Same 67 - Ai Vola Tabu (Vakadewa Makawa Vakavoutaki 2021)（FRV21）

Kacivi na Veimatanitu me ra Vakacaucautaka na Kalou Vua nai liuliu: kei nai yaya ni qiriqiri vaka-wa. A Same. A Sere.

1Me yalololoma mai vei keimami, na Kalou, ka vakalougatataki keimami

ka me cilavi keimami na matana, Sela

2me kilai kina na nomuni valavala e vuravura,

kei na bula sa mai vei kemuni ki na lewe ni veimatanitu kecega.

3Me ra vakavinavinaka vei kemuni na Kalou, ko ira na lewe ni veivanua;

io, me ra vakavinavinaka vei kemuni ko ira na lewe ni veivanua kecega.

4Me ra reki na veivanua ka sere e na marau,

ni kemuni na lewai ira vakadodonu na veimataqali

ka tuberi ira na veimatanitu e vuravura. Sela

5Me ra vakavinavinaka vei kemuni na Kalou, ko ira na lewe ni veivanua;

io, me ra vakavinavinaka vei kemuni ko ira na lewe ni veivanua kecega.

6Ena qai vuataka na vuana ko vuravura;

ena qai vakalougatataki keda na Kalou, io, na noda Kalou.

7Ena vakalougatataki keda na Kalou;

ena rerevaki koya talega nai yalayala kecega kei vuravura.