Vosa Vakaibalebale 12 - Ai Vola Tabu (Vakadewa Makawa Vakavoutaki 2021)（FRV21）

1O koya sa vinakata ni vakavulici sa vinakata na vuku,

ia ko koya sa cata ni vunauci sa yalowai.

2Na tamata vinaka e dau kune loloma mai vei Jiova,

ia na tamata i lawaki ca ena vakacala ko koya.

3Ena sega ni vakataudeitaki na tamata e nai valavala ca,

ia na wakadra na yalododonu ena sega ni yavalati.

4Na yalewa yalovakamarama sai sala talei vua na watina,

ia ko koya sa ia na veivakamaduataki sa vaka nai vakavuca ni suina.

5A nodra vakanananu na yalododonu sa ka dodonu,

ia na ka era bosea nai valavala ca na vere.

6A nodra vosa nai valavala ca me ra la'ki batikadi,

ia na gusudra na yalododonu ena vakabulai ira.

7Era sa vukici sara na tamata ca, ka ra sa yali,

ia na nodra vale na tamata yalododonu ena tiko dei.

8Ena vakacaucautaki na tamata me vaka na nona vosa ni vuku,

ia ko koya sa yalovakatani ena beci.

9Sa vinaka ko koya sa beci, ka sa dua vua na dauveiqaravi,

ka ca ko koya sa daudokadokai koya, ka sa lailai na kena.

10Na tamata yalododonu sa maroroya na bula ni nona manumanu,

ia na nodra yalololoma na tamata ca na lomaqa.

11O koya sa daucukita na nona were ena mamau e na kakana,

ia ko koya sa muri ira na tamata wale sa sega ni vakayalo.

12O ira na tamata ca era sa daudomona na nodra lawa na tamata ca,

ia na wakadra na yalododonu sa vua tiko.

13Na vosa cala ni tebenigusuna sa tacori kina na tamata ca,

ia ena bula mai na ka rarawa ko ira na yalododonu.

14Na vua ni gusuna ena mamau kina na tamata e na ka vinaka,

ia na kenai sau ni cakacaka ni tamata ena soli vua.

15A nona sala na tamata lialia sa ka dodonu e matana,

ia ko koya sa muria na ka e vakavulici kina sa vuku.

16Sa kilai sara ga na nona cudru na tamata lialia,

ia sa vunia na madua ko koya sa yalomatua.

17O koya sa dauvosa dina sa tukuna na ka dodonu,

ia na dautukutuku lasu, sa tukuna na veivakaisini.

18Sa dua sa vosa me vaka sa suaka e nai seleiwau,

ia na yamedra na vuku sa ia na veivakabulai,

19Na tebenigusu dina ena vakataudeitaki ka tawa mudu,

ia sa dede vakalailai ga na yame daulasu.

20Na ka lasu sa tiko e lomadra era dauvakanananu ki na ka ca,

ia ko ira era bosea na sautu sa nodra na marau.

21Ena sega ni yacovi ira na yalododonu e dua na ka ca,

ia ko ira na tamata ca era na sinai e na ca.

22A ka vakasisila vei Jiova na tebenigusu lasu,

ia ko ira sa dina na nodra cakacaka sa rekitaka ko koya.

23Na tamata yalomatua sa vunia na vuku,

ia na lomadra na lialia sa tukuna na ka lialia.

24A liga dautara ka ena ia na lewa,

ia ko koya na vucesa ena kau i vakacavacava.

25Ni sa bibi na loma ni tamata sa vakacuva ulu,

ia na vosa vinaka sa vakamarautaka.

26Na tamata yalododonu sa tubera vakavinaka na kai nona,

ia na nodra i valavala na tamata ca sa vakacalai ira.

27Sa sega ni tavuna ko koya na vucesa na ka sa rawata ni sa vakasasa manumanu,

ia na nona i yau na tamata daucakacaka sa ka talei.

28E na sala ni valavala dodonu sa rawa na bula,

ia e na salatu ko ya sa sega kina na mate.