Same 55 - Ai Vola Tabu (Vakadewa Makawa Vakavoutaki 2021)（FRV21）

A Masu ni Tamata sa Lawakitaki mai Vua na Nona i Tokani Vua nai liuliu ni sere: kei nai yaya ni vakatagi vaka-wa. A Masikili i Tevita.

1Mo ni vakatu daligamuni, na Kalou, ki na noqu masu;

ia mo ni kakua ni vunitaki kemuni mai na noqu kerekere.

2Mo ni nanumi au, ka vakarorogo vei au;

au sa vutugu e na noqu rarawa, ka sega ni vakacegu rawa;

3e na vuku ni vosa ni meca,

e na vuku ni nodra i valavala vakasaurara na caka cala.

Ni ra sa beitaki au e na ka e sega ni dodonu,

ka ra sa vakararawataki au e na nodra cudru.

4Sa rarawa vakalevu na yaloqu e lomaqu,

ka sa kani au na rerevaka na mate.

5Sa kani au na rere kei na sautaninini,

ka sa luvuci au na domobula.

6Ka'u a qai kaya, “Isa, me'u vakatabana mada ga me vaka na ruve!

Au na vuka yani ka la'ki tiko vakacegu;

7io, au na qai dro vakayawa sara yani;

ka'u na la'ki tiko e na vanua lala. Sela

8Au na qai kusarawa ni dro tani

mai na cagi levu, kei na cava.”

9Mo ni vakarusai ira, kemuni na Turaga, ka wasea na yamedra;

ni'u sa kunea nai valavala kaukauwa kei na veileti e na koro.

10Era sa lako voli e dela ni kena bai

e na siga kei na bogi,

sa tiko e loma ni koro na caka cala kei na ka rarawa;

11sa tiko ga kina nai valavala ca;

a sa sega ni yali e na kena rara

na dauveivakaisini kei na dauveivaqaseni.

12Ni sa sega ni koya na meca ka vosa vakacacataki au—

ke sa vakakina ke'u sa vosota rawa;

ka sa sega ni koya ka cati au ka vakalevulevui koya vei au—

ke sa vakakina ke'u sa vunitaki au vua.

13Ia sai iko ga, a tamata, na noqu i sa,

na noqu i tokani, na noqu i tau voleka sara,

14o koya keirau sa dauveilasamaki vakavinaka vata;

ka daulako vata ki na vale ni Kalou kei na mataveiwekani.

15Me vauci ira ko mate;

me ra lako bulabula sobu ki nai bulubulu;

ni sa tiko e nodra i tikotiko kei na lomadra talega na ca.

16Ia ka'u sa masu vua na Kalou,

ka na vakabulai au ko Jiova.

17E na yakavi, kei na mataka, kei na siga levu

ka'u na masu ka tagi vakadomoilevu,

ka na rogoca na domoqu ko koya.

18Sa vakabula na yaloqu me'u vakacegu

mai nai valu ka ia vei au,

ni ra sa lewe vuqa era vala kei au.

19Na Kalou, o koya ka sa lewa mai nai vakatekivu, Sela

ena vakarorogo, ka vakayalomalumalumutaki ira—

baleta ni ra sa sega ni veisau,

ka sega ni rerevaka na Kalou.

20Sa dodoka na ligana na noqu i tokani vua na nona i tau

ka sa vakacataka ko koya na nona vosa ni yalayala.

21Sa malumalumu sara na vosa ni gusuna ka sa kaukauwa na bata,

ia sa tiko e lomana na via veivala;

sa waicala na nona vosa ka cevata na waiwai,

ia sai seleiwau ga sa ucu tu.

22Mo biuta vei Jiova na nomu i colacola bibi,

ena tokoni iko ko koya;

ena sega ni laivi ira na yalododonu me ra vakayavalati e na dua na gauna.

23Ia koi kemuni na Kalou, ko ni na biuti ira sobu

ki nai keli ni rusa;

ko ira na tamata dauveivakamatei ka dauveivakaisini

era na sega ni bula me yacova na veimama ni nodra gauna.

Ia koi au, ka'u na vakararavi vei kemuni.