1 Samuela 9 - Ai Vola Tabu (Vakadewa Makawa Vakavoutaki 2021)（FRV21）

Sa Digitaki ko Saula me Tui

1Ia sa dua na tamata vei ira na Penijamini, a yacana ko Kisi, na luve i Epieli, na luve i Sirori, na luve i Pikoraci, na luve i Efia, mai na yavusa i Penijamini, a tamata i valu ka qaqa.

2Ka sa dua na luvena, na yacana ko Saula, sa cauravou totoka ka vatukai vinaka. A sa sega e dua vei ira na Isireli e vinaka cake vei koya. Mai na tabana ki buradelana sa balavu cake vei ira kecega na tamata.

3A sa yali ko ira na asa nei Kisi na tama i Saula. A sa kaya ko Kisi vei Saula na luvena, “Mo drau lako vata kei na dua vei ira na cauravou, ka la'ki vakaqarai ira na asa.”

4A sa lako voli ko koya e na vanua veiulunivanua ko Ifereimi, ka lako voli e na vanua ko Salisa, ia erau a sega ni kunei ira. Erau sa qai lako voli e na vanua ko Salimi, a sa sega ga mai kina. A sa qai lako voli ko koya e na nodra vanua na Penijamini, ia erau a sega ni kunea.

5Ni rau sa lako mai ki na vanua ko Sufi, a sa kaya ko Saula vua na nona cauravou erau sa lako vata kaya, “Me daru sa lesu tale yani, de sa cegu ni leqataka na asa ko tamaqu, ka sa tekivu me lomaleqa e na vukudaru.”

6Ia sa kaya vua ko koya, “Raica, sa dua na tamata ni Kalou e na koro oqo, a sa dokai na tamata ko ya. A ka kecega sa kaya ko koya sa dauyaco vakaidina. Oqo, me daru lako mada kina; de sa vakatakila rawa vei kedaru ko koya na sala me daru lako kina.”

7A sa kaya ko Saula vua na nona cauravou, “Raica, kevaka edaru lako, a cava me daru kauta vua na tamata? Ni sa oti na madrai e na nodaru taga, ka sa sega e dua na ka-ni-loloma me daru kauta vua na tamata ni Kalou. A cava e bau tu vei kedaru?”

8A sa kaya tale vei Saula ko koya na cauravou, “Raica, sa tu vei au oqo e dua-nai-kava ni sikeli siliva; ko ya ka'u na solia vua na tamata ni Kalou, me vakatakila vei kedaru na nodaru sala.”

9(E na gauna eliu, ni sa lako e dua vei ira na Isireli me taroga na Kalou, sa kaya vakaoqo, “Mai, tou mai lako ki vua na daurai”; ni sa vakatokai eliu me daurai ko koya sa vakatokai na parofita e na gauna oqo.)

10A sa kaya vua na nona cauravou ko Saula, “Sa vinaka na nomu vosa; daru lako.” A rau sa qai lako ki na koro sa tiko kina na tamata ni Kalou.

11Ni rau sa lako cake tiko e nai cabecabe ki na koro, erau sa kunea na goneyalewa eso era lako tiko me taki wai, ka rau sa kaya vei ira, “Sa tiko beka eke o koya na daurai, se segai?”

12A ra sa kaya vei rau, “Io, raica, sa tiko ga oqori vakalailai ki liu. Vakatotolo; ni se qai lako ga mai edaidai ko koya ki na koro, ni sa dua na nodra vakacaboisoro edaidai ko ira na tamata e na tikina cecere.

13Ni drau na yaco ki na koro, drau na kunei koya sara ni se bera ni lako cake ki na tikina cecere me kana. Ni ra na sega mada ni kana na tamata, ia ena lako mai eliu ko koya ka vatonaka nai soro; era na qai kana e muri ko ira era sa sureti. Ia oqo, drau lako cake, ni drau na la'ki kunei koya oqo.”

