1A ra sa soqoni vata ko ira na tamata kecega, me vaka era sa le dua ga na tamata, ki na salatu sa donuya na Matamata-ni-koro ni Wai; a ra sa kaya vei Esera na vunivola, me kauta mai nai vola ni vunau i Mosese, ka vakarota ko Jiova vei ira na Isireli.
2A sa kauta nai vola ni vunau ko Esera na bete kivei ira nai soqosoqo, ko ira na tagane kei ira na yalewa, kei ira kecega era sa yalomatua me ra kila rawa, e nai matai ni siga e nai kavitu ni vula.
3A sa wilika kina ko koya e na mata ni salatu sa donuya na Matamata-ni-koro ni Wai, mai na mataka ka yacova na siga levu, e na matadra na tagane, kei ira na yalewa, kei ira era kila rawa; a ra sa vakarorogo vakavinaka na tamata kecega ki nai vola ni vunau.
4A sa tu ko Esera na vunivola e nai tutu kau, era sa cakava me yaga kina; a sa tu voleka vua ko Maticea, kei Sema, kei Anaia, kei Uraia, kei Ilikaia, kei Meesea, e na ligana i matau; ia ki na ligana i mawi, ko Petaia, kei Misaeli, kei Malikaia, kei Asumi, kei Asipatani, ko Sakaraia, ko Mesulame.
5A sa tevuka nai vola ko Esera e matadra na tamata kecega; (ni sa cecere cake ko koya vei ira na tamata kecega); ia ni sa tevuka, era sa tucake na tamata kecega.
6A sa vakarokorokotaki Jiova na Kalou levu ko Esera. A ra sa kaya, “Emeni, Emeni,” ko ira na tamata kecega, ka dulaki liga. A ra sa vakacuva na uludra, ka vakarokoroko vei Jiova ni ra sa vakanamata ki na qele.
7Ia ko Jesua, kei Pani, kei Serepaia, ko Jamini, ko Akupi, ko Sapitai, ko Otaia, ko Meesea, ko Kilita, ko Asaraia, ko Josapati, ko Anani, ko Pilaia, kei ira na Livai, era vakamacalataka na vunau vei ira na tamata: a ra sa tu na tamata e nodra tikina.
8A ra sa wilika vakamalua nai vola ni vunau ni Kalou, ka vakatakila na kenai balebale, ka vakamacalataka na ka sa wili.
9Ia ko Niemaia na kovana, kei Esera na bete, na vunivola, kei ira na Livai, era sa vakavulici ira na tamata, era sa kaya vei ira kecega na tamata, “A siga oqo sa tabu me nei Jiova na nomuni Kalou; ni kakua ni loma bibi, se tagi.” Ni ra sa tagi ko ira kecega na tamata, ni ra sa rogoca na vosa ni vunau.
10Sa qai kaya vei ira ko koya, “Ni lako, ni kania na kena uro, ka gunuva na kena kamikamica, ka vakauta nai votavota vei ira sa sega na ka sa vakarautaki kina. Ni sa tabu na siga oqo me nei koya na noda Turaga; ia me kakua ni bibi na lomamuni, ni sa vu ni nomuni kaukauwa na rekitaki Jiova.”
11A ra sa vakacegui ira na tamata kecega ko ira na Livai, ni ra kaya, “Ni tiko lo, ni sa tabu na siga oqo; ni kakua talega ni yalorarawa.”
12A ra sa lako yani ko ira kecega na tamata me ra kana, ka gunu, ka me ra vakauta nai votavota, ka me ra marau vakalevu, ni ra sa kila na vosa sa tukuni vei ira.
Na Solevu ni Vale Tabanikau13Ia e na kenai karua ni siga, era sa soqoni vata ko ira na nodra turaga qase na tamata kecega, kei ira na bete, kei ira na Livai, kivei Esera na vunivola, me ra kila na vosa ni vunau.
14Vsoro 23.33-36,39-43; Vrua 16.13-15A ra sa kunea ni sa volai e na vunau ka vakarota ko Jiova e na gusu i Mosese, me ra tiko e na veivale tabanikau ko ira na Isireli, e na solevu sa dauia e nai kavitu ni vula,
15ka me ra tukuna yani ka vakarogoya e na nodra veikoro kecega, kei Jerusalemi, ka vaka, “Ni lako yani ki na ulunivanua, ka kauta mai na taba ni olive, kei na taba ni paini, kei na taba ni mateli, kei na taba ni niu-sawa, kei na tabanikau rugurugua, me caka kina na veivale tabanikau, me vaka sa volai.”
16A ra sa lako yani ko ira na tamata, ka kauta mai, ka tara na nodra veivale tabanikau, na tamata yadua e na dela ni nona vale, e na nodra lomanibai talega, kei na lomanibai ni vale ni Kalou, kei na sala mai na Matamata-ni-koro ni Wai, kei na sala mai na Matamata-ni-koro i Ifereimi.
17Ia ko ira nai soqosoqo taucoko era sa tale mai na tiko vakabobula, era sa cakava na veivale tabanikau, ka tiko e ruku ni veivale tabanikau; era sa sega ni cakava vakakina ko ira na Isireli mai na gauna i Josua na luve i Nuni. A sa dua na marau levu sara.
18Ia e na veisiga, mai nai matai ni siga ka yacova na siga sa kenai tinitini, sa wilika tiko ko koya nai vola ni vunau ni Kalou. A ra sa ia tiko na solevu ka bogi vitu, ia e nai kawalu ni siga, sa caka e dua na soqosoqo tabu, me vaka na kenai valavala.
Who We AreWhat We EelieveWhat We Do
2025 by iamachristian.org,Inc All rights reserved.
