2 Tui 8 - Ai Vola Tabu (Vakadewa Makawa Vakavoutaki 2021)（FRV21）

Vakasukai Lesu Vua na Yalewa ni Sunemi na Nona Vanua

1 2Tui 4.8-37 A sa kaya ko Ilaisa vua na yalewa ka vakabula na luvena ko koya, “Mo ia, ka mo dou lako kei ira na nomu lewe-ni-vuvale, ka la'ki tiko vulagi e na dua na vanua ko sa tiko vulagi rawa kina, ni sa vakayacora na dausiga ko Jiova, ka na dausiga na vanua ka yabaki vitu.”

2A sa cavu tu na yalewa, ka sa muria na nona vosa na tamata ni Kalou. A sa lako yani ko koya kei iratou na nona lewe-ni-vuvale, ka tiko vulagi e na nodra vanua na kai Filisitia ka yabaki vitu.

3Ia ni sa oti e vitu na yabaki, sa qai lesu mai na yalewa mai na nodra vanua na kai Filisitia, ka la'ki tagi vua na tui e na vuku ni nona vale kei na nona vanua.

4A sa veivosaki tiko na tui kei Keasi, na nona cauravou na tamata ni Kalou, ka sa kaya, “Mo tukuna mada mai vei au na ka levu kecega ka cakava ko Ilaisa.”

5Ia ni sa tukuna tiko vua na tui ni a vakabula ko Ilaisa e dua sa mate, sa qai lako mai na yalewa ka vakabula na luvena ko koya, ka mai tagi vua na tui e na vuku ni nona vale kei na nona vanua. A sa kaya ko Keasi, “Kemuni na noqu turaga na tui, sai koya oqo na yalewa kei na luvena tagane ka vakabula ko Ilaisa.”

6A sa taroga na yalewa na tui, ka sa tukuna vua ko koya. A sa qai lesia vua e dua nai vakalesilesi ko koya na tui, ka kaya, “Mo vakasuka na nona ka kecega, kei na vua ni nona vanua kecega mai na siga ka lako tani kina e na vanua, ka yacova na siga oqo.”

Ko Ilaisa kei Peni-etati na Tui Siria

7A sa lako ki Tamasiko ko Ilaisa ni sa tauvi mate voli ko Peni-etati na tui Siria. Ni sa tukuni vua, “Sa lako mai ki ke ko koya na tamata ni Kalou,”

8a sa kaya vei Eseeli na tui, “Mo kauta mada e dua na ka-ni-loloma, ka la'ki tavaki koya na tamata ni Kalou, ka tarogi Jiova vua, ka kaya, ‘Au na bula tale mai na mate oqo, se segai?’ ”

9A sa la'ki tavaki koya ko Eseeli, ka kauta e dua na ka-ni-loloma, io na ka eso mai na ka vinaka kecega e Tamasiko ka colata rawa na kameli e le vasagavulu. Ni sa curu yani ka la'ki tu e matana, a sa kaya, “Sa talai au vei iko na luvemu na tui Siria ko Peni-etati, me'u kaya, ‘Au na bula tale mai na mate oqo, se segai?’ ”

10Ka sa kaya vua ko Ilaisa, “Mo la'ki kaya vua, ‘Ko na bula vakaidina ko iko’; ia sa vakatakila vei au ko Jiova ni na mate vakaidina ko koya.”

11A sa vakaraici koya matua sara vakadede, me yacova ni sa madua. A sa tagi ko koya na tamata ni Kalou.

12Ka sa kaya ko Eseeli, “A cava ko sa tagi kina na noqu turaga?” A sa kaya ko koya, “Baleta ni'u sa kila na ka ca ko na cakava vei ira na Isireli. A nodra veikoro vakabai, ko na vakama, kei ira na nodra cauravou ko na vakamatea e nai seleiwau, kei ira na nodra gone lalai ko na botobotolaki ira vakalalai, ka tavai ira na nodra yalewa era sa bukete tu.”