14A rau sa lako cake ki na koro. Ni rau sa curu yani ki na loma ni koro, ka raica, sa mai donui rau ko Samuela ni sa lako cake ki na tikina cecere.

15Ia ena siga ni se bera ni lako mai kina ko Saula, a sa vakatakila oti ko Jiova vei Samuela na ka oqo:

16“E na gauna vata vakaoqo ni mataka ka'u na tala kina vei iko e dua na tamata mai na vanua nei Penijamini, ka mo lumuti koya me veiliutaki vei ira na noqu tamata na Isireli. Ena vakabulai ira na noqu tamata ko koya mai na ligadra na kai Filisitia; ni'u sa raica na nodra vakaloloma na noqu tamata ka ni sa yaco vei au na nodra tagi.”

17Ia ni sa raici Saula ko Samuela, sa kaya vua ko Jiova, “Sai koya oqo na tamata ka'u a vosa kina vei iko! O koya oqo ena lewai ira na noqu tamata.”

18A sa qai lako yani vei Samuela ko Saula ni sa tiko e na matamata-ni-koro, ka kaya vua, “Mo tukuna mada mai vei au, se sa evei na nona vale na daurai?”

19A sa vosa mai vei Saula ko Samuela, ka kaya, “Oi au na daurai. Mo lako cake mada yani eliu ki na tikina cecere, ni datou na kana vata edaidai, ia e na mataka au na qai talai iko yani ka tukuna vei iko na ka kecega sa tu e lomamu.

20Ia me baleta na nomu asa sa qai yali bogi tolu, mo kakua tale ni qai vakananumi ira tiko, ni ra sa kune. Ia ko cei era sa goleva ko ira kecega na Isireli? Sa segai beka ni ko iko, kei ira kecega na lewe-ni-vuvale i tamamu?”

21A sa kaya ko Saula, “Au sa sega li ni dua vei ira na Penijamini koi au, o koya sa lailai sobu mai na nodra veiyavusa na Isireli? Kei na noqu vuvale, sa sega li ni lailai sobu vei ira kecega na veivuvale e na yavusa i Penijamini? Ia a cava na vuna ko sa vosa kina vakaoqo vei au?”

22A sa qai kauti Saula kei na nona cauravou ko Samuela, ka kauti rau ki na vale ni kana, ka vakatikori rau e na tikina vakaturaga e cake vei ira sa sureti, ka ra sa le tolusagavulu beka na tamata.

23A sa kaya ko Samuela vua na daunivakasaqa, “Mo kauta mada mai na kakana ka'u a solia vei iko, ko ya ka'u a kaya vei iko, ‘Mo biuta vakatikitiki toka oqo.’ ”

24A sa tara cake na saga ni manumanu na daunivakasaqa, kei na ka sa tu e delana, ka tauca e na mata i Saula. A sa kaya ko Samuela, “Raica, na ka sa maroroi vakatikitiki sa tauci e matamu oqo. Mo kana, ni sa maroroi ki na tiki-ni-siga lokuci oqo mo kana vata kei ira na tamata sureti.”

A rau sa kana vata kina ko Saula kei Samuela e na siga ko ya.

25Ia ni ratou sa lako sobu mai na tikina cecere ki na koro, a sa tevu tu nai davodavo i Saula e na dela ni vale, ka sa davo sobu ko koya me moce.

26Ia ni sa kida na mataka, sa kacivi Saula ko Samuela ki na dela ni vale, ka kaya, “Mo duri mada, ka me'u sa talai iko yani.” A sa tucake ko Saula, ka rau sa curu yani ki tautuba ki gaunisala, ko koya kei Samuela.

27Ni ratou sa lako sobu tiko e nai bili ni koro, sa kaya vei Saula ko Samuela, “Mo vosa vua na cauravou me liu tiko yani, ka gauna sa liu yani kina ko koya, mo qai tu mada vakadua vakalailai eke, ka me'u tukuna rawa vei iko na vosa ni Kalou.”