2 Samuela 23 - Ai Vola Tabu (Vakadewa Makawa Vakavoutaki 2021)（FRV21）

Nai Otioti ni Vosa i Tevita

1Oqo na kenai otioti ni vosa i Tevita:

Sa kaya ko Tevita, na luve i Jese,

ia sa kaya na tamata sa vakatuburi cake,

o koya ka lumuta na Kalou i Jekope,

kei koya na daunivucu vinaka sara ni Isireli:

2“Sa vosa e na gusuqu na Yalo i Jiova;

sa tiko e na yamequ na nona vosa.

3Sa kaya ko koya na nodra Kalou na Isireli,

sa kaya vei au na Uluvatu i Isireli:

Ko koya sa lewai ira vakadodonu na tamata,

ka sa lewa tiko e na rerevaki koya na Kalou,

4sa vaka na rarama e na mataka,

ni sa cadra na mata-ni-siga,

na mataka sa sega kina na o;

ni sa tubu mai na qele na co,

ni sa cila vinaka na mata-ni-siga ni sa oti na uca.

5“Sa sega li ni vakaoqo vua na Kalou na noqu vale?

Ni sa cakava ga ko koya vei au na veiyalayalati tawa mudu,

sa vakarau tu e na ka kecega ka vakadeitaki.

Ena sega beka ni vakatubura ko koya na ka kecega me'u bula kina

kei na ka kecega ka'u sa gadreva?

6Ia na tamata ca kecega, era na vaka na voto ni kau sa biu,

ni ra sa sega ni tauri rawa e na ligada;

7ia na tamata sa via tauri ira,

e dodonu me vakaiyaragi e na kaukamea kei na dia ni moto;

a ra na visa vakaidina e na bukawaqa e na tikina ko ya.”

Ko Ira na Tamata Qaqa i Tevita

8Oqo na yacadra na tamata qaqa i Tevita: o koya na Takimonaiti sa liu vei iratou na lewe tolu; o koya ko Atino na Esinaiti, sa veivala kei ira na lewe walu na drau, a sa mokuti ira ko koya e na dua na gauna.

9A sa muri koya ko Iliesa na luve i Toto na luve i Eoi; sa dua vei iratou na lewe tolu na tamata qaqa eratou tiko vata kei Tevita, ni ratou sa bolei ira na kai Filisitia era sa soqoni vata mai kea ki nai valu, a ra sa lako tani na Isireli.

10A sa tucake ko koya ka mokumokuti ira na kai Filisitia, ka sa malumalumu mai na ligana, ka sa kabita na nona i seleiwau na ligana. A sa ka levu na qaqa ka vakarautaka ko Jiova e na siga ko ya, ka sa muri koya ko ira na tamata me ra kauta walega nai toki-ni-valu.

11A sa muri koya ko Sama na luve i Aki, o koya mai na ulunivanua. A ra sa soqoni vata na kai Filisitia me ra kovekove, e na dua na tiki ni were sa tei kecega e na pini, ka ra sa dro tani mai vei ira na kai Filisitia ko ira na tamata.

12A sa tu ko koya e na loma ni were, ka valataka, ka mokuti ira na kai Filisitia; a sa vakavuna na rawati ni qaqa levu ko Jiova.

13A ratou sa lako sobu ko iratou e lewe tolu vei ira na lewe tolusagavulu sa liu, a ratou sa lako vei Tevita ki na qara vatu mai Etulama, e na vula i matua, ni ra sa tiko vakaivalu mai na buca ko Refeimi na nodra mataivalu na kai Filisitia.

14A sa tiko ko Tevita e na koro ni drodro e na veisiga ko ya; a sa tiko mai Peceliema e na gauna ko ya na nodra i valu na kai Filisitia.

15A sa mate e na viagunu ko Tevita, ka kaya, “Ke sa dua mada me vagunuvi au e na wai mai na mata-ni-wai mai Peceliema, ka tu mai na matamata-ni-koro!”

