2 Samuela 6 - Ai Vola Tabu (Vakadewa Makawa Vakavoutaki 2021)（FRV21）

Sa Kauta mai ko Tevita na Kato ni Kalou ki Jerusalemi(1 Veigauna 13.1-14; 15.25—16.6,43)

1A sa vakasoqoni ira vata tale ko Tevita na tamata digitaki kecega, e le tolu na oba (30,000), mai vei ira na Isireli.

2Lako 25.22A sa ia ko Tevita, kei ira kecega na tamata era sa tiko vata kaya, ka lako yani mai Peali e Juta, ka me kauta cake mai kea na kato ni Kalou, sa vakayacani e na yaca i Jiova-ni-lewevuqa, o koya sa tiko e na tadrua ni jerupi.

3 1Samu 7.1,2 A ra sa vakavodoka na kato ni Kalou ki na dua na qiqi-ni-yaya vou, a ra sa kauta mai na vale i Epinatapi mai Kipea. A sa tubera na qiqi-ni-yaya vou ko Usa kei Eiio, oi rau na luve i Epinatapi.

4A ra sa kauta mai na vale i Epinatapi mai Kipea, a ra sa lako vata kei na kato ni Kalou, ka sa liutaka na kato ko Eiio.

Ko Usa kei na Kato ni Kalou

5Ia era sa qiriqiri e na mata i Jiova ko Tevita kei na vale kecega i Isireli, e na ka ni meke kecega sa caka e na kau damanu, io e na api, kei na soliteri, kei na tibereli, kei na sibali kei na kasitaneti.

6Ia ni ra sa yaco ki na rara ni samu sila nei Nakoni, sa dodoka na ligana ki na kato ni Kalou ko Usa ka taura, ni ra sa tarabe na bulumakau.

7A sa waqa na cudru i Jiova vei Usa, ka sa yaviti koya mai kea na Kalou e na vuku ni nona cala, ka sa mate mai kea ko koya e na yasa ni kato ni Kalou.

8A sa rarawa ko Tevita, ni sa yaviti Usa ko Jiova. A sa vakayacana na tikina ko ya, ko Peresi-usa, ka yacova na siga oqo.

9A sa rere vei Jiova ko Tevita e na siga ko ya, ka kaya, “Ena kau vakacava mai vei au na kato i Jiova?”

10A sa sega kina ni via kauta vua ko Tevita na kato i Jiova ki na koro i Tevita. Ia sa kauta vakatikitiki ga ko Tevita ki na vale i Opeti-itomi na kai Kaca.

111Vei 26.4,5A sa tiko na kato i Jiova e na vale i Opeti-itomi na kai Kaca ka vula tolu, ka sa vakalougatataki Opeti-itomi ko Jiova, kei iratou kecega na nona lewe-ni-vuvale.

12A sa tukuni vei Tevita na tui, ka vaka, “Sa vakalougatataka ko Jiova na vale i Opeti-itomi, kei na nona ka kecega, e na vuku ni kato ni Kalou.” A sa lako kina ko Tevita, ka kauta cake e na yalo mamarau na kato ni Kalou mai na vale i Opeti-itomi ki na koro i Tevita.

13Ia ni ra sa lako tu ka kalawa vakaono ko ira ka colata na kato i Jiova, sa cabora e dua na bulumakau kei na dua na manumanu uro ko koya.

14Ka sa tabalaka na meke ko Tevita e na mata i Jiova e na nona i gu taucoko. A sa vauca voli ko Tevita e dua na efoti lineni.

15A sa kauta cake na kato i Jiova ko Tevita, kei na matavale kece i Isireli, e na kaila kei na uvu davui.

Ko Tevita kei Mikali

16Ia ni sa yaco ki na koro i Tevita na kato i Jiova, sa vakararai ko Mikali na luve i Saula mai na katuba-leka, ka kunei Tevita na tui ni sa ladelade ka meke tiko e na mata i Jiova, ka sa beci koya e lomana.

17A ra sa kauta na kato i Jiova, ka tauca e na kena tikina, e loma ni valelaca ka birika ko Tevita me tu kina. A sa vakacabora ko Tevita eso nai soro kama ka so nai soro ni veivinakati e na mata i Jiova.

18Ia ni sa vakacabora oti ko Tevita nai soro kama kei nai soro ni veivinakati, sa vosavakalougatataki ira na tamata ko koya, e na yaca i Jiova-ni-lewevuqa.

191Vei 16.43A sa vota vei ira kecega na tamata, io vei ira na lewe vuqa kecega na Isireli, na tagane kei na yalewa, ki na tamata yadua e dua nai buli madrai, kei na tiki ni lewe ni manumanu, ka dua na keke vua ni lolo. A ra sa lako yani na lewe vuqa, na tamata yadua ki na nona vale.

20A sa lesu ko Tevita me vosavakalougatataki ira na nona lewe-ni-vuvale. A sa curu yani ko Mikali na luve i Saula me tavaki Tevita, a sa kaya, “Sa lagilagi na tui Isireli edaidai, ne! O koya ka luvata na nona i sulu e matadra na vada ni nona tamata, me vaka sa luvata votu na nona i sulu e dua vei ira na tamata lialia!”

21A sa kaya vei Mikali ko Tevita, “E na mata i Jiova ga, o koya ka digitaki au, ka biuti tamamu, kei na nona lewe-ni-vuvale kecega, ka lesi au me'u turaga vei ira na nona tamata ko Jiova, io vei ira na Isireli, o koya oqo ka'u na reki kina e na mata i Jiova.

22Ia ka'u na beci au vakalevu cake, ka'u na vakamalumalumutaki au sara. Ia ko ira na vada ko sa vosa kina, era na vakarokorokotaki au tiko.”

23A sa sega kina ni vakaluveni ko Mikali na luve i Saula, ka yacova na siga sa mate kina.