Aisea 16 - Ai Vola Tabu (Vakadewa Makawa Vakavoutaki 2021)（FRV21）

Era Sotava na Leqa ko Ira na Kai Moapi

1Dou vakauta na lami

vua na tui ni vanua,

io mai Sela, e na vanua dravuisiga,

ki na ulunivanua ni goneyalewa ni Saioni.

2Me vaka na manumanu sese

sa vakasevi mai na kena sova,

era na vakakina na goneyalewa ni Moapi

mai nai vutovuto ni uciwai ko Arinoni.

3“Dou ia na bose,

lewa vakadodonu;

cakava na nomudou i vakaruru e na siga levu

me tautauvata kei na bogi;

vunitaki ira sa dro mai,

kakua ni tukuni ira na tiko vakarurugi;

4me tiko kei iko

ko ira era sa se mai Moapi;

mo nodra i vakaruru

mai na matana na dauvakacaca.”

Ni sa takali na daukovekove,

sa mudu na dauvakacaca,

sa vakarusai tani e na vanua ko ira ka dauvakasaurara,

5ena qai vakataudeitaki e na loloma nai tikotiko ni tui,

ka na dabe dei kina e na yalodina

e na vale i Tevita

o koya sa lewa ka segata na vakatulewa vinaka

ka sa vakusarawataka na caka dodonu.

6Eda sa rogoca oti na viavialevu i Moapi

—sa dua na ka na levu ni nona viavialevu!—

na nona yalolevu, nona dokadokai koya, kei na nona daucudru;

na nona dautukuni koya wale sa sega ni dina.

7O koya oqo, mo laiva me tagi ko Moapi,

laiva me ra tagi kecega me baleti Moapi.

Dou na tagi dula ni sa rusa ko Kiri-ereseci;

ni sa yaviti sara.

8Ni sa qai malai na veiwere ni Esiponi,

kei na vaini ni Sipima;

ko ira na turaga ni veimatanitu

era sa vakabalea sobu na tabana talei,

sa la'ki yala ki Jaseri,

ka lako sese ki na vanua dravuisiga;

sa tete yani na tabana,

ka takosova na wasawasa.

9O koya oqo ka'u na tagicaka na vaini ni Sipima,

me vaka ka'u a tagicaki Jaseri;

au na vakasuasuataki kemudrau,

i Esiponi kei Elale e na wai ni mataqu;

ni sa sega ni rogo na kaila ni nomu tatamusuki vuata

kei na tatamusuki sila.

10A sa vakayali mai na veiwere vuavuai

na reki kei na marau;

ena sega na sere se na kaila e na loga-ni-vaini,

ia na waini e nai keli-waini ena sega ni butuqaqi;

ka'u sa muduka laivi na kena kailavaki.

11O koya oqo ena rorogo kina na ketequ me vaka na api e na vuku i Moapi,

kei na lomaqu e na vuku i Kiri-ereseci.

12Ia ena yaco, ni sa rairai mai ni sa oca ko Moapi e na yasana cecere, ena qai curuma na nona bure-kalou me soro; ia ena sega ga ni yaga.

13Oqo na vosa sa cavuta eliu ko Jiova e na vuku i Moapi.

14Ia sa qai vosa ko Jiova, ka kaya, “Ena sega ni oti e tolu na yabaki, me vaka na yabaki ni tamata voli, ena beci mada na lagilagi i Moapi, kei ira kecega na lewe vuqa ko ya; ia na kedra vo era na lewe lailai sara ka malumalumu ga.”