16Ia ko iratou na lewe tolu ka tamata qaqa, eratou a basuka na nodra mataivalu na kai Filisitia, ka taki wai mai na matamata-ni-wai mai Peceliema, mai na matamata-ni-koro, a ratou sa kauta vei Tevita. Ia sa bese ni gunuva ko koya, a sa livia yani me ka ga vei Jiova,

17ka sa kaya, “I Jiova, me yawa vei au me'u kitaka na ka oqo. Sa kedratou dra na tamata eratou a douvaka na mate, se segai?” Ka sa bese kina ni gunuva ko koya. A ka oqo eratou sa kitaka na tamata qaqa tolutolu oqori.

18Ia ko Apisai na taci Joape, na luve i Seruwaia, sa turaga vei iratou na lewe tolu. A sa taura na nona moto me veivala kei ira e le tolu na drau, ka vakamatei ira, a sa rogo vata ko koya kei iratou na lewe tolu ko ya.

19Sa sega li ni dokai vakalevu cake vei iratou na lewe tolu? O koya oqo sa lesi kina me nodratou turaga, ia ka sa sega ni tautauvata kei iratou na lewe tolu oqori.

20Ia ko Penaia na luve i Jioiata, a luvena e dua na tamata qaqa mai Kapisieli, ka cakava na ka levu eliu, io sa mokuta ko koya e le rua na tamata erau a vaka na laione, erau kai Moapi. Sa lako sobu talega ka mokuta e dua na laione e na dua nai keli, e na gauna ni uca-vulavula.

21Sa mokuta talega e dua na kai Ijipita, a tamata matavinaka. A sa taura e dua na moto ko koya na kai Ijipita; ia sa lako sobu vua ko koya ni sa taura ga nai titoko, ka sa kaliraka na moto mai na ligana na kai Ijipita, ka vakamatei koya e na nona moto ga.

22A ka oqo sa cakava ko Penaia na luve i Jioiata, a sa rogo vata ko koya kei iratou na lewe tolu na qaqa.

23Sa dokai vakalevu cake ko koya vei ira na lewe tolusagavulu, a sa sega ni tautauvata kei iratou na lewe tolu oqori. A sa lesi koya kina ko Tevita me dua vei ira era sa daubose vata kaya.

24Ko Asaeli na taci Joape sa dua vei ira na lewe tolusagavulu; ko Elanani na luve i Toto na kai Peceliema;

25ko Sama na kai Eroti, ko Elika na kai Eroti,

26ko Elesi na luve i Paliti, ko Ira na luvei Ikesi na kai Tikoa;

27ko Epieseri na kai Anacovi, ko Mipunei na luve i Usa;

28ko Salimoni na luve i Eoi, ko Meerei na kai Nitofa;

29ko Elepi na luve i Peana, e dua na kai Nitofa, ko Itei na luve i Ripei mai Kipea mai vei ira na Penijamini;

30ko Penaia na kai Piraconi, ko Itei mai na uciwai mai Kaasi;

31ko Epialiponi na kai Arapa, ko Asimavece na kai Peurimi;

32ko Elaiapa na kai Selipimi, ko Jonacani, e dua vei ira na luve i Jaseni;

33ko Sama, o koya mai na ulunivanua, ko Eiami na luve i Sarari o koya mai na ulunivanua;

34ko Elifeleti na luve i Easipai, na luvena na kai Meeka, ko Iliami na luve i Eitofeli na kai Kilo;

35ko Esirei na kai Kameli, ko Peerei na kai Aripa;

36ko Ikiali na luve i Necani o koya mai Sopa, ko Pani na luve i Kata;

37ko Seleki na luve i Amoni, ko Neeri na kai Pieroci, o koya sa daucolata nai yaragi i Joape na luve i Seruwaia;

38ko Ira na luve i Jecesi, ko Karepi na luve i Jeceri;

39ko Uraia na Itaiti—era le tolusagavulu-ka-vitu taucoko.