Same 76 - Ai Vola Tabu (Vakadewa Makawa Vakavoutaki 2021)（FRV21）

Na Kalou i Isireli — O koya sa Qaqa ka Lewa Vua nai liuliu: kei nai yaya ni vakatagi vakawa. A Same i Esava. A Sere.

1Sa kilai e Juta na Kalou,

sa levu na yacana mai Isireli.

2Ia sa tu mai Selemi na nona vale,

kei na nona i tikotiko mai Saioni.

3Sa musuka mai kina ko koya na gasau ni dakai,

nai sasabai, kei nai seleiwau, kei nai valu. Sela

4Oi kemuni ko ni sa rogo,

ka ko ni sa levu vakaidina mai na veiulunivanua

ni dauivalavala kaukauwa.

5Sa kau tani na nodra i toki-ni-valu na qaqa;

era sa moce lutu;

ka sa sega ni rawa vei ira na kaukauwa,

me laveta na ligadra.

6E na nomuni veivunauci, na Kalou i Jekope,

sa veilecayaki sara ko ira e na qiqi-ni-valu, kei ira sa vodo ose.

7Oi kemuni, io, sai kemuni ga, sa rerevaki!

O cei sa tu rawa e matamuni

ni kemuni sa cudru mai?

8O ni sa vakarogoya mai na nomuni lewa mai lomalagi;

sa rere ko vuravura, ka sa tiko lo

9ni sa tucake na Kalou me lewa,

me vakabulai ira kecega era sa yalomalua e vuravura. Sela

10Na cudru ni tamata sai koya kemuni na dokai dina kina,

ia na kena vo ni cudru ko ni na vakadaroya.

11Dou bubului, ka vakayacora talega vei Jiova na nomudou Kalou;

o ira kecega era tiko vakavolivoliti koya, me ra kauta mai na ka ni loloma

vua sa dodonu me rerevaki,

12ena vakawaicalataka ko koya na lomadra na turaga,

sa rerevaki ko koya vei ira na tui kei vuravura.