Isikeli 26 - Ai Vola Tabu (Vakadewa Makawa Vakavoutaki 2021)（FRV21）

Na Cudruvi nei Taia

1 Aisea 23.1-18; Joeli 3.4-8; Emo 1.9,10; Saka 9.1-4; Maciu 11.21,22; Luke 10.13,14 Ia e nai katinikadua ni yabaki, e nai matai ni siga ni vula, sa yaco vei au na vosa i Jiova, ka vaka:

2“Ko iko na luve ni tamata, ni sa vosa me baleti Jerusalemi ko Taia, ka kaya,

‘Ue, sa ramusu ko koya ka nodra matamata-ni-koro ko ira na veimataqali;

sa vuki mai vei au ko koya;

au na vakavutuniyautaki,

ni sa lala mai ko koya.’

3O koya oqo, sa kaya kina na Turaga ko Jiova, ka vaka;

Mo kila, au sa veimecaki kei iko, Taia,

ia ka'u na kauta cake mai vei iko na veimatanitu e vuqa,

me vaka na ua ni sa se mai ki na wasawasa.

4A ra na vakarusa na bai kei Taia,

ka basuka sobu na kena veivale cecere;

ia ka'u na taviraka tani na kena kuvu-ni-soso,

ka vakatautauvatataki koya kei na dela ni vatu.

5Ka na yaco mei sasau ni lawa

e loma ni wasawasa,

ni sai au ka cavuta, sa kaya na Turaga ko Jiova.

Ena yaco ko koya me nodra i toki-ni-valu na veimatanitu,

6kei ira na luvena mai na veikoro e loma ni vanua

era na mate e nai seleiwau.

Era na qai kila kina ni sai au ko Jiova.

7“Ni sa kaya vakaoqo na Turaga ko Jiova: Raica, au na kauti Nepukanesa na tui Papiloni ki Taia, mai na mata ni vualiku, ko koya na nodra tui na tui, kei na ose, kei na qiqi-ni-valu, kei nai valu e vodo ose, kei nai vavakoso, kei na tamata e lewe vuqa.

8Na luvemu yalewa e loma ni vanua

ena vakamatea ko koya e nai seleiwau.

Ena buki druadrua me valuti iko,

ka viria na kemu suva,

ka vakaduria na kemui vakaruru.

9Ia na kemui tukituki ni bai ena vakaduria ko koya ki na nomu bai,

ka basuka sobu na nomu vale-cecere e na nona matau.

10E na levu sara na nona ose

ka na ubi iko taucoko na nodra kuvu-ni-soso.

E na vuku ni domo ni valu sa vodo ose, kei na qiqi-ni-yaya, kei na qiqi-ni-valu,

ena yavala kina na nomu bai,

ni sa curu ko koya ki na nomu matamata-ni-koro

me vakataki ira sa curuma na koro sa kabasu.

11E na ququ ni nona ose

ena butuka kece kina na nomu sala.

Ena vakamatei ira na nomu tamata e nai seleiwau,

kei na nomu bai ni valu kaukauwa ena bale sobu ga ki na qele.

12A ra na tokitaka na nomu i yau,

ka koveraka na nomu ka ni veivoli;

ka ra na basuka sobu na nomu bai,

ka vakacacana na nomu veivale domoni.

Ia era na viritaka ki loma ni wai na nomu veivatu

kei na nomu kau ni vale kei na nomu kuvu-ni-soso.

13 Vtaki 18.22 Ia ka'u na vakaotia na domo ni nomu meke;

ia na domo ni nomu api ena sega tale ni rogo.

14Ia ka'u na vakayacori iko mo tautauvata kei na dela ni vatu;

ko na yaco mei sasau ni lawa.

Ko na sega tale ni tara,

ni sai au ko Jiova ka'u sa vosa vakaoqo,

sa kaya na Turaga ko Jiova.

15“Sa kaya vakaoqo na Turaga ko Jiova ki Taia: Ni sa rorogo na nomu bale, ka ni ra vutugu tiko ko ira na vakamavoataki, ni sa ia na veivakamatei e na kemu maliwa, me na qai sega li ni yavavala kina na veiyanuyanu?

16Vtaki 18.9,10Era na qai lako sobu mai na nodra i tikotiko na turaga kece ni wasawasa, ka biuta na nodra i tutuvi, ia era na luvata tani na nodra i sulu veivolavolai. Era na vakaisulu e na sautaninini, era na tiko sobu ki na qele, ka sautaninini tikoga, ka kidacalataki iko.

17A ra na taurivaka na lele e na vukumu, ka kaya vei iko:

“ ‘Na nomu rusa, ko iko sa vakatawani, ka sa yali mai wai,

Ko iko na koro rogo,

ka daugumatua e na loma ni wasawasa,

ko koya kei ira era lewena,

ka ra dauveivakarerei vei ira kecega era tiko kina!

18Ena qai sautaninini na veiyanuyanu

e na siga ni nomu bale;

io, ena kidroa na veiyanuyanu e na loma ni wasawasa

ni ko sa lako tale.’

19“Ni sa kaya vakaoqo na Turaga ko Jiova: Ni'u na vakalalataki iko, me vaka na veikoro sa sega tiko ni tawa; ni'u na kauta cake mai vei iko na wasa titobu, ka na sa luvuci iko na wai levu;

20ni'u na kauti iko sobu kei ira era lako sobu ki na qara, vei ira na tamata eliu, ka vakatikori iko e na ruku i vuravura, e na veitikina sa rusa makawa, kei ira era lako sobu ki na qara, mo kakua ni tawa tale; ni'u na vakatikora talega nai ukuuku e na nodra vanua na bula.

21Vtaki 18.21Ka'u na qai vakayacori iko mo ka rerevaki, ia ko na qai yali sara; ia kevaka ko sa dauqarai, ko na sega sara ni kune tale, sa kaya na Turaga ko Jiova.”