Vakarua 9 - Ai Vola Tabu (Vakadewa Makawa Vakavoutaki 2021)（FRV21）

Nai Sau ni Dautalaidredre vua na Kalou(Lako Yani 32.1-35)

1“Mo ni rogoca, na Isireli: ko ni sa na qalo kosova na Joritani edaidai, mo ni lako ka la'ki taukena eso na matanitu sa levu ka kaukauwa cake mai vei kemuni, na veikoro lelevu ka sa yala ki lomalagi na kedra bai,

2a matanitu tamata lelevu ka balabalavu, na luve i Anaki, ko ira ko ni sa kila. Ia ko ni sa rogoca ni ra sa kainaki vakaoqo, ‘O cei e tu rawa e na matadra na luve i Anaki?’

3Mo ni kila sara edaidai ni sa liutaki kemuni yani ko Jiova na nomuni Kalou me vaka na bukawaqa katakata. Ena vakadrukai ira ka vakamalumalumutaki ira e matamuni, ka mo ni na vakasavi ira ka vakarusai ira kina vakusakusa, me vaka sa kaya vei kemuni ko Jiova.

4“Mo ni kakua ni vosa e lomamuni ni sa vakasevi ira tani oti e matamuni ko Jiova na nomuni Kalou, ka kaya, ‘E na vuku ni noqu i valavala dodonu sa kauti au mai ko Jiova me'u taukena na vanua oqo’; ia e na vuku ga ni nodra i valavala vakasisila na veimatanitu oqori ka sa vakasevi ira kina e matamuni ko Jiova.

5Sa segai e na vuku ni nomuni valavala dodonu, se na dodonu ni lomamuni ko ni sa lako kina mo ni taukena na nodra vanua; ia e na vuku ga ni nodrai tovo vakasisila na veimatanitu oqori sa vakasevi ira kina e matamuni ko Jiova na nomuni Kalou, ka me vakayacora ko koya na vosa ka bubului kina ko Jiova vei iratou na nomuni qase, kivei Eparaama, kei Aisake, kei Jekope.

6“Mo ni kila ga, ni sa sega ni solia vei kemuni na vanua vinaka oqo ko Jiova na nomuni Kalou mo ni taukena e na vuku ni nomuni yalododonu, ni ko ni sa tamata domoqa.

7Mo ni nanuma, kakua ni guilecava, ni ko a dauvakacudrui Jiova na nomuni Kalou mai na vanua lala. Mai na siga ko ni a lako tani mai na vanua ko Ijipita, ka yacova na siga ko ni a yaco kina ki na yasana oqo, ko ni sa talaidredre ga vei Jiova.

8Mai Orepi talega ko ni a vakacudrui Jiova, a sa cudruvi kemuni ko Jiova me via vakarusai kemuni.

9Lako 24.18Ni ka'u a cabe ki na ulunivanua me'u taura na vatu raraba, io na vatu raraba ni veiyalayalati sa ia kei kemuni ko Jiova, au a qai tiko e na ulunivanua ka siga vasagavulu ka bogi vasagavulu; au a sega ni kana madrai, se gunu wai.

10A sa solia vei au ko Jiova e rua na vatu raraba sa volai e nai qaqalo ni Kalou; a sa volai kina na vosa kecega sa vosataka vei kemuni ko Jiova mai na ulunivanua mai na loma ni bukawaqa e na siga ni soqoni vata.

11Ia ni sa oti na siga e vasagavulu kei na bogi e vasagavulu, sa qai solia vei au ko Jiova na vatu raraba ruarua ko ya, io na vatu raraba ni veiyalayalati.

12A sa kaya vei au ko Jiova, ‘Mo ia, mo lako sobu vakatotolo sara; ni ra sa vakadukadukalitaki na nomu tamata ko ira ko a kauta tani mai Ijipita; era sa vuki tani vakasauri mai na sala ka'u a vakarota vei ira; era sa cakava vei ira e dua na matakau sa vakawaicalataki.’

Na Luve ni Bulumakau Koula

13“Sa vosa talega vei au ko Jiova, ka kaya, ‘Au sa raici ira oti na matatamata oqo, ka raica, era sa matatamata domoqa.

