Vakatakila 14 - Ai Vola Tabu (Vakadewa Makawa Vakavoutaki 2021)（FRV21）

Na Lami kei Ira na Nona Tamata

1 Isi 9.4; Vtaki 7.3 Ia ka'u a vakaraica, ka raica, e dua na Lami sa tu e na Ulunivanua ko Saioni, a sa tu vata kaya e le dua na drau ka vasagavulu ka va na udolu, sa volai e na yadredra na yacana kei na yaca i Tamana.

2Ia ka'u a rogoca e dua na domo mai lomalagi, e vaka na domo ni wai e vuqa, ia sa vaka na domo ni kurukuru levu. Au a rogoca talega na domodra era qiria na nodra api,

3ka ra sa meketaka na meke vou e na mata ni tikotiko-vakaturaga, kei na matadratou na ka bula e va, kei na matadra na qase. A sa sega e dua sa kila rawa na meke ko ya, o ira ga na le dua na drau ka vasagavulu-ka-va na udolu, era sa vakabulai tu mai vuravura.

4O ira oqo era sa sega ni ca kei na yalewa; ni ra sa sega ni veiyacovi kaya e dua. O ira oqo era sa muria na Lami e na veiyasana sa lako kina ko koya. O ira oqo era sa vakabulai mai vei ira na tamata, me rai sevu vua na Kalou kei na Lami.

5Sefa 3.13A sa sega ni kune e gusudra na lasu: ka ra sa sega ni cala.

Na Nodratou i Tukutuku na Agilosi e Tolu

6Ia ka'u a raica e duatani tale na agilosi sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura—vei ira kece talega na veimatanitu, kei na veimataqali, kei na duivosavosa, kei ira na tamata,

7ka sa kaya e na domo levu, “Dou rerevaka na Kalou, ka vakarokoroko vei koya, ni sa yaco na nona gauna me lewa; ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.”

8 Aisea 21.9; Jere 51.8; Vtaki 18.2 A sa duatani tale, nai karua ni agilosi sa muri, ka kaya, “Sa bale, sa bale ko Papiloni, na koro levu, e na vuku ni sa vagunuvi ira kecega na veimatanitu e na waini ni cudru ni nona dautagane.”

9A sa muri rau nai katolu ni agilosi, a sa kaya e na domo levu, “Kevaka sa dua na tamata sa vakarokoroko vua na manumanu kei na nona matakau, ka rawata na nona i vakatakilakila e na yadrena, se na ligana,

10Aisea 51.17; Vteki 19.24; Isi 38.22ena gunuva ko koya na waini ni cudru ni Kalou, o koya sa sovaraki ka sega ni vakawai ki na bilo ni nona cudru; ena vakararawataki vakalevu talega e na bukawaqa kei na sulifure e na matadra na agilosi yalosavasava, kei na mata ni Lami.

11Aisea 34.10A sa kuvu cake na kubou ni nodra yaluma ka sega ni mudu. A ra sa sega ni cegu e na siga se na bogi ko ira sa vakarokoroko vua na manumanu kei na nona matakau, kei ira era sa vakatakilakilataki e nai vakatakilakila ni yacana.”

12Oqo gona na nodra vosota na tamata yalosavasava, ko ira era sa vakabauta na vosa ni Kalou ka taura tikoga na vakabauti Jisu.

13Ia ka'u a rogoca e dua na domo mai lomalagi, sa kaya mai vei au, “Vola oqo: Sa kalougata mai na gauna oqo ko ira na mate era sa mate ni ra sa tu vata kei na Turaga.” Sa kaya na Yalo Tabu, “Io, me ra vakacegu mai na nodra cakacaka, ka sa muri ira na nodra i valavala.”

Tamusuka na Vua kei Vuravura sa Matua

14 Tani 7.13 Ia ka'u a vakaraica, ka raica, sa dua na o vulavula, ia sa dua sa dabe tiko ena o e vaka na Luve ni Tamata, a sa dua nai sala koula vakaturaga sa toka e uluna, a sa taura e ligana e dua nai sele-takelo gata.

15Joeli 3.13A sa duatani tale na agilosi sa lako mai na valenilotu, a sa kaci e na domo levu vei koya sa tiko ena o, “Vakacuruma na nomu i sele-takelo ka tamusuka, ni sa yaco na gauna ni tatamusuki, ni sa rui dreu matua na sila kei vuravura.”

16A sa vakacuruma na nona i sele-takelo ki vuravura ko koya sa tiko e na o, ka sa tamusuki kina na vua kei vuravura.

17A sa duatani tale na agilosi sa lako mai na valenilotu sa tu mai lomalagi, a sa taura talega ko koya e dua nai sele-takelo gata.

18A sa duatani tale na agilosi sa lako mai nai cabocabo-ni-soro, sa lewa rawa na bukawaqa; a sa kaci e na domo levu vei koya sa taura nai sele-takelo gata, ka kaya, “Vakacuruma na nomu i sele-takelo gata, ka cebeta nai soso vua-ni-vaini kei vuravura, ni sa dreu matua sara na vua-ni-vaini.”

19A sa vakacuruma na agilosi na nona i sele-takelo ki vuravura, ka cebeta nai soso vua-ni-vaini kei vuravura, ka biuta ki nai keli-waini levu ni cudru ni Kalou.

20Aisea 63.3; Lele 1.15; Vtaki 19.15A sa butuki nai keli-waini e nai bili ni koro, a sa lako mai nai keli-waini na dra, a sa yala ki na wa-tarovi ni ose, me rua na drau na maile.