Osea 14 - Ai Vola Tabu (Vakadewa Makawa Vakavoutaki 2021)（FRV21）

Na Vakamamasu i Osea vei Isireli me Veivutuni

1Ko iko na Isireli, mo lesu mada vei Jiova na nomu Kalou;

ni ko sa bale e na nomu caka cala.

2Vakarautaka mada na nomu vosa,

ka lesu vei Jiova;

ka kaya vua,

“Mo ni kauta tani kece na neitou caka cala;

ka mo ni yalovinaka mai vei keitou,

ka keitou na qai cabora

nai madrali ni tebenigusu i keitou.

3Ena sega ni vakabulai keitou ko Asiria;

keitou na sega ni vodo ose;

keitou na sega tale ni kaya, ‘Na neitou Kalou,’

ki na cakacaka ni liga i keitou.

Sa daukune loloma ga vei kemuni na luveniyali.”

Na Veivakataudeitaki ni Veivosoti

4Au na vakabulai ira mai na nodra dauveivukiyaki;

ka'u na lomani ira ga,

ni sa vuki tani mai vei ira na noqu cudru.

5Au na vaka na tegu vei Isireli;

ena tubu ko koya me vaka na viavia,

ka ti na wakana me vaka na veivunikau ni Lepanoni.

6Ena tete yani na kena tubucoke;

ena vaka na vu ni olive na kena rairai vinaka,

ia na kena boi vinaka ena vakataki Lepanoni.

7Era na lesu mai ka vakarurugi e na kequ i yaloyalo,

ka ra na bula tale me vaka na sila;

era na tubu bulabula me vaka na vaini,

na kedrai rogorogo ena vaka na waini ni Lepanoni.

8I Ifereimi, me ka ni cavai tale vei au na matakau?

Koi au ga ka'u sa rogoca ka sa vakaraici iko.

Au sa vaka na vu ni damanu bulabula;

na vuamu sa lako ga mai vei au.

9O cei sa vuku, me na vakasamataka vinaka na veika oqo;

ko ira sa yalomatua era sa kila rawa.

Ni sa dodonu na sala i Jiova,

ka ra sa daumuri na yalododonu,

ia ko ira na talaidredre era na bale ga kina.