sega ni mudu,

kei na noqu yalododonu ena sega ni takali.

7“Dou vakarorogo vei au, koi kemudou sa kila na yalododonu,

na tamata sa tiko e lomamudou na noqu vunau;

kakua ni dou rerevaka na nodra vosa ca na tamata,

ia ni ra ia na veivakalialiai, kakua ni dou yalolailai kina.

8Ena kani ira na sarasara, me vaka era kania nai sulu,

ka na kani ira na yavato me vaka era kania na vutika ni sipi;

ia na noqu yalododonu ena sega ni mudu

kei na bula sa mai vei au ena ia tikoga e na veitabatamata kecega.”

9Mo ni yadra, mo ni yadra, mo ni vakaisulu e na kaukauwa,

koi kemuni na liga i Jiova!

Mo ni yadra, me vaka e na gauna eliu,

e nai tabatamata makawa!

Sai kemuni, se segai, ka tamusuki Reavi,

ka vuetaka na gata levu?

10Sai kemuni, se segai, ka vakadiva na wasawasa,

na wai ni wasa levu?

Ka cakava na dreke ni wai titobu me nodra sala

me lako yani kina ko ira era vakabulai?

11Ia ko ira sa vakabula ko Jiova era na lesu mai,

ka tadu mai ki Saioni ka sere tiko;

ia na reki sa sega ni mudu ena vakotori e uludra;

ena nodra na reki kei na marau,

ia na rarawa kei na tagi ena dro tani yani.

12“Koi au, io koi au, ka'u sa vakacegui kemudou;

ko cei ko iko, mo rerevaka na tamata ena mate,

kei na luve ni tamata ena vukici me co?

13Ko sa guilecavi Jiova, o koya ka buli iko,

o koya ka tevuka yani na lomalagi,

ka tauyavutaki vuravura.

Ko sa rere tikoga e na veisiga,

e na vuku ni nona cudru na dauveivakasaurarataki,

o koya sa vakarau me ia na veivakarusai.

Ia sa evei na nona cudru na dauveivakasaurarataki?

14Sa vakusakusa na bobula me sereki,

ia ena sega ni mate e nai keli,

na kena kakana talega ena sega ni yali.

15Ni sai au ko Jiova na nomu Kalou,

ka vakamaravutaka na wasawasa ni sa vadugu na kena biau—

ko Jiova-ni-lewevuqa na yacana.

16Ia ka'u sa vakacuruma na noqu vosa ki na gusumu,

ia ka'u sa ubi iko e na yaloyalo ni ligaqu,

me'u tea na lomalagi,

ka tauyavutaki vuravura,

ka kaya vei ira mai Saioni, ‘Koi kemudou na noqu tamata.’ ”

Nai Cavacava ni Vakararawataki i Jerusalemi

17 Vtaki 14.10; 16.19 Mo yadra, mo yadra mai!

Tucake, Jerusalemi,

ko sa gunuva mai na liga i Jiova

na bilo ni nona cudru katakata,

ko sa gunuva na kena soko

e na bilo e dauveivakamatenitaki, ka lobaka.

18Sa sega e dua vei ira kecega na luvena sa vakasucuma

me sa tuberi koya;

sa sega e dua vei ira kecega na luvena ka susuga,

me sa taura na ligana.

19A ka ruarua oqo sa yacovi iko

—ko cei ena lolosi vata kei iko?—

na veivakalalataki kei na rusa, na viakana kei nai seleiwau—

ko cei ena vakacegui iko?

20Era sa mata-buto ko ira na luvemu;

era sa koto e na mua ni saqata ni koro kecega

me vaka na dia sa coko e nai cori;

sa ka levu sara na nona cudruvi ira ko Jiova,

na veivunauci mai vua na nomu Kalou.

21Ia mo rogoca mada na ka oqo, ko iko sa rarawa,

ko iko sa mateni, ka segai e na waini:

22Sa kaya vakaoqo na nomu Turaga ko Jiova,

na nomu Kalou o koya sa totaki ira na nona tamata,

“Raica, ka'u sa kauta tani mai na ligamu na bilo e dauveivakamatenitaki;

io na kena soko e na bilo ni noqu cudru katakata;

ko na sega ni gunuva tale.

23Ka'u na solia ga ki na ligadra era sa vakararawataki iko,

ko ira era sa kaya ki na yalomu,

‘Mo koto sobu me keitou lako-butuki kemudou;’

ia ko sa vakatautauvatataka na dakumu kei na qele,

ka vaka na sala, vei ira era lakovi kemudou.”