14Mo laivi au mada, me'u vakarusai ira, ka bokoca laivi na yacadra mai na ruku i lomalagi. Ia ka'u na qisi iko mo matanitu kaukauwa ka levu cake vei ira.’

15Au a qai lesu ka siro sobu mai na ulunivanua, a sa waqa tiko na ulunivanua e na buka. Ka'u sa kauta na vatu ruarua ni veiyalayalati e na ligaqu ruarua.

16Ka'u a qai rai yani, ka raica, ko ni sa kitaka oti na ka ca vei Jiova na nomuni Kalou; ko ni sa bulia oti vei kemuni e dua na luve ni bulumakau sa vakawaicalataki; ko ni sa lesu tani vakasauri mai na sala sa vakarota vei kemuni ko Jiova.

17Ia ka'u a kauta na vatu raraba ruarua, ka viritaka yani mai na ligaqu ruarua, ka vorolaka e matamuni.

18Au a qai cuva sobu e na mata i Jiova, me vaka eliu, ka siga vasagavulu ka bogi vasagavulu; au a sega ni kana madrai, se gunu wai; e na vuku ni nomuni valavala ca kecega ko ni sai valavala ca kina, ni ko ni a caka cala e na mata i Jiova, me vakacudrui koya.

19Ipe 12.21Ni'u a rerevaka na lesa kei na cudru katakata sa cudru kina vei kemuni ko Jiova me vakarusai kemuni. A sa rogoci au ko Jiova e na gauna talega ko ya.

20Sa cudruvi Eroni vakalevu talega ko Jiova me via vakamatei koya. Ia ka'u a masulaki Eroni talega e na gauna ko ya.

21Ka'u a qai taura na ka ni nomuni valavala ca, na luve ni bulumakau kemuni a cakava, ia ka'u a vakama e na bukawaqa, ka buturaka, me qaqiraka vakamatailalai sara, me vaka ga na kuvu-ni-soso. Ia ka'u a biuta na kena kuvu-ni-soso ki na uciwai sa drodro sobu mai na ulunivanua.

22 Tiko 11.3,34; Lako 17.7 “Mai Tapera talega, kei Masa, kei Kipiroci-ateva, ko ni a vakacudrui Jiova.

23Tiko 13.25—14.38; Vrua 1.21,26; Ipe 3.16Ka ni sa talai kemuni talega ko Jiova mai Ketesa-banea, ka kaya, Mo ni lako cake ka taukena na vanua ka'u sa solia vei kemuni; ko ni a talaidredre ga ki na vunau i Jiova na nomuni Kalou, ka sega ni vakabauti koya, se vakarorogo ki na nona vosa.

24Mai na siga ka'u a kilai kemuni kina, ko ni sa talaidredre ga vei Jiova.

25“Ia ka'u a cuva sobu e na mata i Jiova ka siga vasagavulu ka bogi vasagavulu, me vaka ka'u a cuva sobu eliu, ni sa kaya ko Jiova ena vakarusai kemuni.

26Au a masu kina kivei Jiova, ka kaya, ‘Kemuni na Turaga, Jiova, mo ni kakua ni vakarusai ira na nomuni tamata kei na nomuni votavota, ko ira ko ni a vakabula e na nomuni cecere vakaturaga, ko ira kemuni a kauta mai Ijipita e na ligamuni kaukauwa.

27Mo ni nanumi iratou na nomuni tamata, ko Eparaama, ko Aisake, kei Jekope. Kakua ni raica na nodra yalokaukauwa na tamata oqo, se na nodra caka cala, se na nodra i valavala ca,

28de kainaki e na vanua ko ni a kauti keimami mai kina, “Ni sa sega ni kauti ira rawa ko Jiova ki na vanua ka yalataka vei ira, ka ni sa cati ira talega, ka sa kauti ira yani ko koya me vakamatei ira e na vanua lala.”

29Ia era sa nomuni tamata ga kei na nomuni votavota, ko ni a kauta tani mai e na nomuni kaukauwa levu kei na ligamuni sa dodo tu.’