131Tui 19.15A sa kaya ko Eseeli, “A cava beka koi au na nomu tamata, ni'u sa vaka ga e dua na koli, me na kitaka kina na ka levu oqo?” A sa kaya ko Ilaisa, “Sa vakatakila vei au ko Jiova ni ko na tui Siria.”

14Sa qai lako tani mai vei Ilaisa ko koya, ka lako vua na nona turaga, o koya ka sa kaya vua, “A cava sa kaya vei iko ko Ilaisa?” A sa kaya ko koya, “Sa kaya vei au ni ko na bula vakaidina.”

15Ia e na siga ka tarava, sa kauta ko koya nai tutuvi, ka tonisua e na wai, ka ovica kina na mata ni tui, me yacova ni sa mate. Ka sa tui ko Eseeli, me kenai sosomi.

Sa Tui Juta ko Jiorami(2 Veigauna 21.1-20)

16Ia e na kenai kalima ni yabaki i Jorami na tui Isireli, na luve i Eapi, ni sa tui Juta ko Josefati, sa tekivu me lewa ko Jiorami na luve i Josefati na tui Juta.

17Sa tolusagavulu ka rua na nona yabaki ni sa buli me tui; a sa tui tiko mai Jerusalemi ka yabaki walu.

18A sa muria ko koya na nodra i valavala na tui Isireli, me vaka sa cakava na vale i Eapi, ni sa watina na luve i Eapi. A sa daucaka ca ko koya e na mata i Jiova.

191Tui 11.36Ia sa sega ni via vakawabokotaki ira na Juta ko Jiova, e na vuku i Tevita na nona tamata, me vaka ka kaya vua me solia tikoga vua na cina, vei ira talega na luvena.

20 Vteki 27.40 E na nona gauna sa bese ni qaravi ira tiko na Juta ko ira na Itomi, ka bulia e dua tale me nodra tui.

21A sa lako yani ko Jorami ki Sea, ka lako vata kaya na qiqi-ni-valu kecega. A sa tucake ko koya e na bogi, ka mokuti ira na kai Itomi era sa vakavolivoliti koya, kei ira na kavetani ni qiqi-ni-valu, ia era sa dui dro ko ira na tamata ki na nona valelaca.

22Ia sa bese tiko ni qaravi ira na Juta ko ira na Itomi, ka yacova na gauna oqo. A sa vuki talega ko ira na kai Lipina e na gauna ko ya.

23Ia na kena vo ni cakacaka i Jorami, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

24A sa moce vata ko Jorami kei ira na nona qase, ka sa bulu vata kei ira na nona qase e na koro i Tevita. A sa tui ko Easaia na luvena, me kenai sosomi.

Sa Tui Juta ko Easaia(2 Veigauna 22.1-6)

25E na kenai katinikarua ni yabaki i Jorami na tui Isireli, na luve i Eapi, sa qai tekivu me lewa ko Easaia na luve i Jiorami na tui Juta.

26E ruasagavulu ka rua na nona yabaki ko Easaia ni sa buli me tui, ka sa tui mai Jerusalemi ka yabaki dua. Ia na yaca i tinana ko Acalaia na luve i Omirai na tui Isireli.

27A sa muria nai valavala ni vale i Eapi ko koya, ka daucaka ca e na mata i Jiova, me vaka na vale i Eapi, ni sa veivugoni ko koya kei na vuvale i Eapi.

28A rau a lako kei Jorami na luve i Eapi ki nai valu kei Eseeli na tui Siria mai Remoci-kiliati; a ra sa vakamavoataki Jorami na kai Siria.

29A sa lesu tale ki Jesireli ko Jorami na tui, me bula mai na vue era a vuetaki koya kina mai Rama ko ira na kai Siria, ni rau a veivala kei Eseeli na tui Siria. Ia ko Easaia na luve i Jiorami na tui Juta, sa lako sobu me raici Jorami na luve i Eapi mai Jesireli, ni sa mavoa tu ko koya.