Jeremaia 30 - Ai Vola Tabu (Vakadewa Makawa Vakavoutaki 2021)（FRV21）

Sa Yalataka na Kalou na Nodra Vakalesui mai Papiloni na Kawa i Jekope

1Sa dua na vosa sa yaco vei Jeremaia mai vei Jiova, ka vaka:

2“Sa kaya vakaoqo ko Jiova na nodra Kalou na Isireli, Mo vola e na dua nai vola me tu vei iko na vosa kecega ka'u sa tukuna oti vei iko.

3Ni sa kaya ko Jiova, Raica, ena yaco mai na gauna ka'u na vakalesui ira tale mai kina na noqu tamata na Isireli kei na Juta era a vakabobulataki, sa kaya ko Jiova, ia ka'u na vakalesui ira tale mai ki na vanua ka'u a solia ki na nodra qase, ka ra na taukena.”

4Ia oqo na vosa sa tukuna ko Jiova e na vukudra na Isireli kei na Juta:

5“Ni sa kaya vakaoqo ko Jiova:

Na domo ni sautaninini keitou sa rogoca,

sa yaco na rere, ka segai na vakacegu.

6Dou veitarogi mada,

ka vakaraica se dua na tagane sa taratara?

A cava ka'u sa raica kina na tamata yadua

ni sa dui toka na ligana e tolona me vaka na yalewa sa taratara,

ka sa matacea mai na matadra kecega?

7Ulei! Sa qai duatani na siga ko ya,

sa sega e dua me vakakina;

io, sa kena gauna ni rarawa i Jekope;

ia ena vakabulai ko koya mai na ka oqo.

8“Ni sa kaya ko Jiova-ni-lewevuqa, Ena yaco e na siga ko ya, ka'u na musuka tani na nona i vua mai na domomu, ia ka'u na drutilaka talega na kemui vesu; ka ra na sega ni vakasaurarataki koya tiko ko ira na kai tani.

9Ia era na qaravi Jiova na nodra Kalou, kei Tevita na nodra tui, ko koya ka'u na vakatubura vei ira.

10 Jere 46.27,28 “Ia ko iko Jekope na noqu tamata mo kakua ni rere, sa kaya ko Jiova;

io kakua ni ko taqaya, Isireli;

ni sai au, raica, ena vakabulai iko mai na vanua vakayawa,

kei na nomu kawa mai na vanua era sa bobula kina;

ia ena lesu mai ko Jekope, me tiko vinaka ka vakacegu,

ka na sega e dua me vakarerei koya.

11Ni'u sa tiko kei iko, sa kaya ko Jiova, me'u vakabulai iko;

ni'u na vakaotia sara na veimatanitu kecega

ka'u sa vakasevi iko kina,

ia ko iko, ka'u na sega ni vakaotia sara.

Ka'u na vakanakuitataki iko vakavinaka ga,

ni ko na sega ni dro bula sara.

12“Ni sa kaya vakaoqo ko Jiova,

Sa sega ni bula rawa na nomu ramusu,

sa ka rarawa sara na nomu mavoa.

13Sa sega e dua me lewai iko vinaka,

sa sega na wainimate ni nomu mavoa,

sa sega na kemuni botani mo bula kina.

14Ko ira kece ka lomani iko era sa guilecavi iko;

era sa sega ni mai raici iko;

ni ka'u sa vakamavoataki iko e na kuita ni tawa yaloveivosoti,

me vaka ka'u sa nomu meca,

e na vuku ni kena levu ni nomu caka cala,

ni sa vuqa tiko na nomu i valavala ca.

15A cava ko sa tagicaka kina na nomu mavoa?

Sa sega ni malumu rawa na nomu rarawa.

E na vuku ni kena levu na nomu caka cala,

ni sa vuqa tiko na nomu i valavala ca,

ka'u sa kitaka kina vei iko na ka oqo.

16Ia ko ira era na tilomi iko era na tilomi,

ko ira talega na nomu meca era na dui vakabobulataki kecega;

ko ira sa vakacacani iko era na vakacacani,

ko ira kece talega sa tokitaki iko, ka'u na soli ira me ra tokitaki.

17Ni'u na vakamavotaka na nomu mavoa,

ka'u na vakabulai iko, sa kaya ko Jiova;

ka ni ra cavuti iko mo luveniyali, ka kaya,

‘Oqo ko Saioni; sa sega e dua sa kauwaitaka!’

18“Sa kaya vakaoqo ko Jiova:

Raica, au na vakalesuya tale na nodra valelaca na Jekope ka vakabobulataki,

ia ka'u na yalololoma ki na nodra i tikotiko;

ena tara na koro e na kena yavu dina,

ia na vale vakaturaga ena toka tale me vaka na kenai valavala.

19Ena rogo yani talega mai kina na vakavinavinaka

kei na domodra era marau.

Ia ka'u na vakalewevuqataki ira, ka ra na sega ni lewe lailai;

ka'u na vakalevulevui ira, ka ra na sega ni tamata wale.

20A luvedra talega ena vaka eliu,

kei na nodra i soqosoqo ena vakataudeitaki e mataqu;

ia ka'u na cudruvi ira kecega era vakasaurarataki ira.

21A nodra turaga talega ena tubu mai vei ira,

kei koya na nodra tui ena lako mai na kedra maliwa;

ka'u na vakauqeti koya me toro voleka mai, ia ena toro voleka mai vei au;

ia ko cei ko koya oqo sa vinakata na lomana me torovi au mai?

sa kaya ko Jiova.

22Ia dou na yaco mo dou noqu tamata,

ia koi au ka'u na yaco me'u nomudou Kalou.”

23Raica, na cava i Jiova!

Sa lako mai ka sa cudrucudru,

na cava ni veivakarusai;

ena tau tiko ki na uludra na tamata ca.

24Ena sega ni malumu na cudru katakata i Jiova,

ena cakava mada ga, ka vakayacora dina na ka sa nakita ko koya.

Ena kena gauna mai muri, dou na qai kila kina oqo.