1A gone vuku sa rogoca nai vakavuvuli i tamana,
ia ko koya na dauveivakalialiai sa sega ni rogoca ni sa vunauci.
2Ena kania na ka vinaka na tamata e na vua ni gusuna,
ia na yalodra na dautalaidredre ena kana ka ni valavala kaukauwa.
3O koya sa qarauna na gusuna sa maroroya na nona bula,
ena rusa ga ko koya sa dalaga sara na tebenigusuna.
4Sa garogaro na lomana na vucesa, ka sega na ka e rawata,
ia na lomana na dautara ka ena vakamamautaki.
5Sa cata ni vosa lasu na yalododonu,
ia na tamata ca sa ka vakasisila, ka sa vakamaduataki.
6A nona i valavala dodonu na tamata dodonu sa maroroi koya e na sala,
ia na nona caka ca na tamata ca sa vukici koya.
7Eso era sa viavia vutuniyau, ia sa sega vei ira na ka;
ka so era sa viavia dravudravua, ia sa levu sara na nodra i yau.
8Sai voli ni nona bula na tamata na nona i yau,
ia sa sega ni vakarogoca ni sa vunauci ko koya na dravudravua.
9A nodra rarama na yalododonu sa reki,
ia na nodra cina na tamata ca ena bokoci ga.
10A yaloviavialevu ga sa tubu kina na veileti,
ia ko ira sa vakavulici vinaka sa nodra ga na vuku.
11Ai yau sa rawa wale tu ena vakalailaitaki,
ia ko koya sa rawata e na dautara ka ena vakalevutaki.
12Ni vakaberaberataki na ka sa nuitaki tiko sa dau oca kina na yaloda,
ia sa kau ni bula ni sa rawa tu na ka e domoni.
13O koya sa beca na vosa ena rusa,
ia ko koya sa rerevaka nai vakaro ena vakacegui kina.
14A vunau ni tamata vuku sai vurevure ni bula,
me lako tani kina mai nai cori ni mate.
15A vuku dina sa vinakati kina na tamata,
ia na nodra sala na dautalaidredre sa sukusukura.
16Ko ira kece na yaloqaseqase era dau i valavala vakavuku,
ia na lialia sa vakavotuya na nona lialia.
17Ai talaki ca sa lutu ki na ca,
ia nai talaki lomadina sa ia na veivakabulai.
18A dausiga kei na madua ena nona na tamata sa bese ni vakavulici,
ia ko koya sa muria na vunau ena dokai.
19A ka e domoni ka sa rawa tu sa ka kamikamica ki na yaloda,
ia ko ira na lialia era sa cata sara na lesu tani mai na ca.
20Ena vuku mai ko koya sa malele vata kei ira na vuku,
ia ko koya era veitokani vata kei na lialia ena rusa.
21A ka ca ga ena muri ira na tamata ca,
ia ena soli ga na ka vinaka vei ira na yalododonu.
22A tamata vinaka sa tataunaka na ka me ra taukena ko ira na makubuna,
ka sa maninitaki me nona na yalododonu nai yau ni tamata i valavala ca.
23Sa levu na kakana e na nona cuki were na dravudravua,
ia sa so na ka sa vakacataki ni sa sega ni lewai vakadodonu.
24O koya sa sega ni vakanakuitataka na luvena sa cati koya,
ia ko koya sa lomani koya sa vakanakuitataka ni sa gone.
25Sa kana na yalododonu me mamau kina ko koya,
ia na ketedra na tamata ca ena viakana ga.
Who We AreWhat We EelieveWhat We Do
2025 by iamachristian.org,Inc All rights reserved.
