Kolosa 3 - Ai Vola Tabu (Vakadewa Makawa Vakavoutaki 2021)（FRV21）

1 Same 110.1 Ia kevaka dou sa vakaturi cake vata kei Karisito, mo dou vakasaqara na veika mai cake, sa tiko kina na Karisito e na liga i matau ni Kalou.

2Dou daunanuma na veika mai cake, kakua ga na veika e vuravura.

3Ni dou sa mate ga, ia na nomudou bula sa vuni vata kei Karisito e na Kalou.

4Ni na rairai mai na Karisito, sa noda vu-ni-bula, dou na qai rairai vata kaya e nai ukuuku.

Na Noda Bula Makawa kei na Noda Bula Vou

5O koya mo dou qai vakamatea na veitikimudou vakavuravura: na veidauci, nai valavala tawa-savasava, na gagadre ca, na dodomo ca, kei na kocokoco (oqo na qaravi kalou lasu).

6E na vuku ni veika oqo sa yaco kina na cudru ni Kalou vei ira era sa dautalaidredre.

7Ia koi kemudou talega, dou a ia eliu nai valavala vakakina, ni dou a bula lako vakakina.

8Ia oqo, mo dou biuta tani na ka kecega oqo—na daucudru, na daulesa, na lomaca, na vosa lasu, kei na vosa dukadukali mai na gusumudou.

9Efe 4.22Kakua ni dauveilasutaki, ni dou sa luvata tani na tamata makawa kei na nona i valavala

10Vteki 1.26; Efe 4.24ka dou sa vakasulumi kemudou e na tamata vou, o koya sa vakavoui tiko e na vuku me vaka na yaloyalona ka buli koya.

11Sa sega kina ni nanumi se Jiu se kai Kirisi, se cili se sega ni cili, na tawa vuku, na kai tani, na bobula, nai taukei; ia sa uasivi sara e na ka kecega na Karisito.

12 Efe 4.2 O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, kei na dauvosota vakadede.

13Efe 4.32Dou veivosoti vakai kemudou ka kakua ni veicudruvi kevaka sa dua na ka sa rarawa kina e dua. Me vaka ni sa vosoti kemudou na Karisito, mo dou veivosovosoti vaka talega kina.

14Me qai liu e na ka kecega oqo na loloma, o koya sa vauca vakavinaka sara na ka kecega.

15Ia me vakatulewa sara e na lomamudou na vakacegu i Karisito, ni dou sa kacivi ki na ka oqo, ni dou sa yago e dua bauga. Ka mo dou ia tiko na vakavinavinaka.

16Efe 5.19,20Me tiko vakalevu e na lomamudou na vosa i Karisito e na vuku kecega; dou veivakatavulici ka veivunauci vakai kemudou e na same kei na sere kei na meke vakayalo; ka dou sere tiko vua na Kalou ni sa tiko e na yalomudou na loloma.

17Ia na ka kecega dou sa kitaka, se dou vosa se dou cakacaka, me ia kece e na yaca ni Turaga ko Jisu, ko koya dou sa ia tiko kina na vakavinavinaka vua na Kalou na Tamada.

Na Noda Veiwekani ena Bula Vou

18 Efe 5.22; 1Pita 3.1 Oi kemudou na yalewa vakawati, mo dou talairawarawa vei ira na watimudou, me vaka sa dodonu vua na Turaga.

19Efe 5.25; 1Pita 3.7Oi kemudou na tagane vakawati, mo dou lomani ira na watimudou, ka kakua ni yalo ca vei ira.

20 Efe 6.1 Oi kemudou na gone, mo dou talairawarawa vei ira na nomudou qase e na ka kecega, ni sa vinaka sara oqo vua na Turaga.

21Efe 6.4Oi kemudou na qase, mo dou kakua ni vakacudrui ira na luvemudou, de ra datuvu kina.

22Efe 6.5-8Oi kemudou na tamata bobula, mo dou talairawarawa vei ira na nomudou turaga vakayago e na ka kecega; kakua ni ia walega e na matanavotu, me vakalomavinakataka na tamata, dou ia ga e na loma dina, ni dou sa rerevaka na Kalou.

23Ia na ka kecega dou sa cakava, kitaka mai na vu ni yalomudou me vaka sa ia vua na Turaga, me kakua ni vaka sa ia vei ira walega na tamata,

24ni dou sa kila dou na rawata kina mai vua na Turaga nai votavota me kenai sau. Dou sa qarava tiko na Turaga ko Karisito.

25Vrua 10.17; Efe 6.9Ia ko koya sa caka ca ena rawata na kenai sau ni ca sa cakava; ka sa sega ni vinakati vakailoa e dua na tamata.