1A sa buku matua na druadrua ki Jeriko ko ira na Isireli; sa sega e curu yani, ka sega e curu mai.
2A sa kaya vei Josua ko Jiova, “Raica, au sa soli Jeriko ki na ligamu, kei na kena tui, kei na kena tamata i valu qaqa.
3Ia mo ni vakavolivolita na koro, koi kemuni kece na tamata i valu, mo ni lako volita vakadua; ka mo ni kitaka vakakina ka bogi ono.
4Ia me ratou kauta na davui vakajiupili e vitu ko iratou na bete e le vitu, ka me ra liutaka na kato. Ia e na kenai kavitu ni siga ni dou na volita vakavitu na koro, ia eratou na uvuca lako na davui ko iratou na bete.
5Ia ni ratou sa uvuca vakadede na davui vakajiupili, ka kemuni sa rogoca na domo ni davui, era na qai kaila e na kaila vakadomoilevu na tamata kecega, ia ena qai bale sobu na bai ni koro, ka ra na lako cake na tamata yadua e na tikina sa dui donui koya.”
6A sa kacivi iratou na bete ko Josua na luve i Nuni, ka kaya vei iratou, “Dou laveta cake na kato ni veiyalayalati, ia me le vitu na bete me ratou kauta na davui vakajiupili e vitu, ka me ratou liutaka na kato i Jiova.”
7Sa kaya talega ko koya vei ira na tamata, “Ni lako yani ka volita na koro, ka me liutaka na kato i Jiova ko ira sa vakaiyaragi.”
8Ia ni sa vosa oti vei ira na tamata ko Josua, sa qai lako yani ko iratou na bete le vitu ka kauta na davui vakajiupili e vitu me ra liutaki Jiova, a ratou uvuca na davui; ka sa muri iratou na kato ni veiyalayalati i Jiova.
9Ia ko ira sa vakaiyaragi, era liutaki iratou na bete sa uvuca na davui, a sa muria na kato ko ira nai vavakoso, ka sa lako tiko na bete ka uvuca na davui.
10Ia sa vakaroti ira na tamata ko Josua, ka kaya, “Ni kakua ni kaila se me rogo na domomuni, ia me kakua na vosa me lako mai na gusumuni, ka me yaco mada na siga ka'u na kaya kina vei kemuni mo ni kaila. Ka mo ni qai kaila.”
11A sa kau yani me volita na koro vakadua na kato i Jiova; ka ra lako tale mai ki nai tikotiko, ka moce kina.
12A sa sou ko Josua e na mataka, a ratou laveta cake na kato i Jiova ko iratou na bete.
13Ia na bete e le vitu eratou kauta na davui vakajiupili e vitu, ka liutaka na kato i Jiova, ka uvuca lako na davui. Ia ka sa liutaki iratou ko ira sa vakaiyaragi, ka sa muria na kato i Jiova ko ira nai vavakoso, ni sa lako tiko ko iratou na bete ka uvuca na davui.
14A ra sa la'ki volita tale vakadua na koro e na kenai karua ni siga, a ra lesu tale ki nai tikotiko. Era kitaka vakakina ka ono na siga.
15Ia e na kenai kavitu ni siga era sa sou e na mataka caca, ka vakavolivolita vakavitu na koro me vaka era daukitaka, ia e na siga ga oqori era vakavolivolita vakavitu na koro.
16Ia e na kenai kavitu ni lakolako, ni sa uvuca tiko na davui ko iratou na bete, sa qai kaya ko Josua kivei ira na tamata, “Ni kaila! Ni sa solia vei kemuni na koro ko Jiova.
17Ia ena lesi me vakarusai e na vuku i Jiova na koro, kei na ka kecega sa tiko kina; ko Reapi duaduaga na yalewa dautagane e na bula, o koya kei ira kece sa tiko kaya e vale, ni sa vunia ko koya nai talaki eda a tala yani.
18Ia koi kemuni, mo ni tarovi kemuni mai na ka sa lesi me vakarusai, de ko ni vakarusai kemuni, ni kemuni sa tara na ka sa lesi me vakarusai, ka vakavuna talega na rusa ki nai tikotiko nei Isireli ka vakararawataka.
19Ia na siliva kecega, kei na koula, kei nai yaya parasa kei na kaukamea, sa tabu me nei Jiova; ena kau mai ki na kato-ni-yau i Jiova.”
20Ipe 11.30A ra sa kaila na tamata, ka sa uvu na davui. Ia ni ra sa rogoca na domo ni davui na tamata, sa ra qai kaila e na kaila vakadomoilevu na tamata, a sa bale sara na bai, ka ra lako cake na tamata ki na koro, ko ira na tamata yadua e na tikina sa dui donui koya, ka ra sa rawa na koro.
21A ra sa vakarusa e nai seleiwau na ka kece sa tiko e na koro, na tagane kei na yalewa, na cauravou kei na qase, kei na bulumakau, kei na sipi, kei na asa.
22Ia sa kaya ko Josua vei rau na tamata yamata vuni ka rau a rai vanua, “Drau curu ki na nona vale na yalewa dautagane, ka kauta mai kina ki tautuba na yalewa kei na nona ka kecega, me vaka drau a bubului kina vua.”
23Koi rau na cauravou yamata vuni ka la'ki rai vanua erau sa qai curu, ka kauti Reapi mai ki tautuba, kei na tamana, kei na tinana, kei iratou na ganena, kei na nona ka kecega—a rau sa kauta mai ki tautuba na wekana kecega—ka vakatikori ira e nai bili ni nodra i tikotiko na Isireli.
24Ka ra sa vakama na koro e na bukawaqa, kei na ka kecega sa tu kina. Ia na siliva, kei na koula, kei nai yaya parasa kei na kaukamea, era biuta ki na kato-ni-yau e na vale i Jiova.
25Ipe 11.31Ia sa vakabulai Reapi na dautagane ko Josua, kei na lewe-ni-vuvale nei tamana, kei na nona ka kecega, ka sa tiko ko koya e na kedra maliwa na Isireli ka yacova na siga oqo, ni sa vunia ko koya nai talaki e le rua ka tala ko Josua me yamata ki Jeriko.
26 1Tui 16.34 A sa bubului ko Josua e na siga ko ya, ka kaya,
“Ena cudruvi mai vei Jiova na tamata sa tovolea
me na tara na koro oqo—ko Jeriko!
Ena mate na nona ulumatua
ni sa tauyavutaka na kena yavu,
ka na mate na luvena tagane sa gone duadua
ni sa vakatura cake na kenai sogo ni matamata-ni-koro!”
27A sa tiko vata kei Josua ko Jiova, ka sa kuruseta na vanua taucoko na kenai rogorogo.
Who We AreWhat We EelieveWhat We Do
2025 by iamachristian.org,Inc All rights reserved.
