Jeremaia 1 - Ai Vola Tabu (Vakadewa Makawa Vakavoutaki 2021)（FRV21）

Ko Jeremaia

1A vosa i Jeremaia na luve i Ilikaia, e dua vei ira na bete era tiko mai Anacoci e na vanua ko Penijamini.

22Tui 22.3—23.27; 2Vei 34.8—35.19A sa yaco vua na vosa i Jiova e na gauna i Josaia na luve i Emoni na tui Juta, e nai katinikatolu ni yabaki ni nona lewa.

32Tui 23.36—24.7; 18.1—25.21; 2Vei 36.5-8; 11.21A sa yaco talega e na gauna i Jioiakimi na luve i Josaia na tui Juta, ka yacova nai cavacava ni kenai katinikadua ni yabaki i Setekaia na luve i Josaia na tui Juta, ka yaco ki na siga sa kau vakabobula kina ko Jerusalemi e nai kalima ni vula.

Na Kacivi nei Jeremaia

4Sa qai yaco vei au na vosa i Jiova, ka vaka,

5“Ni'u a bera ni buli iko e na kete, ka'u sa kilai iko,

ia ni ko a bera ni sucu mai, ka'u sa vakatabui iko;

ka lesi iko mo nodra parofita na veimatanitu.”

6Au a qai kaya, “Isa, noqu Turaga Jiova! Raica, ka'u sa sega ni kila vosa, ni'u sa gone ga koi au.”

7Ia sa kaya vei au ko Jiova,

“Mo kakua ni kaya, ‘Au sa gone ga koi au’;

ni ko na lako vei ira kecega ka'u sa talai iko kina,

ia na ka kece talega ka'u sa vakarota vei iko, ko na tukuna.

8Mo kakua ni rerevaka na matadra,

ni'u sa tiko vata kei iko koi au, me'u vakabulai iko,

sa kaya ko Jiova.”

9A sa dodoka mai na ligana ko Jiova, ka tara na gusuqu; ka sa kaya vei au ko Jiova,

“Raica, ka'u sa tauca na noqu vosa ki na gusumu.

10Raica, ka'u sa lesi iko e na siga oqo ki na veivanua kei na veimatanitu

mo cavuta laivi ka basuka,

ka vakarusa, ka talaraka,

ka tara, ka tea.”

11A sa yaco vei au na vosa i Jiova, ka vaka, “I Jeremaia, a cava ko sa raica?” Au a kaya, “E dua na taba ni amodi ka'u sa raica.”

12Ka sa kaya vei au ko Jiova, “Ko sa raica vinaka, ni'u na vakusarawataka na noqu vosa me'u vakayacora.”

13A sa yaco tale me vakarua vei au na vosa i Jiova, ka vaka, “A cava ko sa raica?” Au a kaya, “E dua na kuro sa cawa ka'u sa raica, ia na gusuna sa donuya na mata ni vualiku.”

14A sa kaya vei au ko Jiova, “Mai na vualiku ena yaco e dua na ca kivei ira kecega na lewe-ni-vanua.

15Ni'u na kacivi ira kece na veimataqali ni veimatanitu mai na vualiku, sa kaya ko Jiova; a ra na lako mai, ka ra na dui vakatura na nodra i tikotiko vakaturaga e na matamata-ni-koro mai Jerusalemi, kei na kena bai kecega e vakavolivolita, kei na veikoro vaka-Juta kecega.

16Ia ka'u na tukuna na noqu lewa vei ira e na vuku ni nodra ca kecega, era sa biuti au, ka vakama nai madrali boi vinaka ki na kalou tani, ka soro ki na cakacaka ni ligadra.

17Ia ko iko, mo vauca na tolomu, ka tucake, ka tukuna vei ira na ka kecega ka'u sa vakarota vei iko. Kakua ni ko rerevaka na matadra, de'u vakataqayataki iko e matadra.

18Ia koi au, raica, ka'u sa lesi iko e na siga oqo mo koro kaukauwa, ka mo duru kaukamea, ka bai parasa ki na vanua taucoko—vei ira na tui Juta, vei ira na kena turaga, vei ira na kena bete, kei ira na lewe-ni-vanua.

19Ia era na veivala kei iko; ka ra na sega ni gumatua vei iko, ni'u sa tiko vata kei iko, sa kaya ko Jiova, me'u vakabulai iko.”