2 Korinica 6 - Ai Vola Tabu (Vakadewa Makawa Vakavoutaki 2021)（FRV21）

Nai Vakatakilakila ni Talatala ni Kalou

1Ia koi keitou ni keitou sa cakacaka vata kaya, keitou sa cikevi kemudou mo dou kakua ni vakawaletaka na loloma ni Kalou.

2Aisea 49.8Ni sa kaya ko koya,

“Au a rogoci iko e na gauna ni vinakati,

ia e na siga ni bula ka'u a vukei iko.”

Raica, oqo na gauna ni vinakati; raica, na siga ni bula edaidai oqo!

3Keitou sa sega ni vakatarabetaka e dua e na dua na ka, me kakua ni beitaki kina na cakacaka vakaitalatala,

4ia me vaka ni keitou sa dauveiqaravi ni Kalou, keitou sa vakaturi keitou e na ka kecega: e na dauvosota sara, e na ka rarawa, e na veivakasaurarataki, e na yaluma,

5Caka 16.23e na vakanakuitataki, e na biu ki na veivale ni veivesu, e na ue, e na daucakacaka, e na dauyadra, e na daulolo;

6e nai valavala savasava, e na vuku, e na vosota vakadede, e na yalololoma, e na Yalo Tabu, e na loloma sa sega ni veivakaisini,

7e nai vakavuvuli dina, e na kaukauwa ni Kalou, e nai yaragi ni valavala dodonu e na liga i matau kei nai mawi,

8e na vakarokorokotaki kei na sega ni dokai, e na vosa ni veivakacacani kei na vosa ni veivakacaucautaki. Keitou sa raici me vaka na dauveivakacalai, ia keitou sa dina ga;

9ka vaka keitou sa sega ni kilai, ia keitou sa kilai vinaka; ka sa vakataki ira sa voleka ni mate, ia ka raica—keitou sa bula tiko; ka sa vakataki ira sa cudruvi, ia ka sega ni vakamatei;

10keitou sa vaka keitou sa daurarawa, ia keitou sa reki tikoga; sa vaka keitou sa dravudravua, ia keitou sa vakavutuniyautaki ira na lewe vuqa; sa vaka ni sa sega vei keitou e dua na ka, ia ka sa tu vei keitou na ka kecega.

11Oi kemudou na kai Korinica, sa dalaga na gusu i keitou vei kemudou, sa vakalevutaki na yalo i keitou.

12Dou sa sega ni vakaleqai mai vei keitou, ia dou sa leqa ga e na lomamudou.

13E na ka oqo—ka'u sa qai vosa me vaka vei ira na luvequ—mo dou dolava vakalevu talega na yalomudou.

Eda sa Vale ni Kalou Bula

14Dou kakua ni veitokani vata vakatani kei ira era sa sega ni vakabauta. Sa veitokani vakaevei na yalododonu kei na tawa-yalododonu? Se rau sa veiwekani vakaevei na rarama kei na butobuto?

15Se rau sa veivinakati vakaevei na Karisito kei Piliali? Se rau sa vakaitavi vata vakaevei ko koya sa vakabauta kei koya sa sega ni vakabauta?

16Vsoro 26.12; Isi 37.27; 1Kori 3.16; 6.19Se rau na to vata vakaevei na vale ni Kalou kei na veimatakau? Ni da sa vale ni Kalou bula; me vaka sa kaya na Kalou,

“Au na tiko e na lomadra ka lako voli kina,

ia ka'u na nodra Kalou,

ka ra na noqu tamata.

17 Aisea 52.11 O koya oqo mo dou qai lako tani mai vei ira,

ia dou bula tawasei tu, sa kaya na Turaga,

ka dou kakua ni tara na ka sa sega ni savasava;

au na qai ciqomi kemudou,

18 2Samu 7.14; 1Vei 17.13; Aisea 43.6; Jere 31.9 ia ka'u na yaco me'u Tamamudou,

ka dou na yaco me luvequ tagane kei na luvequ yalewa,

sa kaya na Turaga Kaukauwa sara.”